Geenesis 19 - Arabela

Sodoma Gomorra tiacaca catijiasacari

¹⁵ Tari na juhuaquesacari, Pueyaso seyari naa Lot sequereequij: —¡Taa quia miyani! ¡Quia secoore sacaj! Quiaa jaara cusonu paniyaquiri nio tiacajinia quiniaa pueyataja nojori canaa catijiatasacari, ritia nio tiacajiniji quia mashiquiri quia niquiocua, cuno querajaa quia niyatujaajanio.

¹⁶ Casaacuaquitijia Lot tarishiriquiaajaj. Pueyaso taraajenuucua nocua, seyari socua na numatucuajiniji nojori tuhuaqueneteree. Tiacajiniji cuno pojori tohuatejoreeri. Nojoriiri quiriquiaa Lot, necocua, querajaa necohua niyacoojorijaajanio.

¹⁷ Nojori jaara tari tiaca carijiniacuma quiriquiaa, niquiriyatu Pueyaso serujinijinioori naa nojori sequereequij: —¡Ritia nia netecuatiuyare! ¡Nia mashiri! Majaari nia nijiniara nia niquiniu paniniu. Niocua puetunujuanaa netecuatiuyare. Niaari nooj tuhuananuucua tacataseequij tucuacaanu niaacuaji niquishiyatej. Janiyacuaja tari nia sequereeni. Majaari nio jiya jamatujinia samaatenu paniniu niaa jaara cureenu paniri.

²⁴ Jiyacaritij, Pueyasoori Sodoma Gomorra tiacajinia mani tinirii. Pueyasoori juhua maru nitirii mani jiya cajiniocuaji, azufrejaajanio.

²⁵ Naa catijiatasaaquiaariiri cuno querajaa tiacaca puetunu cuno jamatujinia quijia pueyapuejanaajuhuaj. Puetunu cuno jamatujinia moritiaja casaajanaari catequiaarijuhuaj.

²⁶ Lot niquiocua saniniuujia, neyaca necojori nuhuaji neteyanoquiiri na nijiniara tacateseecuara. Na cuaqueyari tiijia shoniria jataquee.

²⁷ Tariqui saniniuujia, Abrahamri Pueyasota na pocoojosaqui quiamaa.

²⁸ Tiji niquishii Sodoma Gomorra tiaca quijia caco juucuaari. Saaja najaca niquirii cuno jamatujiniji tacaanoori, juhua puereetuuca cuhuariquia cateyano najacaja.

²⁹ Pueyasoori naa shaajaquiaari cuno jamatujinia quijia tiacacatej, tee cuniquiria Lot pacuquiaari tii na quiniuriacuajani. Pueyasoori maja na niyajetanu quiquiaari cutara Abraham masesano na raaquiaacuara. Naacuatej Lot mashiquiquiaariiri maja cuno sesa miijiacata na cojiritiasaanura catijianu.