Exodo 32 - Arabela

¹ Israel pueya niishishacari Moiseesri puera camueenujusee Sinaii tuhuananujiniji, cunora puetunu Israel pueyajanaari Aarooncua quiojoquiaari. Naa na sequetuseeri: —Aaroonnaa, canaara quia shipiniri pueyasohua pa puetaarucua. Moisees, noo canaa mashiquiquianu Egipto jiyajinijitij, nojuacuaja puera camueenujusee Sinaii tuhuananuucua. ¿Casaaquitijiaj tiji na miishiitijiaj?

² Aaroonri narta pueya riucuaree: —Niaa jaara naa paniri cua miiniuria niaaratej, nia niquiocohua, puetunu nia niquiohuajanaa mashiquiori, niyacoojorinio, nojori cuaara na numococuajiniji orojiniji nojori maniniushitiaja casaa ruporojotaara. Cuaara na paaritiatuura niya cua tacojini.

³ Naacuatej, puetunu pueyajanaari na numocojiniji jaasutacojua orojiniji nojori maniniushitiaja casaa ruporojotaquiaari. Aaroon na niquitiojotuquiaariiri.

⁴ Nojuajaari pueya na masejotaquiaari. Na nuhuaji cuno oro mohuaquiriiri. Na jiuuriaama mohuacanacu totareeri. Maninia querajajau tucuajajaura cumanetaseeri. Naa na miiniu nuhuajitij, jacaria na quejareeri. Juhua seru juunu niquiojua niquishanora na jeecaree maniniaari. Cuno pueya jaara niquiquiaari naa Aaroon quejasano casaa orojinijitij, naa sequeturee narta pueyari: —¡Israel pueyanaa, nia niquiri! Nioori pa pueyasocuaja. Nojuajaari pa mashiquiquianu Egipto jiyajiniji.

⁵ Aaroon niquishacari pueyari na shipinishano casaa timitiariquiaa, ritia juhuacuree seya na catijiajara na shipinishano casaacuaraari juhua Pueyasoocuaraja. Naa nacaree pueya na numootenuraari: —Pueyanaa, pocua tariqui queranacureni Pueyaso pa timitianura.

⁶ Naacuatej, pueyari tariquiicuaji sanetaquiaari seya na catijianura cuno shipinishano juunu niquiojuaacuara, tama nojoriicuarajaajanio Pueyaso jiyanooniuria nojori juucua. Pueyari na nuhuaji miaquenuurohua, raruureejaariuhuaj. Na nuhuaji sanetaturohua nianujunuunuucuaari.

⁷ Pueyasoori jiyacari naa sequeree Moiseestej na quishacarijia Sinaii tuhuananuucua: —Quia roseyarohua. Quia pueya, Egipto jiyajiniji quia mashiquishanotej, nojoriiri tojetaarucuajanaa sacuaraatia miiquioree. Quia niquishiishuhuaraj.

⁸ Nojoriiri ritia niyajetaree nojori cua rootasano. Janiyacuajaari nojori sequecanuni maja nojori jiyajenenura. Saaja shipinitiurii orojiniji juhua seru juunu niquiojua niquishanoori. Quiarijia juhua cucuara jacamatiuyari na timitiatunura cuno shipinishano casaa. Naajuhuaj, seya catijiatiuya juhua cucuarajaariuhuaj. Tama nojorijaarijia naa sequetoyajaacujua: “¡Israel pueyanaa, niocuajaari pa pueyaso! ¡Nojuacuajaari pa mashiquiquianu Egipto jiyajiniji!”

⁹ Pueyasoori naa sequeree Moiseesjuhuaj: —Janiyari quiarijia nio pueya niishiyani. Nojoriiri tojetaarucuajanaa jiyanohua tojiyashijiaca.

¹⁰ Quiarijia cutara, Moiseesnaa, nareja cua niquiri. Maja cua tenujunu. Puetunujuanaa nojori puecooreeraquij. Jiyanohua juayanijia. Saaja quiajaniyacua cureere. Janiyacua quiocuajinio supueno pueya canijiare jiyanohua queraatiara nojori niti cutarani.

¹¹ Moisees saniniuujia, nojuajaari na Camarnu Pueyaso panajoree juucua naa na sequenuta: —Camarnunaa, ¿casaara puera quia juaya quia pueyajaarani? Tama quiajaniyacuajaari jiyanohua quia cumaacata nojori mashiquiquianu Egipto jiyajiniji.

¹² Egipto jiyajinijinio pueyacua quia rerequetere. Naa quia sequeturucua: “Pueyasoqui naa tucuaaco cuno pojori na puecoosocoriquiano mashiquiquianu niiquiji maja quenaaja niquiriyatujua cuno pojorijinijinio rishiniuria nio jiyajinia.” Tariucuaja, maja juaaniu. Quia tarinitiare naa quia puecoonu paniniu quia pueyatej.

¹³ Quiarijiani, quia niishiriohuacuara tariucuacaanu quia sequesano Abraham, Isaac, Jacobnio. Tama quiajaniyajaarijia naa sequequiaari nojoritij: “Janiyari niaacuajinio caneno pueya canijiariquiano jiyanohua queraatiarani, juhua jiya cajiniocua riyaja. Puera jiyanohua queraatia na quiniuucua, serojiyaquishoo quiriquianoori. Puetunu nio jiyajanaani, cua sequesano cua niquitiosocoriquiano niajaniyani, janiyari nia niquitionutaniyaquinioj niaara na quiniuria pueyaracaanu.”

¹⁴ Naacuatej, Pueyasoori pueya na puecoonu paniniujiniji tariniriohua.

¹⁵ Jiyacaritij, Moiseesri Sinaii tuhuananujiniji roseyarohua. Cuno querajaa saajianeeca cacariquiaari tee cuniqui Pueyaso rupaa maroosano quiriquiaacuajani, na jiriquiaacumaji, na tamajirianio.

¹⁶ Pueyasojuanaari cuno querajaa saajianeeca quejaquiaari. Nojuajanaari cuno saajianeecaacua na rupaa marooquiaari.

¹⁷ Moisees cijinia Josueeni, nojuaja jaara tojiquiaari pueya nacoojiyano, Moisees sequereeri: —Pueyaruhua juhua na paraata na miaquetoojosacari nacoojiya suhuortucuajinia.

¹⁸ Moiseesri na riucuaree: —Cuno nojori jaaquenuununi, cunoori maja juhua nojori shocotasacari na paraa miaquejonu jaaquenuunu. Naajuhuaj cuno jaaquenuunuuri maja taraatia nojori jaaquejosano nojori paraa shocotanuucua nojori. Cua tojishanoori shuquiriaatia quishacari jaaquenuunujuhuanajaj.

¹⁹ Moisees jaara tiuquiquiaariuhua nojori suhuortucuajiniohua tee narta pueya quiriquiaacuajani, saaja cuno juhua juunu niquiojua niquishano Aaroon quejasano niquishiiri, pueya nianujuniuysnojaajanio. Naa pueya miishano na niquishacaritij, jiyanohua juaariiri. Naa na juaaniutiatej, cuno saajianeeca quejooree cuno tuhuananu pajamaari. Jiyareta jacanaura coqueseseeri.

²⁰ Jiyacarijia cuno juhua seru juunu niquishano pareeri. Manijinia na jatareeri. Na nuhuaji tariucua cateno jacanojoree cashojuaraari. Mohuacajinia cuno oro cashojua quejooreeri. Jiyacaritij, narta Israel pueya sequereeri cuaara cuno mohuacajiniji raruura puetunu pueyajanaa.

³⁰ Tariqui Moseesri naa sequequiaari cuno pueyatej: —Niaari jiyanohua sacuaraatia miiriucua Pueyaso niquiara. Naacuatej, janiyari nocua tacanutaniuhuaniuhuaj. Niaacuara saniniutianiya nojuaja masenunijia, sesa nia miiniuucua na jiyanooniuria niajaniya.

³¹ Naacuatej Moiseesri Pueyasoocua tacaquiaariuhua Sinaii tuhuananujiniji. Naa sequequiaari Pueyasoori: —Pueyari seetanujuanaa sesa miiriucuaa tama nojoririajaaja orojiniji nojori jeecatunuucua casaa quia niti.

³² Janiyari quiarijia nojoriicuara quia sequenu paniyani, Pueyasonaa: Nojori quia jiyanoori. Quiaa jaara nojori jiyanooniu paniyaquiri, cua sesa quia tuujure juhuari quia nequesoreetujiniji, cua shaajenura nojori niti.

³³ Pueyasoori saaja naa riucuaree Moiseestej: —Janiyari noo pojori sesaca tuujuriquiano cua nequesoreetujiniji cutarani, teyano pojoritiucuaja sesa cua miiquiaani na rerequetenuucua janiya.

³⁴ Quiarijiaja quia jiyataare nio pueya tee cuniquiria cua sequecanucuajani. Cua serucuajaari quia puetanutaniya. Nojori cua saniitionu juuca jaara tari tohuatere, janiyari nojori saniitioriquianocuajani sesa nojori miiniuucua.

³⁵ Naacuatej Pueyasoori pueyacua jiyaroquiaari tamaatiuucua cusonu. Cunoori quiquiaari nojori maniniuhuaqueetanuucua Aaroon shipinishano casaa juhua seru juunu niquiojua niquishano.