Josuee 1 - Arabela

Pueyaso jiyatesacari Josuee Israel pueya puerojona na quiniuria Moisees niti

¹ Pueyaso jiyaraajia Moisees shaajenu nuhuaji, Pueyasoori Josueeta pocoojoquiaari. Josueecuajaari Nun jiyanishano niyanu quiriquiase. Moisees naacuna quijiajaariuhuaj. Pueyasoori jiyacari naa Josuee sequereequij:

² —Cua jiyaraajia Moiseescuajaari tari shaajeyarucuaa. Naacuatej, quiajaniyajanaari quiarijia quiarta Israelcuajinio caneno pueya niuutiariquiano nio Jordaan moo. Naa cuno jiyacua quia niuutiare quiarta pueyatej. Janiyacuajaari puetunu niajaniyajanaa serotanutaniya cuno jiyacani.

³ Puetunu nia tiuquitiasano jiyacajanaani, janiyari cuno jiyaca nia camaruutiriquianoni. Janiyacuajaari naa cua miishocoriquiano tariucua Moisees sequenoni.

⁴ Janiyari noo jiyaca nia niquitioriquianoni, cariiquia jiyajiniji coteyatej. Cuniquiji puetunu Liibano jiyanishano tuhuananuhuari niaaranojuhuaj. Nia jiyacaari cuno puereetuuca Eufrate jiyanishano moocua puequeeriquiano. Naacuatej niaara quiniutianiyari puetunu Hitita taucuaca jiyacajanaa. Niaarano jiyari Mediterraaneo jiyanishano shoniniacu caminiajinia puequeenutaniya.

⁵ Quia paraari quia nujuataaquiriquiano nojori quia miaquejosacari. Quiaari naa nojori miaquejoriquianojuhuanaja pueyaracaanu quia rishishacarijia. Janiyajanaari quia cojiriquianoni taa Moisees cua cojiquiaaricuaani. Majaari tamajaaja quenaaja cua cartenu quiniutianiya quiajaniya. Janiyari quiocuaji rupateyaquiriquianojuhuanani.

⁶ Tama quia cuaqueyajaaja quia cumaquiriquia. Majaari quioojia niquijiotenu. Quiaari nio jiya serotariquiano puetunu quiarta pueyajanaa. Naacuatej, nojoriiri na camaruhua quiriquiano. Janiyari naa niquitionutaniya nio jiyatej, taa tariucuacaanu nia supuetanaa cua sequequiaari niaarano cua niquitiosocoriquianocuajani.

⁷ Janiyari jiyanohua quia panitiaa tama quia cuaqueyajaaja quia cumaquiniuni, maja quioojia quia niquijiotenura. Naajuhuaj puetunu cua rupaa naajiojanaa tojijia quia quiriquia teyonu cua jiyaraajia Moisees niquitiorucuaa quiajaniyacuajani. Seetanujuanaa cuno rupaa tojijia quia quiriquia. Naacua cutaratej puetunu quia miishanojanaari maninia quiniutianiya.

⁸ Quiarano cua niquitiosano cua rupaa naajio quia caapueshiijiotariquia quia niishitiajajinia na jateenura. Naa quia miiriquia juuca, niucuajaajanio. Quiaa jaara naa miiritij, quiaari naacua cua rupaajinia naajio cua sequesano miijia quiniutianiya. Naacuatej, puetunu quia miishanojanaari maninia tohuatenutaniya quiara.

⁹ Janiyajanaacuajaari quia shiniujiyani tama quia cuaqueyajaaja quia cumaquiniuria, maja quenaaja quioojia quia niquijiotenura. Majaari puerenu. Majaari quia miiniu panishanojiniji taacanuunujuhuaj. Janiyajanaacuajaari quia Camarnu Pueyasoni. Naacuatej, janiyari tiquiyocua quia cojiriquianojuhuananij.

Israel pueya coseyacosacari na paraa jiyajinia nojori tiuquitianura

¹⁰ Jiyacaritij, Josueeri naa numootejoquiaari puetunu Israelcuajinio caneno jiyaniijianucuajanaa. Naa nojori sequequiaariiri:

¹¹ —Puetunu pueyajanaa nia numootejore cuaara coseyaconuura na jiyatasocoriquiano. Paari niiquiji tama tariqui quianutaniyani. Paari Jordaan moo jatariquianoni pa jiyarano Pueyaso niquitiosocoriquiano jiyajinia pa tiuquitianura.