Geenesis 32 - Arabela

Jacob rucuanejosacari na jiyajiniohua

⁷ Naa Jacob tojishacaritij, jiyanohua puerereeri. Niishiriojoriquiaajaariuhuaj taa na miiniutianiyani. Naacuatej, nojuajaari querajaa maanura na pueya raquiriojotaree, na seyajuhuaj. Cuno querajaa maanujinia na raquiriatasano seyani, cunoori nio quiriquiaa: borreecohua, juyaca, camellohuanio.

⁸ Nojuajaari naa miiriiquij naa na niishiriojosacari: “Cua tarajanu Esauu jaara canaa miaquejonu paniri, nojuaja cojetasacari puecoonu puetaano maanu, na nuhuaji quiaano maanuri jiyacarijia na naata mashiniu.”

⁹ Naa na niishiriojonu nuhuajitij, Jacobri naa Pueyaso sequereequij: —Cua jiyaso Abraham, cua que Isaac jiyano Pueyasonaa, quiaacuajaari cua sequerucuaa juhuajaniya cua tacatenuhuara cua que shuriquiohua.

¹⁰ Pueyasonaa, ¿Janiyatee maninia miijia quiarani? Naajaa, quiaari tojetaarucuajanaa capora. Naa capora quia quiniuucuatej, quiaari maninia cua miiriucuaa pueyaracaanu shuquiriaatia cua quiniuria. Quia niquishuriiriaj. Cua que shuriucuaji cua mashishacari cua tarajanu Esauucuaji, janiyari nio Jordaan moo jatamaquiaari saa cua natacaniyojuatajani, casaaju tojetaarucuajanaa. Quiarijia saniniuujia, janiyari cua raja tiacajiniohua tacatehuani querajaa puereetuuca maapueta.

¹¹ Quiarijia cua cojuare quenaaja cua tarajanu Esauucuaji. Janiyari cua tarajanu puereyani nojuaja mariqui cucua niyareeri na puecoonura cua niquiocohua, quiquiohuajaajanio.

¹² Pueyasonaa, quiaacuajaari maatia cua sequecanu, quiaari maninia cua cojuanutaniya. Naa maninia quia miiniuucua quiriatej, quiaari cua niquiohuacuajinio caneno pueya canijianutaniya jiyanohua queraatiara, juhua shoniniacu caminia shuriuquioco paaquiojua jaaquiaja serojosoo.

¹³ Jacobri cuniquijia jiyojetaquiaari maquenu tee cuniqui na suhuortucuajinia nojori quiriquiaacuajani. Nojuajaari nio na seesano casaajinijinio saquiriojoquiaari, tarajanu Esauu na panajotajara:

¹⁴ dosciento cabra, veinte chivo, dosciento borreeco, veinte carnero,

¹⁵ treinta shusha roonu camellohua puetunu necohuatajanaa. Quiooreejaariuhuaj, cuarenta vaca, diez vaca shusha mashiquiori. Quiooreejaariuhuaj veinte asno maajipohua, diez asno canuunio.

¹⁶ Naa na saquiriojonu nuhuaji tarajanurano na seyajinijiniotej, puetunu cuno na saquiriojosano seya maapuejanaa jiyaramiquitiaree nera poonijionaa pueyari. Na saquiriojosano seyari naa raquiriojotasaaree queraatia maanujinia, maja nojori quiojonura jatiqui puetunujuanaa. Jacobri nera poonijionaa pueya sequeree naatej: —Cua puetatiuyarecuaa. Janiya nia nuhuajiyajuhuaj. Niocua maninia tucuaqui quiasee, maja jatiqui.

¹⁷ Jacobri coteenu na seya maanu cojuariquiano jiyarotaree nera poonijionaa pueya. Naa coteenu na rootareeri: —Cua tarajanu Esauu jaara quia naacure, jaara quia nequesotare ¿teyano pueyanorano poonijionatej quiajaniyani, tee quia quiaani, canaranote cuno seyani quiaa na jiyataani?,

¹⁸ quiocua naa riucuare cua tarajanutej: “Cua camarnu Esauunaa, puetunu nio seyajanaari quiarano, quiara poonijiona Jacob jiyarosano. Nojuajaari cumaji canaa nuhuaji niyajuhuaj.”

¹⁹ Jacobri naa rootaree socua tamonu nera poonijiona pueyanotej, teyanotucuaja socua tamonu na seya maanu jiyatariquiano quiriquiaani. Tamasaca nera poonijionaa rootaree naajaariuhuaj. Jacobri naa rootaree puetunu na seya maanu jiyatariquiano pueyajanaa. Naa nojori sequereeri: —Naa nucoco nia naacunujusacari cua tarajanutej, puetunu niajaniyajanaacua saaja naa na riuhuaneretej, taa cua sequeree niajaniyacuajani.

²⁰ Niocua naa na sequerejuhuaj: “Quia jiyaraajia Jacobri cumaji canaa nuhuaji niyajuhuaj.” Jacobri naa niishiriojoriquiaa noojiajiniatej: “Janiyari cua tarajanu juaaquiaca maquishajanutaniyani janiya jaara nocua cua tiuquiyaquishacarijia cua seyajinijinio tiuquitiri nocuani. Cua niquitiosano nuhuaji janiyajanaari nocua tiuquiniutianiyani. Naa cua seyajinijinio cua niquitionuucua nojuajatej, cua tarajanuuri maninia cua naacunutaniyani.”

²¹ Jacobri naa pueratequiaari nera poonijionaa pueya tarajanuucuatej. Na nuhuaji nojuajaari tiijia maquequiaarijaara na suhuortucuajiniani.

Jacob quiaquetoosacari Pueyasojuanaata

²² Cuno niucuajanij, Jacobri sanequiaari. Querajaa necocohua niuutirii Jaboc moo jatajaari. Necocohuara pueraquenaa querajaa maajipohua niojoree moo taquijiriajaariuhuaj, na jiitiasano once necohuajaajanio.

²³ Jacobri puetunu na jiitiasano casaajanaa niuutijioquiaarijuhuaj.

²⁴ Jacob jaara jateequiaari tamajaaja nojori quiojosaquiji, nocua muetaquiaariiri tamonu pueyano. Cuno pueyanoori Jacobta juhuaquequiaari quiaquetoonuucua.

²⁵ Jacob quiaqueyano pueyano jaara niishiquiaari nojuajaari maja na naata shocotanu quiaquenu, nojuajaari jiyacari Jacob jianucu pirii. Pacuretaqueeri.

²⁶ Jiyacaritij Jacob quiaqueyano pueyanoori naa sequeree Jacobtej: —Tariucuaja, cua cartere. Paa tari juhuaquemaani. Jacobri saaja naa na riucuareequij: —Quiaa jaara quiarijiaja maninia rupaajinia cucuara maseyaquiri Pueyaso, janiyari quia carteyaquiniutianiyani.

²⁷ Cuno pueyanoori Jacob nequesotaree: —¿Taate quia sesani? Nojuaja na riucuaree: —Cua sesa Jacob.

²⁸ Cuno pueyanoori Jacob sequeree: —Quiarijiajiniji quia sesaari saniniuujia quiniutianiya Israel, maja tari Jacob. Quiaari Pueyasojuanaa quiaqueree. Naajuhuaj, quiaa jaara quiarta pueyano quiaquerejuhuaj quiaari saaja shocotaquiaa. Cunora quia sesaari Israel.

²⁹ Jiyacaritij, Jacobri saniniuujia cuno pueyano nequesotareecujua: —Cua sequereja taate quia sesanijia. Cuno pueyanoori naa riucuaree Jacobtej: —¿Casaara quia niishiniu paniya cua sesaarinij? Cuno pueyanoori tiijia maninia rupaajinia Pueyaso maseree Jacobcuara.

³⁰ Jacobri noojiajinia sequequiaari: “Janiyajanaari Pueyaso niquirii catecaji jiyareta na jiquioconi. Naajaa majaari cua cusonuni. Saminio quiyajaanijia.” Cunora na quiaquetoosaqui jiyaniquiquiaari Penuel.

³¹ Jacobri na jiyaniquishano Penueljiniji quiaquiaari tariucua pananu muetasacari. Na jianucu pacuretanuucua, nojuajaari jacariaja shipiiniuquiriquiaa.

³² Quiarijiaja Israelcuajinio caneno pueyari maja na miaquenujua jianucujiniji cusoru, pacuutiajajiniji quijia cusoru. Cunoori Pueyasojuanaa piniuucua Jacob jianucu. [Esauu coquetoosacari tarajanu Jacobta, Esauuri na jiyanooquiaari. Na nuhuaji Esauuri Jacobcuaji rupatequiaari tama na jiyajiniajaaja na quiniuhuara. Cuno na jiyari Edom jiyaniquishano quijia. Jacobri saniniuujia Canaan jiyajinia pacuquiaari.]