Exodo 5 - Arabela

Moisees Aaroon pocoojosacari Faraoonta

¹ Na nuhuaji, Moiseesri tarajanu Aaroonta camarnu Faraooncua tiuquitiaquiaari. Naa na sequetuseeri: —Canaa supuetana Israelcuajinio caneno pueya Pueyasoori naa canaa sequeree quiaratej: “Quiria cua pueya quia cartere nojori cuaara cariiquia jiyajinia quiaara. Nojori cuaara tii queranacuura cua niquiara, naa nojori timitianura janiyatej.”

² Faraoonri saaja naa nojori riucuareequij: —¿Cantejaara nia Pueyasoni, niaa na sequeyaniqui? ¿Taa nia jiyaniyari, janiyateeri na sequesano tojiniutianiyani Israelcuajinio caneno pueya cua cartenuraniqui? ¡Moseeca, shij! Majaari cua niishiniu cuno, nia jiyanishano Pueyasoniqui. Tuma cartesocoriquiano jiyani nio Israelcuajinio caneno pueya.

³ Moiseesri tarajanu Aaroonta naa Faraoon sequetureequij: —Canaa Hebreo pueya Pueyasoori canaacua muetarucuaani. Naacuatej, canaari quiarijia paniyani cuarta pueya canaara quia cartenura. Canaacua niiquiji jiuujianaraca juuca quiaare cariiquia jiyajiniani, tii nocuara canaa catijianura canaa seyajinijinio. Naa canaa miishacaritij, canaari naa maniniuhuaqueetanu paniya canaa Camarnu Pueyasoni. Canaa jaara naa miyaquirini, nojuaja mariqui canaacua tamatiuucua cusonu jiyaroreeri canaa na puecanura, naajuhuaj, mariqui canaa miaquejosaanura.

⁴ Egipto jiya camarnuuri saaja naa nojori riucuaree: —Moisees, quiajaniyajaaja Aaroonnaa, ¿casaara nia pueyajeteyariquiohuacuara pueya poonijiyanoni? Nia poonijioseeja.

⁵ Faraoonri naa nojori sequereejuhuaj: —Niya Egipto jiyajiniani, cuno Israelcuajinio caneno pueyani, nojoriiri jiyanohua queraraqui. ¿Niaateeri puetunu nojorijianaa tenujunu paniya maja nojori poonijionura canaara?

⁶ Cuno juucajani, camarnu Faraoonri jiyaniijianucuara na jiyatesano narta taucuaca sequequiaari, Israelcuajinio canano pueya maapue nujuanunaajaajanio:

⁷ —Quiarijiajiniji, majaari tari soreno jiyasocua niquitiojonu cuno Israelcuajinio caneno pueya marajinia nojori miniquiootasocoriquiano cumaraacuara nojori paaniacujusanoni. Tama nojorijaaja cuaara quiojoora na pajenuucua.

⁸ Niocua nojori poonijiosano niquirijia. Nojori paaniacujusano cuaara juurajashiyaquiiria. Cuaara quiiria juhua coteenu nojori paaniacusanojua, queraatiatej. Cuno pojoriiri taajecori. Poonijionu cureetatiuya jiyoteerinojoni. Cunora naa na rupaa paaretatuquiaaqui: “Pa quiojore. Pocua pa Pueyasora pa catijiasocoriquiano pa seya puecooseeni.” [Camarnu Faraoonri saaja na juaaniutia seetanujuanaa na sequesano jatanu pacutejoquiaari. Majaari na tarinitianu quirii Israelcuajinio caneno pueya quianura na jiyajiniji. Faraoon carteyaquiniuucua Israelcuajinio caneno pueya, Pueyasoori na saniitioquiaari.]