Geenesis 48 - Arabela

Maninia rupaajinia Jacob sequesacari Josee niquiohua

¹ Cuno nuhuaji pasanaataja, Joseeri na queecuara numootesaaquiaari. Na queeri jiyacari tari cusosu quiriquiaa. Naacuatej, Joseeri na que niquiniuucua quiaquiaari, necohua Manasees, Efraiinnio.

² Saaquiano Jacobri numootesaaquiaari neyanu Josee tari nocua tiuquishii na niquiniuria. Naaratej, nojuajaari na maquetujiniaja samarushitiaquiaari cajitianu.

³ Jiyacari naa neyanu Josee sequereeri: —Quiyanunaa, Canaan jiyajinia cua quishacarijia cumaacaraca quijia Pueyasoori cucua muetaquiaari Luz jiyanishano tiacajiniani.

⁴ Maninia rupaajinia naa cua sequequiaariiri: “Jacobnaa, janiyari queraatiara quia muetuteriquianoni. Quia niquiohuacuajinio caneno pueyari queraatia tama nojori jiyaca camaruhua quiriquianojaaja. Naajuhuaj, janiyari nio jiya niquitioriquiano quiocuajinio caneno pueyani. Naacuatej, nio jiyari pueyaracaanu quiriquiano nojoriria.”

⁵ Quiyanunaa, nio Egipto jiyajinia quia muetusano Efraiin, Manaseesjaajanio quiocua cua tiuquiyaquishacarijia, nojoriiri tojetaarucuajanaa juhua quiquiohuaja. Nojoriiri quiria juhua Rubeenja, Simeoonjaajanio.

⁶ Nojori nuhuaji quia muetusano cutaraari quia niquiohua quiriquiano. Naa Efraiin, Manasees tapueyocuaca nojori quiniuucuatej, nojoriiri na pueranaa jiyaca camaruhua quiriquianojuhuaj.

⁷ Naajuhua, quiyanunaa, Padaan-aramjiniji cua triujiuushacariuhua, janiyari quia supuena Raquel shaajaquiaariuhua Canaan jiyajiniani. Janiyari na jamoquiaari Efrata tiacajiniara neteja nucuamajini. Cuno Efratani, cunocuajaari quiarijia Beleen tiaca.

⁸ Jiyacaritij, Jacobri neyanu Josee niquiohua niquiquii na shuriucua nujuatiuyano. Cunora naa Josee sequereeri: —¿Nio pojoriirijiataj, canapuetejanojoni?

⁹ Joseeri na que riucuaree: —Quiquiohua niquiohuaniyojua cunohuaj, cua quenaa; Pueyaso muetutesano janiya niya Egipto jiyajiniani. Na queeri jiyacari naa sequeree Joseetej: —Sanaa, miji socua cucua quia cateconutere muerasu. Janiyajanaa maninia rupaajinia nojori sequenutaniyani.

¹⁰ Jacobri tojetaarucuajanaa tariucua jiyanohua saaquiano quiriquiaa. Naacuatej, majaari tari maninia na niquiniu quijia. Joseeri jiyacari necohua cateconuteree nojori jiyasoocua. Jacobri na jiuhua nujuunuqueree, nojori cacanuureejaariuhuaj.

¹¹ Na nuhuaji, naa neyanu Josee sequereeri: —Quiyanunaa, tama janiyajaarijia jiyaniriquiaani maja naasucua socua cua niquiniu quiniutianiya quiajaniya. Saniniuujia, Pueyasoori cucua jiyanooriini quiarijia cua niquiniuria cua jiuhua niquiohua.

¹² Jiyacaritij, Joseeri na que mojocuajiniji rupareeree necohua. Naa na miiniu nuhuajitij, Joseeri jiyocua jacamaree. Na jiniji rupueteree jiyocuaari.

¹³ Naa Josee miiniu nuhuajitij, neyanu Efraiin quiaree na miaquetajataari. Neyanu Manasees quiaree na muenecatajaariuhuaj. Naa necohua cateconuteree nojori jiyasoocuaari. Naacuatej, Efraiinri na jiyaso Jacob muenecara mojoquetariquiaa, Manasees saniniuujia na miaquetajara.

¹⁴ Saniniuujia, saaquiano Jacob niojosacari na juaashiquia na jiuhua nacaacua, na numatucua niyacuretaree saajaari. Naacuatej, na miaquetajaari Efraiin nacaacua quiriquiaa. Naajaa Efraiinri juucua tarajanu nuhuajishana. Saniniuujia, na muenecaari Manasees nacaacua quiriquiaacujua. Manaseescuajaari jiyapueranu quiriquiaa juucua.

¹⁵ Jiyacaritij, Jacobri naa maninia rupaajinia Josee niquiohua sequeree Josee niquiohua nojori quiniuucua: —Cua jiyaso Abraham tojishano Pueyaso, cua que Isaac tojishano Pueyasojuhuaj, noo Pueyaso, teyonutucuaja pueyaracaanu cua cojuaquiaari cua rasaanujinijini,

¹⁶ naajuhuaj teyano Pueyasotucuaja cua cojuaquiaa puetunu sesa casaacuajijanaani, cuno Pueyasojua cuaara maninia miiria nio caya samijioori. Cucuajinio caneno pueya nojori quiniuucua, cua sesa cuaara pueyaracaanu jiyaniquishaaria cua seera, cua shipininio Abraham seera, cua que Isaac seerajuhuaj maja canaa sesaca rerequetesaanura. Nojori cuaara muetuura jiyanohua queraatiara. Cuaara caneera jiyanohua queraatia nojori quiniuria mijiria.

¹⁷ Majaari Josee maniniucuanu quirii na que nianuucua na juaashiquia miaquetaja neyanu Efraiin nacaacua. Joseeri jiyacari na que juaashiquia rupataree juucua Efraiin nacajiniji saniniuujia na nianura Manasees nacaacua.

¹⁸ Joseeri naa sequenuta na que juaashiquia rupareeriquiaa juucua: —¡Cua quenaa! Quiaa taa miya miya. ¡Maja naate cua quenaa! Nioori cua jiyapueranu, cua quenaa. Quia miaquetaja nocua quia niare.

¹⁹ Na queeri maja na tojiniu quirii. Saaja naa na sequereeri: —Na niishiyacuajanijia, quiyanunaa. Maja quia jiyapueranuucua tacaaniu, quiyanunaa. Nocuajinio caneno pueyacuajaari tojishano pueya quiriquianojuhuaj. Naajaa, na nuhuajishanaacuajinio caneno pueyari socua tojishano pueya quiriquiano. Naacuatej, nocuajinio caneno pueya canenuucua jiyanohua, nojoriiri queraatia pueyapue quiriquiano.

²⁰ Cuno juucajani, Jacobri naa sequequiaari maninia rupaajinia na jiuhuatej: —Puetunu cua niquiohuacuajinio caneno pueyajanaani, nojoriiri nia sesaca jiyaniquiriquiano maninia rupaajinia nojori sequesacari tamasaca. Cua tojitiuri, nojoriiri naa sequeturiquianotej: “Pueyaso cuaara maninia miiria niajaniya taa maninia na miiquiaari Efraiincuaj, Manaseesjaajanio.” Naacuatej, Israelri Efraiin jiyatequiaari juhua na que jiyapueranura, maja Manasees.

²¹ Na nuhuaji, Israelri naa neyanu Josee sequequiaaritij: —Cua tojiri quiyanunaa. Janiyari shaajeriquianoni. Pueyaso cutaraari nia jiitiariquiano pueyaracaanu. Nojuajaari pa supuetanaa jiyacua nia riujiuutiriquianohua nio jiyajiniji.

²² Nio quia niishirijuhuaj quiyanunaa. Janiyari socua queraatia quia niquitioree quia tapueyocuacajinijini. Quiarijianij, janiyari Siquem tiaca quia niquitioyani. Cuno tiacacuajaari Amorreo taucuaca cua jaariutiasano nojori cua miaquenuucua.