Geenesis 15 - Arabela

Seetanujuanaa Pueyaso sequesacari Abram

¹ Na nuhuaji, Pueyasoori Abramcua muetaquiaari na maquenujinia. Naa Abram sequequiaariiri: —Abramnaa, maja puerenu. Janiyacuajaari quiocuaji tacunani, quia cojuanajuhuaj. Cucua quia tiuuniuucua, janiyari jiyanohua maninia miiniutianiya quiarani.

² Abramri Pueyaso riucuaree: —Cua Pueyasonaa, ¿Casaatejaara cunoni quiaa cua niquitionu paniya shuquiriaatia cua quiniuriani? Najuhuana naasucuani.

³ Quiaacuajaari niishiya, janiyari tojetaarucuajanaa juhuasuni. Naa quenaaja quia niquitioyaquiniuucua niquiriyatu mueya janiyatej, janiya jaara shaajeyariquiani, puetunu cua casami camaru quiriquianoori Eliezer. Nojuacuajaari cua seru, Damasco tiacajinijinio.

⁴ Pueyasoori saaja naa Abram riucuareequij: —Quia shaajenu nuhuaji, quia casami camaru quiriquianonij, nojuajaari quia niyanujuanaa quiriquiano, maja tamonu.

⁵ Pueyasoori Abram canujuteree na suhuortujiniaacoji carijiniacuma. Naa na sequereeri: —Maninia quia shootiare jiya cajiniocua. Riya quia serojore, jaara quia naata quiri. Abramnaa, quiocuajinio caneriquiano pueyapueeri naa quiriquianotej.

⁶ Abramri maja na cuaracashitiniu quirii Pueyaso sequesano. Naacuatej Pueyasoori jiyacarijia Abram jiyateree tojetaarucuajanaa juhua sesa miyaquijia pueyanora.

¹³ Pueyasoori naa sequeree Abramjuhuaj: —Nio quia niishiriquia pueyaracaanu. Quiocuajinio caneriquiano pueyari taucuaca jiyajinia quiriquiano seya nojori quishacari. Naa cuno jiyajinia nojori quishacaritij, cuno taucuacaari naquiya miitiariquiano nojori na poonijiotesaanuucua. Naa naquiya cuno taucuaca jiyajinia nojori miishacaritij, tii cuatro ciento marijia shocotejoturiquianoori.

¹⁴ Janiyari saniniuujia cuno taucuaca namiriquiano nojoriicuani, puera nojori miitiasaanuucua. Quiocuajinio caneno pueyari jiyanohua queraatia casamiriaca juhuajaniya quiojoriquianohua cuno taucuaca jiyajiniji.

¹⁵ Quiajaniya saniniuujia, Abramnaa, quiaari juhuajaniya shaajeriquianoojua tariucua saaquianoquia. Quiaari naa juhuajaniya coqueriquiano quia supuetanaatej.

¹⁶ Quiocuajinio caneno pueyari juhuanojuaja senota maja na pacunu quiniutianiya nio jiyajinia. Cuatrociento marijia nuhuaji, nojoriiri shusha nio jiya camaruhua quiniutianiya. Cuaara, cuaara, Amorreo jiyanishano taucuaca sesa miiniu cuaara jiyacateerajaara socua, cua saniitionura nojori. Janiyari saniniuujia quiocuajinio caneno pueya niquitionutaniya cuno taucuaca jiya nojoririani.