Jueces 6 - Arabela

Pueyaso saquiriojosacari Gedeoon na paraa miaquejoriquiano

¹ Israel pueyari socua jiyacatequiaari sacuaraatia na miijionura Pueyaso niquiara. Pueyasoori naacua nojori jataquiaari nojori paraa juaashiquiajinia. Naacuatej, Madiaan jiyajinijinio nojori paraari jiyanohua nojori miitiaquiaari. Siete marijiaari nojori shocojoquiaari naa miitiasano pueya nojori quishacaritij.

² Naa Madiaan jiyajinijinio nojori paraa miitianuucua puera socua nojoritij, Israel pueyari tuhuananuhuacua jiuuriooquiaari na jamaatiujiara. Na jamaatiujiara tuhuananuhuacua canecojua raaca jeenucuatuquiaarijaariuhuaj. Cuno nojori jamaatiujiara raacaari pueya jiyaqui canetacojua, pueya niquiyaquishaqui.

³ Quera Israel pueya coteesacari na nataacuaca carajotanu, saa jiyacarijia nojori paraa Madiaan jiyajinijinio, Amalecita jiyanishano taucuacajaaja, tamasaca pananu muetasamaji taucuacanio nojori tiuquitiaja nojori na miaquejonura.

⁴ Puetunu cuno taucuacajanaari Israel pueya cuhuariquiacajinia suhuoronuuquiaari juhuajaniya. Juhua na camaruhuajaari nataacuaca miatuquiaari. Naa miatuquiaari puetunu cuno Israel pueya cuhuariquiacajanaari. Gaza tiacaacua tohuatetuquiaariiri. Israel pueyari naacua maja quenaaja na jiitiatunu quijia na miatusocoriquianotej. Nojori paraari puetunu nojori seya quiooquiaari nojoririajuhuaj. Cunoori borreecohua, juyaca, queraatia burrohua quijia.

⁵ Israel pueya paraari puetunu nojori cuhuariquiacajanaa sesoquiaari tii nojori suhuoronuunuucua, juhuajaniya tii na seya na jiitiatunuucuajuhuaj. Naa macuhuajatujua puetunu cuno jiyajinia cuhuariquiacajanaari. Cuno pojori jaara nijioquiaari naa cuhuariquiaca na sesonuratej, tojetaarucuajanaa puetunu na seyatajanaa nijiojuaari. Cuno nojori seyari jiyanohua queraatia camellohua quijia. Muera majaari, puetunu cuhuariquiaca puetuyajanaari.

⁶ Naa Madiaan jiyajinijinio nojori paraa miiniuucua Israel pueyatej, nojoriiri quera na miaajaa titiaconu. Naacua socua Pueyaso masetuquiaariiri, Pueyaso naacunura nojori.

^7-8 Israel pueya jaara Pueyaso masetuquiaari Madiaan jiyajinijinio nojori paraa Pueyaso tacunura nojoriicuaji, Pueyasoori saaja nojoriicua jiyaroree pueyarano na sequesano caminiujiunia. Cuno pueyanoori naa nojori sequequiaari: —Pa supuetana Israel Camarnu Pueyasoori naa sequeyaquij: “Janiyacuajaari noo nia Pueyasoni, Egipto jiyajiniji nia jaatianotej. Niaacuajaari cuno jiyajinia miitiasaaquiaari nia poonitishaanuucua pueyaracaanu.

⁹ Majaari saaja cuno Egipto taucuacaacuaji cua jayonu quiquianu niajaniya, janiyacuajaari puetunu nia miitiajaca taucuacaacuajijanaa nia cojuanojaniuhuaj. Janiyari cuno nia paraa Cananeocuaca taanuuno jacariaja niaacuaji nojori jiyacajinijini. Naacuatej, janiyari cuno nojori jiyaca niquitiojono niaarano nojori jiyaca saniniunijia.

¹⁰ Janiyacuajaari tariucua naa nia sequenoni, ‘Janiyacuajaari nia Camarnu Pueyasoni. Majaari taucuaca Amorreocuaca pueyasohua puerenu, teyano jiyacajinia nia quiyacuajanij. Niaari tariucua naa niaarano cua sequesano shocoterucuaa saaja tojetaarucuajanaa cua tojitiaashijiaca nia quiniuucua.’”

¹¹ Jiyacaritij Pueyaso seruuri nimiaa. Ofra tiacajinia nujuaja naana cari cajishiiri. Cuno tiacaari Joaas tiaca quijia na supuetana Abieezer jiyajinia. Joaasri Abieezer niquiohuacuajinio muetano. Joaas niyanu Gedeoonri jiyacari jiyasohuaja na trigo nooniujiuriquiaa uva rapijiojuajinia. Naa jiyasohuaja poonijioriquiaari, maja nojori paraa Madiaan jiyajinijinio niquiniuria nojuaja.

¹² Pueyaso seruuri jiyacari nocua muetaquiaari. Naa na sequereeri: —Pueyasocuaja quia cojiya, puereyaquijia cumueeca pueyanonaa.

¹³ Gedeoonri Camarnu riucuaree: —Rupaquijia cua tojiricuara, Camarnunaa. Pueyaso jaara canaata quiriquia, ¿casaara puera canaa paraa miitiaa canaacuaraarinij? ¿Teetecuara noo cumaacani canaa saaquiapue na poojotaquiaa canaatej? Najuhuana sequesaaquiaatejuhuanaari, Pueyasona na cumaacata Egipto jiyajiniji canaa jaatiaquiaari. ¿Teetecuaraarinij? Maja naasucuani. Pueyasocuaja canaa carterecuaano Madiaan jiyajinijinio canaa paraara. Cuno taucuacaari naacua canaa miitiaaquij.

¹⁴ Camarnujuanaari Gedeoon shootiaree tacuriitia. Naa na sequereeri: —¿Casaara najuhuana cumueecatequia? Cuno quia jiitiasano cumueeca quia saniri Madiaan jiyajinijinio nia paraacua. Janiyajanaacuajaari nojoriicuara quia saneejiyani.

¹⁵ Gedeoonri naa na riucuarohuacuhuaj: —Quenaaja cua tojiricuaraja cua Camarnunaa. ¿Janiyatucua taa canaa miitianaa canaa paraa miaquejorecuaanij? Canaa, supuetana Manasees niquiohuacuajinio caneno pueyaniqui, canaari tojetaarucuajanaa secajani. Naajuhuaj, janiyari cua tapueyocuacajiniji socua nojori naatujuani.

¹⁶ Pueyasoori Gedeoon riucuaree: —Quia naatacuaja quia paraa miaquejonu. Janiyacuajaari nojoriicua quia cojiriquianoni. Quiaari naacua Madiaan jiyajinijinio quia paraa monutaniya tojetaarucuajanaa juhua niquiriyatujua.

¹⁷ Gedeoonri jiyacari naa Camarnujuanaa sequereequij: —Quiaa jaara seetanujuanaa cua saquiriojiya quia sequesano cua miiniuria, quiarijia cua tore. ¿Seetanujuanaa quiajaniyatucuara niya cuata pocoojiyani?

¹⁸ Jaara naa quiritij, quiarijia cua tojiricuaraja. Maja senota niiquiji quianuhua janiya cuaara quia coquesuhuajaatijiaj. Ritia cua casaa nertacoora cua niquitiosocoriquiano quiajaniya. Camarnuuri seetanujuanaa naa na sequeree: —Janiyacuaja niyaja quia sashiniutianiyani.

¹⁹ Gedeoonri na tiajinia quiacuhua. Na cabra niquiojua moreeri. Ritia na capiquiuriiri. Naajuhuaj, veinte litro trigo cashojua shanacujureeri. Na poreetajaaju na miniquiootasano cashojua majeetejoree ritiaari. Shu capiquiucua niojoree canaasatujiniaari. Na caaca shuurii coshijiniaari. Puetunu na patootaareejanaa naana caririaari tee na sashishaariquiaacuajanij.

²⁰ Pueyaso seruuri Gedeoon sequeree: —Nio saajiaacua quia niojore shu, cuno na poreetajaaju quia majeetejosano panjaajanio. Quiocua quia patasano caaca totarohua na caco. Gedeoonri naa miirii taa na sequesaareecuajanij.

²¹ Na nuhuaji, Pueyaso seruuri na nataca nacatu rupueteree shuucua, na poreetajaaju majeetejosano pancuajaajanio. Jiyacaritij, cuno saajiaari tama noshiquiijiaaja. Shuuri na pantaja cateree puetunujuanaa, shaaqui tii. Naa na miiniu nuhuajitij, Pueyaso seruuri tiijia shaajecuhua na namijia taquiji.

²² Gedeoonri jiyacari shusha niishiquii nojuajaqui Pueyaso seruta pocoojoriquiaacuaja. Nojuajaari naacua naa sequereequij: —¡Juhuej Camarnunaa! ¡Camarnucuajaqui quiriquiaa! ¡Quiarijia cutara, janiyajanaa cua namijiata niquirii Camarnujuanaa seruni!

²³ Pueyasoori Gedeoon sequeree naatej: —Quioojia quia cajitiri. Maja puerenu. Maja quia shaajenu quiniutianiya.

²⁴ Gedeoonri tiijia riunitiquiaari sai. Naa na jiyaniquiriohuari, “Pueyasoori jiuujia cajitijia.” Cuno sai paatishanoori na quiniu quiyajaa Ofra tiacajinia. Cuno tiacaari Abieezercuajinio caneno pueya jiyajinia.

²⁵ Cuno niucuajanij, Camarnujuanaari naa sequequiaari Gedeoontej: —Quia que juyacajiniji niquiriyatu caya quia quiare, nooj, tariucua siete marijia shocotejonotej. Cunoori socua panishano juunu tarajanu. Naa quia miiniu nuhuajitij, quiocua cuna juunu jiyajeetaniri Baalcuara catijiaja saijiniji paatishano juhuacutu, na pueyasora quia que jiyatesanoni. Quiocua juhua Aseraa niquishano quejasano naana nujuatesano nojori secojosano pojoteterejuhuaj. Cunoori Baacuara catijiaja shuriucua nujuaja naana.

²⁶ Naa quia miiniu nuhuajitij, quiocua cuno tuhuananujiniji saitia juhuacure tii quia catijiajara cucuara quia poonitijiosano juunu. Quiocua coteenu mojoquiiri quia pojotesano juhua Aseraa niquishano naanani. Quiocua cunotaja catijiarohua quiria cuno juununi.

²⁷ Gedeoonri jiyacari diez na jiyaraajia canuu saquiriojoree. Naa miiriiri taa Pueyaso sequeree nojuacuajanij. Na camaca na puerenuucua, tama nojori tiacajinijinio pueyajuhuaj, majaari cuno na miiniu quirii juuca. Niucua na miirii juhuajaniya cutaraari.

²⁸ Jaara juhuaquequiaari, cuno tiacajinijinio camaruhuari Baalcuara catijiaja riuriatatuquiaari jiyajeetano. Pojotesano quiriquiaajaariuhuaj naanajiniji quejasano juhua Aseraa niquishano naana, Baalcuara catijiaja shuriucua nujuajani. Quiarijiaaca saitia juhuacusano niquitiuriijaariuhua. Juunuuri tariucua tii catijiasano quiriquiaa.

²⁹ Jiyacaritij, puetunu nojorijianaari naa nequesoreetooquiaari: —¿Canateja naa miiriicuaani? Nojori pajenuunuucua na nequesoreenuta puetunujuanaa, socua sequesaareeri Joaas niyanu Gedeooncuaja naa miiriiquij. Naacuatej, cuno pojoriiri Joaascua quiaquee. Naa na sequetuseeri:

³⁰ —Miji canaacua quia tohuatere quia niyanu canaa mosocoriquiano. Nojuajaqui pa pueyasohuara pa jiyatesano Baalcuara pa catijiaja juhuacu jiyajeetaree. Na shuriucua nujuaja Aseraa pojotereejaariuhuaj.

³¹ Jiyacaritij, Joaasri na shocua maano narta pueya sequeree naatej: —¿Niaateeri naa Baal miishaanuucua nocua naminiu paniya pueyano miaquenutej? ¡Teee, nia quiaarecuaaqui! Juaashoo sequeecua juaaritinijia. Teyonu niajaniyajinijinioteja naa Baal miishaanuucua juaaquioyani, nojori cuaara quiarijia miaquejosaaria pananu muetaaquishacarijia. Baal jaara seetanujuanaa Pueyaso quiri, nojuaja cuaara tama na coonujaaja namiiria canteja na pojotereecuajano.

³² Cuno juucajiniji, Gedeoonri jiyaniquishaaree “Jerobaal.” Nioori naa sequeyaquij: “Baal cuaara na coonu nujuataara, cante nocuara catijiaja jiyajeetacanucuajani.”

³³ Jiyacaritij, Madiaan jiyajinijinio taacuaca, Amalecita jiyanishano taucuacajuhuaj, puetunu pananu muetasamaji taucuacajanaari coquetooquiaari Israel pueya na miaquejonura. Miaquetoonuucua nojori nishacari, Jordaan moo jatatumaari. Jezreel jiya jamatujinia suhuoronuuseeri.

³⁴ Jiyacaritij, Pueyaso Sohuanuuri Gedeooncua quiaaree na cumaquiniuria. Gedeoonri naacua borreeco nacaja jonenereecujua. Abieezer niquiohuacuajinio caneno narta pueyari na coqueseecujua. Gedeoonri jiyacari na jiyaraajia jiyaramiquirii puetunu narta supuetana Manaseescuajinio caneno pueyacuajanaa. Naa quijiaari Gedeoon jiyarotasano na rupaa narta pueyacua: —Miji cuarta pueyanaa. Pa coquetoorejataj. Pa paraa pa saniri miaquejonu.

³⁵ Naa jiyaramiquirii supuetana Aseercuajinio caneno narta pueyacuajaariuhuaj, supuetana Zabulooncuajinio caneno narta pueyacuajuhuaj, supuetana Neftaliicuajinio caneno narta pueyacuanio. Naacuatej, puetunu nio narta pueyacuajinio caneno pueyajanaari Gedeooncua nijioquiaari nojuaja na cojitiuniuriajuhuaj.

³⁶ Gedeoonri jiyacari Camarnu Pueyaso sequeree naatej: —Quia jaara seetanujuanaa cua saquiriojoree canaa paraa cua miaquejonura cuarta Israel pueya quiniuria juhuajaniya taa quia sequeree janiyacuajani, quiarijia quiria quia miiriucuarajaj nio cua sequesano quiajaniyani.

³⁷ Janiyari borreeco shoque muenutaniya carijiniani, jatij tee pueya jocuaquiaa na trigocuajani. Saaja cua muesano shoque cajaca jaara juhuaquema piquiiquia riya shaaca jiasano, jiya jaara quiri jojeeca saniniuujia, janiyari naacua niishiniutianiyani quiaaqui seetanujuanaa cua saquiriojoree canaa paraa cua miaquejonura, naatej taa quia sequeree janiyacuajani.

³⁸ Puetunujuanaari naa maninia Gedeoonra tohuatequiaari taa na paniriquiaacuajanij. Tariquiicuaji na sanesacari, carijinia na muesano shoque cajaca minijioreeri. Riya shaacaari niquiriyatu suhuocorau mishaja quirii.

³⁹ Gedeoon taacanuunuucua, socua camiriohua naa Pueyaso sequenuuriuhuaj: —Maja juaaniu Pueyasonaa, cua tequejotenuucua quiajaniya. Niojuanaa quia nequesotareeraj. Quiarijia saniniuujia, cua muesano shoque cajaca cuaara juhuaqueera joojeeca. Riya shaaca cuaara piquiojoora jiya saniniuujia.

⁴⁰ Cuno niucuajanij, Pueyasoori naa miirii Gedeoonratej taa na paniriquiaacuajanij. Jaara juhuaquequiaari, shoque cajacaari tojetaarucuajanaa joojeeca quiriquiaa. Jiyari saniniuujia piquiiquia quiriquiaacujua, jiyareta riya shaaca jiasano.