Jueces 10 - Arabela

Tolaa jiyanishano quishacari narta Israel pueya nequesoreena

¹ Abimeelec nuhuaji, supuetana Isacar niquiohuacuajinio caneno pueyanoori narta Israel pueya nequesoreenara quiquiaari. Nojuajaari Tolaa jiyanishano quijia. Tolaari Puua jiyanishano niyanu quiriquiase. Cuno Puuaari Dodo jiyanishano niyanu. Jiyacaritij, Tolaari narta Israel pueyacuaji tacuriquiano nojori nequesoreenara quiquiaari. Tolaari Samir jiyanishano tiacajinia quijia. Cunoori supuetana Efraiin niquiohuacuajinio caneno pueya jiya tuhuananuhuajinia tiaca.

² Nojuajaari veintitres marijia shocotejoquiaari narta Israel pueya nequesoreena na quishacari. Na nuhuaji Tolaari shaajequiaari. Samir tiacajinia jamosaaquiaariiri.

Jair jiyanishano quishacari narta Israel pueya nequesoreena

³ Cuno nuhuaji, Jair jiyanishanoori Israel pueya nequesoreena quiquiaari. Nojuajaari Galaad jiyajinijinio quiriquiase.

⁵ Jair jaara shaajequiaari, Camoon tiacajinia jamosaaquiaariiri.

Israel pueya saniitiosacari sacuaraatia nojori miiniuucua

⁶ Jiyacaritij, Israel pueyari saaja sesa miiniu coteequiaariuhua Pueyasora. Nojoriiri Pueyasojuanaa cartetuquiaari jeecojosano pueyasohua tojitiajaca nojori quiniuria. Cuno, Israel pueya panishano pueyasoori juhua Baal niquishano quijia, juhua Astartee niquishanonio. Naajuhuaj, nojoriiri nio taucuaca jiyacajiniji pueyasohua jiyanishano tojitiajaca quiquiaarijuhuaj: Siria, Sidoon, Moab, Amoon, Filisteocuaca pueyasonio. Israel pueyari naa Pueyasojuanaa cartetuquiaari pueyaso jiyanishoosequeecuaratej. Nojoriiri maja tari na catijiatunu quijia na seya Pueyasoocuara.

⁷ Pueyasoori naacua nojori juaatiaquiaari jiyanohuatej. Cunora nojori tarinitiareeri nojori paraa Filisteocuaca, Amonitacuacajuhuaj cuaara naquiya miitiaara nojori.

⁸ Naacua nojori saniiniuria quenaajatej, nojori paraa Filisteocuaca, Amoonita jiyanishanonio, nojoriiri na jiuujiayaquiniutia dieciocho marijia miitiaquiaari puetunu nooj Israel pueyajanaa Galaad jiyajinia quijiacatej. Cunoori pananu muetasamaji Jordaan moo taquijiria quiriquiase, Amorreocuaca jiyajinia.

⁹ Naajuhuaj, Israel pueya paraa Amonita jiyanishano taucuacani, nojoriiri pananu muetasamaji nijioquiaari. Jordaan moo jatatumaari pananu cariquiocora quijiaca Israel pueya na miaquejonura. Cuno Israel pueyani, nojoriiri supuetana Judaa niquiohuacuajinio caneno pueya quiriquiase, supuetana Benjamiin niquiohuacuajinio caneno pueyajuhuaj, supuetana Efraiin niquiohuacuajinio caneno pueyajaajanio. Naa na paraa nijionuucua nojoriicuatej, puetunu cuno Israel pueyajanaari jiyanohua tacaaquioquiaari, miaquejosaanu na pueretusacari.

¹⁰ Naacuatej, Israel pueyari shusha jiyacariquiya Pueyaso maseturee na naacunura nojori. Naa sequeturee Pueyasoori: “Canaa Pueyasonaa, canaa sesa quia miiriucuaani ni canaa cartenuucua quiajaniya. Canaari quia shocoterucuaani canaa secojonuunuucua tama canaa jeecojosano pueyasohuarajaaja canaa jiyatesano, nooj pueyasohua jiyosequetej.”