Geenesis 21 - Arabela

Isaac rasacari

¹ Naajuhuaj, majaari Pueyaso niyajetanu quiquiaari seetanujuanaa na sequesano Sara. Nojuajanaari na cumaquiquiaari na manajenura taa na sequequiaaricuajano.

² Naacuatej, Saraari manajequiaari. Neyacara raquiaari neyanuuri tariucua jiyanohua saaquiano Abraham quishacari. Mueyari naa rasaaquiaari seetanu jiyacarijianaatej taa Pueyaso sequequiaari na rasanuracuajani.

³ Abrahamri nera necocua Sara muetusano jiyaniquiquiaari Isaac.

⁴ Abrahamri neyanu sapiquianacoocua jiyataquiaari ocho juuca na rasaanu nuhuaji. Pueyasojuanaacuajaari naa sequequiaari nojori miiniuria pueyaracaanutej.

⁵ Neyanu Isaac jaara rasaaquiaaritij, Abrahamri jiyacari tariucua cien marijia shocotejonu quiriquiaa.

⁶ Saraari naa tama niishiriojoreejaacujua. Cunora naa sequereeri: “Pueyasoori cua puenucuareeni, janiyari cunora sorequejiyani. Pueya jaara cucuaji tojiniuuri, nojoriiri cua cojitiniutianiya cua timiniutia cua sorequejosacari. Naa nojori niishiriojosacari, ‘¿casaateeri motajaacua shipiniyariquiohua mueyaniuhuaj?’

⁷ Majaari quenaaja niquiriyatu pueyano jiyaniniu quiquiaari motajaari na naata neyacara muetunu. Quiarijiani, janiyari cua niyacara raree neyanuni, naajaa nojuajaari tariucua jiyanohua saaquiano.”

Abraham taanuusacari Agar neyanu Ismaeltaja

⁸ Isaacri maashiquiaari, shipiyatasaareeri. Na shipiyatesacari, saaquiano Abrahamri neyanu shipiyatasaanu queranacutaquiaari.

⁹ Naa nojori queranacutasacari mueya shipiyatanutej, Saraari jiyacari niquirii nera pueraquena niyanuuri neyanuniyojua macaatiriquiaa, na rerequeteriquiaajaariuhuaj.

¹⁰ Nojuajaari cunora naa neyaca Abraham sequeree: —Quiria pueraquena Agar cuaara niiquiji quiaara neyanutaja. Maja cutaraari cua paniniu quiyany Isaac raquiriatanura puetunu pa jiitiasano casamijianaa cuno seru niyanuta.

¹¹ Naa Abraham tojishacari necocua sequesano nojuajatej, jiyanohua taraajeree neyanu Ismaelcuaari Ismael quiniuucua neyanujuhuaj.

¹² Pueyasoori jiyacari naa Abraham sequereequij: —Majaari mashajaacua taraajenu quia seruucuajaajanio. Puetunu quia niquiocua Sara sequesanojuanaa quia miiri. Quia niyanu Isaaccuajinio caneriquianoori quia pueyapuerano.

¹³ Quia seru niyanu saniniuujia, janiyari nocuaji caneno pueya canijiariquiano jiyanohua queraatia pueyarajuhuaj. Nojoriiri niquiriyatu jiyanohua puereetuuca jiya camarucua quiriquiano. Janiyari naa na miiriquianoni, quia niyanu na quiniuucuajuhuaj.