Exodo 4 - Arabela

¹⁰ Jiyacaritij Moiseesri naa Pueyaso riucuareequij: —Quiaa puera cua shiniujiyacujua, Camarnunaa. Janiyari cararaatia puera riiniuquitiuhuacasequeni. Tariucuacaanujiniji naajuhuananijia. Quiarijia quia jiyaraajiata quia pocoojosacari, naajaa, janiyari naa quiyajaani. Naacuatej, majaari cua naata pocuanuni. Janiya jaara pocuariquiani, janiyari saaja rejeyacojoquiaani.

¹¹ Naa Moisees sequesacari Pueyasotej, Pueyasoori naa na riucuaree: —Cua riucuaretoj Moiseesnaa, ¿canteja pueyanoocua shipiniquiaari na rupaani? Janiya jaara panirini cua naataari rupueejura jiyatenu pueyano, numueejurajuhuaj cariyojuarurajaajanio. Janiya jaara panirini cua naata niquijiara na jiyatenuhuajuhuaj.

¹² Quiarijia cutara quia quiaare. Janiyajanaacuajaari quia cojiriquiano quia pocuasacarini. Janiyajanaari quia sequesocoriquiano rupaa quia toriquianoni.

¹³ Jiyacaritij Moiseesri saaja mosaatia Pueyaso riucuarohuacuhuaj. Naa Pueyaso sequereeri: —¡Cua Camarnunaa, cua tojiri! Puetunu quia sequesanojuanaa janiyani, tamonu pueyano cuno quiaa seeratare juhuari.

¹⁴ Pueyasoori socua Moisees juaarii. Naa na sequereeri: —¿Canteeri noo pueyanoni Aaroon sesaanucuatej? Nojuajaari supuetana Leviicuajinio canano pueyano. ¿Nojuajateeri maja quia tarajanuni? Janiyacuajaari na niishiyani, nojuaja cutaraari maninia pocuaja. Nio quia niishiri. Quia tarajanu Aaroonri Egipto jiyajinia quia tiuquiyaquishacarijia nucuamaja quia naacunutaniya. Na coquesacariuhua, quiajaniya, nojuajaari jiyanohua quia timitianutaniya.

¹⁵ Jiyacaritij, quiocua puetunu cua sequesano quiajaniyajanaa na pohuatare. Quiocua na seeratarenoj. Quiocua maninia na niishitiojoreno maatucua taa Faraoon sequereni quia niti na pocoojosacari nata. Janiya saniniuujia, janiyajanaacuajaari quia tarajanu Aaroon quiajaniya cojiriquianoni Faraoonta nia pocoojosacari. Janiyacuajaari nia niishitiojoriquianoni taa nia miiniutianiyani.

¹⁶ Quiocua Aaroon niishitiojore maninia niarta pueyarano cua sequesano quiajaniyacuaa. Aaroon saniniuujia, nojuaja cuaara niarta pueyara na pacuura taa nojuaja quia niishitiojoree na sequesocoriquianocuajani.

¹⁷ Nio nataca quia riyarejuhuaj. Quiaari natacata quia miijiosano cuno taucuaca jiuujiatariquiano.

Madiaan jiyajiniji Moisees riujiuushacariuhua Egipto jiyajiniohuara

²⁷ Egipto jiyajinia saniniuujia, Pueyasoori jiyacari naa Aaroon sequequiaariijia: —Cariiquia jiyaaco neteja nucuaco quia quiaare. Quiaari tii naacuneetoonutaniya quia tarajanu Moiseesta. Aaroonri Egipto jiyajiniji quiaquiaari. Aaroonri tarajanu Moiseesta naacuneetoosee tuhuananuucua tee Pueyaso muetaquiaari Moiseescuacuiajaari. Aaroon coquesacari tarajanu, na nujuureeri.

²⁸ Jiyacaritij Moiseesri tarajanu Aaroon pohuataree puetunu Pueyaso sequesanojuanaa Aaroonrani, naajuhuaj taa Pueyaso cumaacata na miiniutianiya jiuujiatesano casaa Faraoon niquiarani.

²⁹ Aaroonri cuniquiji tarajanu Moisees riujiuutiaarohua Egipto jiyajiniohua. Jiyacaritij puetunu narta Israelcuajinio caneno pueyapue jiyaniijianucuajanaa rerejotetureeri.

³⁰ Aaroonri jiyacari rerejono jiyaniijianucua pohuataree puetunu Pueyaso sequesanojuanaa tarajanu Moisees. Maja narta pueya cuaracatenura nojori na pohuatasano, Pueyaso cumaacata rerejono niquiara nocuaji jiuujiatesano casaa miijioreeri taa Pueyaso sequequiaari nojuaja miiniuriacuajani.

³¹ Naacuatej, puetunu supuetana Israelcuajinio caneno pueyajanaari maja na cuaracatetunu quirii Moisees Aaroon pohuatasano nojori niquiara. Cunora naa sequetureeri: “Seetanujuanaaquiitijia, Pueyasocuajaqui naquiya pa miitiasaanu niquiquiaani.” Jiyacaritij, puetunu cuno pojorijianaari jiyocuara jacamatuquiaari Pueyaso na maniniuhuaqueetatunura.