Josuee 6 - Arabela

Pueyaso niishitiojosacari Josuee taa Jericoo tiaca nojori tiuquitianutaniyani

¹ Jericoo tiaca tiootiuuri maninia mishiquiojosaaquiaari. Naacuatej, majaari pueya tohuareetanu quijia, majaari na tiuquiitianu quijiajuhuaj. Naa miitiuquiaariiri maja Israelcuajinio caneno pueya tiuquitianura nojoriicua, nojori na miaquejonura.

² Camarnujuanaari jiyacari naa Josuee sequereequij: —Janiyari Jericoo tiaca camarnu na soldadohuataja quia miaquejotenutaniyani.

³ Naacuatej, nio nia miiri: puetunu Israel miaquejonaa pueyajanaa cuaara camarucutaara Jericoo tiaca shocua. Niocua naa miiri seis juucatej, puetunu juucajanaa.

⁴ Naa Jericoo tiaca shocua nia camarucuneetasacaritij, quiocua Pueyaso quijia cojee patanaa tacoji pueratejore siete pueyacuara secojonaa. Nojori cuaara na pootusano borreeco nacaja jonenenuura Pueyaso quijia cojee patanaa nojori puetanuucua.

⁵ Saniniuujia, puetunu niajaniyajanaa, niaa jaara borreeco nacaja tojiri tamaatia joneneshiyano, niocua jiyacari jiyanohua na jaacatare. Nia niquishuriiria tiaca shocua matacaari jiyacari jiyajeetanutaniya tamajaaja. Niocua jiyacari ritia nocua netecuatuquee puetunu cuno tiacajinia quijiacajanaa nia puecoonura.

⁶ Josueeri jiyacari pueyacuara secojonaa rerejoteree. Naa nojori sequereeri: —Pueyaso quijia cojee nia pataare naajuhuaj siete niajaniyajinijiniocua Pueyaso quijia cojee patanaa puetasee borreeco nacajaa na jonenenuunuta.

⁷ Saniniuujia puetunu narta pueyajanaa sequereeri: —Pueyanaa, Jericoo tiaca shocua nia camarucutare. Teyano pojoritiucuaja na paraa miaquejoriquianoni, nojori cuaara Pueyaso quijia cojee patanaa puetaara.

Israel pueya tiuquitiasacari Jericoo tiaca

¹² Naacuatej, Josueeri tariquiicuaji sanequiaari, pueya jiyataqueeri. Pueyacuara secojonaari Pueyaso quijia cojee patatiuyareejuhuaj. Quiojoqueeri.

¹³ Siete pueyacuara secojonaari Pueyaso quijia cojee patanaa puetaquiaari. Na canujuucuatunutaja borreeco nacaja jonenenuuriquiaari taa nojori sequesaaquiaaricuajani. Naacuatej, nojoriiri maja quenaaja rupaquijia na tarinitianu quiquiaari jonenenu. Jiyacaritij na paraa miaquejoriquianoori jonenejonaa puetariquiaa. Nojori raquiiri Pueyaso quijia cojee patanaa nuhuajiquiaarijuhuaj. Jiyacaritij, borreeco nacaja jonenenuunaari maja quenaaja na samaatenu quiriquiaa jonenenu.

¹⁴ Naa pacutetusee tariqui Jericoo tiaca shocua camarucutanuuriuhuaj. Na nuhuaji quiojiyarohua na suhuortucuajiniaari. Nojoriiri naa puetunu juucajanaa camarucuneetaja cuno tiaca shocuatej. Naa miitiuquiaari seis juucaari.

¹⁵ Seeptimo juuca nojori juhuaquesacari saniniuujia, nojoriiri tariquiicuaji sanetaquiaari tiaca shocua pacutejonu camarucuneetanura. Cuno juuca cutara, nojoriiri siete pacutejoquiaari camarucuneetanu.

¹⁶ Jiyacaritij, pueyacuara secojonaa jaara tari jiyanohua jonenenuuquiaari Josueeri naa sequeree puetunu pueyajanaatej: —¡Jiyanohua nia jaacoonuure! Pueyasocuajaari tari nia paraa niaree nia juaashiquiajinia.

¹⁷ Nio nia niishiri cutara. Cuno tiacajinia quiniaa cuaara puecoosaaria puetunujuanaa, majaari quenaaja niquiriyatu curonu. Pueyasocuajaari naa cua sequeree pa miiniuria nojoritij. Niocua pocua taraajena Rahab jiyanoori cutara puetunu na tiaco quiniaa pueyatajanaa. Cuno paanatucuajaari nio tiaca manujunuucua pa jiyaramiquishano pueya jamojona.

²⁴ Israel pueyari naacua catijiataquiaari cuno tiaca tojetaarucuajanaa. Tiaca catijiataaquishacarijia, nojoriiri saaja nio casami saquiriojoquiaari coteenu: plata, oro, puetunu broncejiniji, hierrojiniji shipinijiosano casamijaajanio. Puetunu cuno casamijianaari Pueyasora jiyatesaaquiaari.

²⁵ Saniniuujia, Josueeri Rahab jiyanooquiaari puetunu na tiaco quiniaatajanaa. Nojuacuajaari manujunuucua Jericoo Josuee jiyaramiquishano jamojoquiaari na tiaco. Naa Rahab jiyanooshaanuucuatej, nocuajinio caneno pueyari naacua Israelcuajinio pueyata quiyaquij.