Josuee 24 - Arabela

Saaquiano Josuee nacasusacari narta Israel pueya na nuhuajiria

¹ Na shaajeyaquishacarijia, Josueeri puetunu Israelcuajinio caneno pueya rerejotequiaari Siquem jiyanishano tiacajinia. Jiyacari puetunu nojori jiyaniijianucuajanaa piiquiaari Pueyaso niquiaraari.

² Jiyacari naa sequeree puetunu tii quiniaa narta Israel pueyajanaari: —Camarnujuanaa Pueyasoori pa supuetana Israel Pueyasocuaja. Nojuajaari naa sequeyaquij pueyanaa: “Tariucuacaanu, Taree jiyanishano pueyanoori Eufrate moo casaqueyaji quijia necohuata. Cuno pojoricuaja nia supuetanaa Abraham, tarajanu Nacornio. Tii quijiaca nojori quishacari, nojoriiri tama nojori pueyasohuarajaaja nojori jiyatesano shuquiritiajaca quijia. Cuno casaari pueyano jeecojosano casaa quijia.

³ Jiyacaritij, janiyajanaari na quijia Eufrate moo casaqueyaji jiyatequiaari Abrahamni. Na nuhuaji janiyari na niyacutequiaari puetunu Canaan jiyacumajanaani. Janiyari na canijiaquiaarini, naacua neyanu Isaac mueratequiaariiri.

⁴ Isaacri naa cua miishanojuhuaj, naacua querajaa canuu mueratejonoori. Nojoriiri nio, Jacob, tarajanu Esauunio. Naacuatej, janiyari Esauu niquitioquiaari na quijiarano tuhuananuhuaraca Seir jiyanishano jiyani. Jacob saniniuujia, nojuajaari necohuata pacuquiaari Egipto jiyajinia.

⁵ Na nuhuaji, janiyari niaacua jiyaroquiaari Moiseesni, tarajanu Aaroonnio. Janiyari jiyacari puecooquiaari tojetaarucuajanaa Egipcio taucuaca jiyapueranuhuani. Janiyari naa cua miijionuta nojori jiyajiniji nia jaatiaquiaariuhuani.

⁶ Nia supuetanaa jaara quiaquiaari Egipto jiyajiniji, cuno taucuacaari nia supuetanaa nuhuajiquiaari rucuanejotajaruhua caballohua jayotasanojinia. Saa caballohuaraca pueyajaari nojori nuhuajiquiaarijuhuaj. Nia supuetanaari na miaquejosaanura naa neteyotasaaquiaaritij. Naatunacu jiyanishano caminia casaqueyaji coquesaaseequiaariiri.

⁷ Nojori niquishacari nojori paraa, na puerenuta cua masetuquiaariiri nojori cua naacunura. Janiyari ninishiquiria jiyatequiaari nia paraa nacaacumani maja nojori coquenura nia supuetanaa. Caminiaari juhua nojori miaquiaari. Puetunu nojorijianaari shushiniuuquiaari. Egipto jiyajiniaja nia quishacari, puetunu niajaniyajanaari naa cua miijiosano niquiniocuaja. “Na nuhuaji, niaari jiyanohua tarishinio cariiquia jiyajinia nia camarucuneetanuucua.

⁸ Janiyajanaari naa jacariaja nia tiuquinitiaquiaari cuno Amorreo jiyanishano taucuaca jiyajiniani. Cunoori pananu muetasamaji Jordaan moocuaraja. Cuno jiya camaruhuari juucua nia nujuatanu paniquiaari miaquejonu. Janiyari saaja nia shocotanijioquiaarinioj. Quiarijianij, niaari naacua nojori jiya camaruhua.

⁹ Jiyacarijuhuaj, Moab jiyajinijinio camarnuuri nia miaquejonuucua sanequiaari juucuajuhuaj. Nojuajaari Balac jiyanishano quijia, Zipor niyanu. Balac puerenuucua niajaniya, nojuajaari na pueya jiyaramiquiquiaari Balaam numootenuucua. Nio Balaamri Beor jiyanishano niyanu quijia. Balacri nocua jiyaroquiaari na rupaa nocua na niniuria ritia na shimiojotenura niajaniya.

¹⁰ Janiyajanaacuajaari maja cua shanacunu quiquiaari Balaam shimiojonura, na sesacanura niajaniya. Balacri juucua na shiniujiuquiaari na sesacanura niajaniya. Janiyari saaja nia maniniuhuaqueetequiaari niaacuani. Janiyari naa tacuquiaari niaacuajitij, cocuaatia nia miishacari.

¹¹ Niaari naacua Jordaan moo niuuniotej, Jericoo tiacajinia tiuquishiiri. Jiyacaritij, nio tiacacajinijinio taucuacaari juucua nia miaquejonuucua sanetaquiaari: Jericoo, Amorreo, Ferezeo, Cananeo, Hitita, Gergeseo, Heveo, Jebuseocuacanio. Janiyari saaja nia shocojotaniquiaari nojori miaquejonuni.

¹² Saniniuujia, maja cutaraari na tiacajiniji nia puecoonu quiquiaari nia mueruuta, nia cashanata noo querajaa Amorreo camarucua. Janiyari niaacuaji nojori tojetequiaarini. Jiyanohua puerenuuri nojori mashiquiquiaari, nocua nia tiuquiyaquishacarijia.

¹³ Janiyari naa nia niquitiono nia paraa jiyatej. Niaari naacua cuhuariquiaca jiitiaaquij, juhua quenaaja na pooniniojua. Niaari tiacaca jiitiaajuhuaj, juhua quenaaja na pooniniojua. Quiarijianij, niaari cuno tiacajinia quijiaca. Niaari uva, aceituna miaajuhuaj. Puetunu cuno nataacuacajanaari maja quenaaja nia natoojosano.” Pueyasoori naa quiarijia nia sequeyaquij. Josueeri socua naa sequeree puetunu Israel pueyajanaatej:

¹⁴ —Naa Pueyaso miiniuucua maninia niajaniyatej, na tojitiajaca nia quiriquia. Nioojiajinia nia paniniutia nojuaja, na panishano miijiaca nia quiriquia. Nia supuetanaa quishacarijia Eufrate moo casaqueyaji, Egipto jiyajiniajuhuaj, nojoriiri na pueyasohuara na jiyatetusanoocuara jacamatujuaca quijia. Quiarijianij, niaari naa miijiojuacajuhuaj, juhua nojorijia. Quiarijia saniniuujia, puetunu cuno sacuaraatia nia miijiosanojanaa nia tarinitiare saaja Pueyaso panishano miijiaca nia quiniuria.

¹⁵ Saniniuujia, niaa jaara Pueyaso panishano miiniu paniyaquiri, nia miiriqui tama nia panishanojaaja. Socua nia jeecaneyarequi noo pueyasohuacua teyanoocuara jacamatujuacatucuaja nia supuetanaani nojori quishacari Eufrate moo casaqueyaji. Niaa jaara cuno pueyasohua jiyanishano paniyaquiri, Amorreo taucuaca pueyasohua jiyanishano tojitiajaca nia quiriqui, niaa quiarijia na jiyajinia quiyani. Saniniuujia, janiya, cua niquiocua, puetunu cuata quiniaajanaanio, canaa cutaraari Camarnujuanaa Pueyaso tojitiajaca quiriquianoni.

¹⁶ Jiyacaritij, puetunu pueyajanaari saaja naa riucuaree Josueetej: —Pueyaso cuaara canaa shanacuyaquiiria nocuaji canaa rupatenura, tamasaca pueyasohuacuara canaa jacamatunura.

¹⁷ Canaa Pueyasojuanaacuajaari nooj, cantucuaja canaa, canaa supuetanaa jaatiaquiaari Egipto jiyajinijini, teyano jiyajinia pueyaracaanu canaa quiquiaari seyacuajani. Pueyasojuanaacuajaari canaa niquiara miijiono queraatia nocuaji jiuujiatesano casaa. Canaajanaari canaa namijiata na niquinioni. Canaa camarucuneetasacari cariiquia jiyajinia, nojuacuajaari canaa cojuaquiaari. Canaa shocojosacari queraatia canaa paraa tiacaca nio jiyajiniara canaa nishacari nucuamaji, nojuajaari jiyacari canaa cojuano canaa paraacuajijuhuaj.

¹⁸ Naajuhuaj, nojuajaari canaa paraa taanuuno canaacuaji canaa tajijiara panaatia nojori jiyacuma. Naa taanuucanu nio jiyajiniji Amorreocuaca jiyanishano taucuacajaariuhuaj, nio jiyajiniji canaa tii quiya quiarijiani. Naa tojetaarucuajanaa maninia na miiniuucua canaatej, canaari saaja na panishano miiniutianiyani. Nojuacuajaari canaa Pueyaso.

¹⁹ Josueeri jiyacari naa nojori riucuareequij: —Maja nia naata saa maninia miiniujia Pueyasora tojiyashijiacajuhuanaja nia quiniuucua. Nojuajaari Pueyasojuanaa cutara, sesa miyaquijia tojetaarucuajanaa, naseecajuhuaj. Nojuajaari maja na rejeretanu quiniutianiya nia tojiyaquishacari niaarano na sequesano, sesa nia miijiosacarijuhuaj.

²⁰ Tama niajaniyajaaja jaara Pueyaso shocotere jeecojosano pueyasohua jiyanishanoocuara, Pueyasojuanaari naacua nia saniriquiano quenaaja. Majaari tari niaacua na taraajenu quiniutianiya. Nojuajaari coteenu maninia miijiojua niajaniya niaacua na taraajesacari. Saniniuujia, niaa jaara tacaterohua taucuaca jeecojosano pueyasohuacuara nia jacamatunura, nojuajaari nia puecooriquiano.

²¹ Jiyacaritij, puetunu pueyajanaari naa Josuee riucuareequij: —¡Maja! Canaacuaja maninia miiriquianoni. Puetunu canaajanaacuajaari Pueyaso tojiriquianoni.

²² Josueeri jiyacari naacua nojori sequereequij: —Quiarijiani pueyanaa, puetunu niajaniyajanaa cuaara niyajetaaquiiria quiarijia nia sequesano. Tama niajaniyacuajaari quiarijia sequeree niaari Pueyaso tojijiaca quiniutianiyacuaja. Majaari naa nia sequesano niyajetatunu. Jiyacaritij, puetunu pueyajanaari Josuee riucuaturee: —Taaquiriirinij, canaacuaaquiniateja canaa Pueyaso tojitiajacanijiaj.

²³ Josueeri nojori sequeree: —Nia sequesano jaara seetanujuanaa quiri, tojetaarucuajanaa nia carterecuaraja jeecojosano casaa Pueyaso niti nia jiyatesanoniqui. Camarnu Pueyasoocua nia riujiuuriohua, seetanujuanaa nioojiajinia nia paniniutia nojuaja. Nojuacuajaari tariucuacaanu pa supuetana Israel Pueyaso.

²⁴ Puetunu pueyajanaari naa Josuee riucuarohuacuhuaj: —Canaacuaja canaa Pueyaso panishano miiriquianoni. Nojuaja jaara canaa sequere canaa miiniuria na panishano, canaari na sequesano miiriquiano nerani.

²⁵ Cuno juucaja Siquem tiacajiniani tee Josuee rerejotequiaari puetunu pueyajanaacuajani, Josueeri tii puetunu pueyatajanaa roojotooquiaari seetanujuanaa na miitiushocoriquiano. Naacuatej Josueeri pueya niishitiquiaari Pueyaso rootasano nojori niishiniuria.

²⁶ Josueeri puetunu cuno rootasanojanaa naajiotaquiaari nojoririano Pueyaso sequesano naajioneejiniajuhuaj. Naa na naajiotanu nuhuajitij, Josueeri puereetuuca saajia paree, Encina jiyanishano naana pajama na niareeri. Pueyaso secojojua suhuortuuri cuno naana cari nujuaratasano quiriquiase.

²⁷ Josueeri naa seequeree puetunu tii quiniaa pueyajanaatej: —Pueyanaa, naana pajama cua niasano saajiani, cunoori pocuara saquiriojotariquiano quiarijia nio juuca seetanujuanaa Pueyaso nia sequesanojiniji. Tama niajaniyacuajaari sequereecuaja niaari Pueyaso panishano miiniutianiya. Saniniuujia, niaa jaara quiarijia nia sequesano tohuateyaquiri taa nia sequereecuaja nio saajia nniquiaranij, nio saajiaari niya pojiya nia niishiniuria Pueyasoori maja nia miyanu naa nia sapojonura nojuajatej.

²⁸ Naa nojoritia na pocoojonu nuhuajitij, Josueeri puetunu nojorijianaa jiyaramiquiriohua na jiyacajiniohua.

Saaquiano Josueeri tama na jiyajiniajaaja jamosaaquiaari na shaajesacari

²⁹ Pasanaataja cuno nuhuaji, Pueyaso jiyaraajia Josueeri shaajequiaari. Josueeri Nun jiyanishano niyanu quijiacuaja. Tariucua ciento diez marijia shocotejonoori shaajequiaari.

³⁰ Jamosaaquiaariiri tama na quijia Timnat-sera jiyanishano jiyajiniajaarijia. Cunoori Efraiincuajinio caneno pueya jiyajinia, na tuhuananuhuacua. Cuno na jiyari Gaas jiyanishano tuhuananuhuajiniji pananu muetasamaji miaquetajaacuara.

³¹ Josuee quishacarijia, puetunu Israelcuajinio caneno pueyajanaari Pueyaso tojijiaca quitiujiajaara. Pueyaso tojitiujiaca quitiujiacajaaraari cuaara puequequiaarijaatijia noo saaquiapue teyonu pojoritiucuaja maninia Pueyaso miijiosano niishijiacacuajani.

Supuetana Josee nucuhua jamosacari Siquem tiacajinia

³² Egipto jiyajiniji Israelcuajinio caneno pueya quiasacari Josee nucuhua nojori patusanotej, nojoriiri cuno nucuhua jamoquiaari Siquem tiacajinia. Cuno jiya nee, Josee nucuhua tii jamosaaquiaarini, cien cumaneecaari na sami quiquiaari. Cuno jiyari supuetana Jacob masesano quiriquiase Hamor jiyanishano tahuejiniji. Nio Hamor jiyanishano tahueni, nojuajaari Siquem que quijia. Naacuatej, cuno jiya neeri Joseecuajinio caneno pueya jiya quiriquiaaquij.