Geenesis 13 - Arabela

Lot rupatesacari Abramcuaji

¹ Abraham jaara tacatequiaariuhua Egipto jiyajiniji Neegueb jiyajiniohua, puetunu na jiitiasano casaajanaa tacaretaquiaariuhuari necojaajanio. Na raaquia Lotri nojoritia quiriquiaajuhua.

² Abramri jiyanohua casamiriaca quijia. Nojuajaari jiyanohua queraatia oro jiitiaja, platajaajanio. Queraatia seyaraca quijiajaariuhuaj.

³ Neegueb jiyajiniji Abramri socua pacuquiaari Betel tiacajiniara.

¹² Abramri Canaan jiya tuhuananuhuajiniaja jateequiaari quiniu. Lot saniniuujia, nojuajaari cuno tuhuananuhua jamatujinia quijia tiacajinia pacuquiaari tii na quiniuria. Cuno tiacacaari Sodoma tiaca shuriucua quijia.

¹³ Cuno Sodoma tiacajinia quiniaa pueyani, nojoriiri jiyanohua sacuaraatia miijiaca quijia. Pueyasora.

¹⁴ Lot rupatenu nuhuaji na que parajanu Abramcuaji, Pueyasoori jiyacari naa Abram sequequiaaritij: —Quia quijia tuhuananujiniji quia niquinijiore nio jiya. Maninia quia niquinijiore pananu tiuquishacora, pananu muetasamajinio. Naajuhuaj, maninia quia niquinijiore pananu muetasamaji miaquetajara na muenecaranio.

¹⁵ Janiyari puetunu cuno jiyajanaa quia niquitionutaniyani. Cuno jiyari quiara quiriquiano pueyaracaanura. Quiocuajinio caneriquiano pueyapuerano quiriquianojaariuhuaj.

¹⁶ Janiyari quiocuajinio caneriquiano pueya cantenutaniyani jiyanohua queraatia nojori quiniuria, serojosoo juhua jiyojuaja. ¿Jiyojuatee serojosanocuaa? Naa quiriquianoori quiocuajinio caneriquiano pueya.

¹⁷ Naacuatej quia sanere, jiyareta quia neteyocuare puetunu nio jiyajanaa, na tucuanee, na queraquejuhuaj. Janiyacuajaari na niquitionutaniya quiajaniyani.

¹⁸ Abramri na suhuortu tutojoquiaari. Quiaqueeri. Mamre jiyanishano pueyano nacuhuajinia quishiiri. Hebroon tiacaari cateca quijia cuniquiji. Nojuajaari tii sai paatiquiaari maninia Pueyaso sequesano na niishiniuria pueyaracaanu.