Exodo 14 - Arabela

Israel pueya niuutiasacari naatunacu caminia jiyanishano

¹ Jiyacaritij, Pueyasoori naa sequequiaari Moiseestej:

² —Puetunu Israelcuajinio caneno pueyajanaa quia numootere nojori cuaara riujiuutiohuara Pi-hahirotjiniohuara. Cunoori Migdol tajiniocoma Naatunacu shoniniacu caminiata. Jiyareta Baal-zefoon jiyanishano taquijiriaari. Puetunu nojorijianaa cuaara na suhuorojotaqueya toqueyata suhuoroniuyara Baal-zefoon taquijiria jiyareta Naatunacu shoniniacu caminia shuriuquiumia.

³ Naacuatej, camarnu Faraoon tojishacari niajaniyajiniji, nojuajaari naa sequenutaniyaquij: “Cuno pojori, Israelcuajinio caneno pueyaniqui, nojoriiri maja na niishiniu tee na quiojonutaniyajanojoni. Naacua cariiquia jiyajinia tashuquioojiyari.” Faraoonri naa jiyaniniutianiya.

⁴ Janiya saniniuujia, janiyajanaari juaajiara na jiyatenutaniyani. Nojuajaari naacua nia neteyotanutaniya. Jiyacaritij, janiyari cua cumaacata cua miishano na niquitiniutianiyani. Puetunu na jaatiasano na soldadohuari cua cumaacata cua miishano niquitiuriquianojuhuaj. Naa cua miiniuucuatej, puetunu Egipto jiyajinia quijiaca taucuacajanaari niishiriquiano janiyari Camarnujuanaa cutarani. Israelcuajinio caneno pueyari naacua suhuoronuuquiaari jiyareta Naatunacu shoniniacu caminia shuriuquiumia.

⁵ Jiyacaritij, camarnu Faraoonri numootesaaquiaari Israelcuajinio caneno pueyari tari mashirii. Naacuatej, camarnu Faraoon, jiyaniijianucuara na jiyatesano narta taucuacajaajanio, nojoriiri na niishiriojonu jataquiaari. Tama nojorijiaarijia naa sequetooreequij: “¿Casaara naa pa moserucuaani naa pa cartenura cuno Israelcuajinio caneno pueyaniquitij? ¿Canapuetucua quiarijia puera poonijioreni?”

⁶ Jiyacarijia ritiatej, camarnu Faraoonri nera poonijionaa seerataree ritia nojori jeenucuanura na paraa miaquejonuucua na rucuanejotajaru. Na soldadohua jiyataqueejaariuhuaj.

⁷ Faraoonri seisciento socua maniniuquiocua na jiitiasano na rucuanejotaruhuajiniji saquiriojoquiaari. Socua puetunu Egipto jiyajinia quijia rucuanejotajaruhuajanaa jiyataquiaarijaariuhuaj. Puetunu jiyaniijianucuara na jiyatesano narta taucuaca na serotaquiaariiri, tii cuno pojori neteyotanura.

⁸ Pueyasoori jiyacari Faraoon jiuujia tojeree. Na juaatiriiri Israelcuajinio caneno pueya neteyotanuucua na quiojonura. Faraoonri maja quenaaja na niishiriojonu quiriquiaa taa Pueyaso jiyateree na saquiriojosano pueya jiyanohua na cumaacata cuno Egipto jiyajinijini.

⁹ Egipto jiyajinijinio taucuacaari saaja Israelcuajinio caneno pueya neteyotanuucua quiojoquiaari. Cuno taucuacaari naa quiojoquiaari na rucuanejotaruhuajiniatej saa caballohua jayotacaja, socua pueyajaajanio saa caballohuaracaja. Israelcuajinio caneno pueya coquetuseequiaari Naatunacu shoniniacu caminia shuriuquiumiaari. Cunoori Pi-hahirot shuriucua, Baal-zefoon tacoji tee nojori quiriquiaa na suhuortucuajiniacuajani.

¹⁰ Israelcuajinio caneno pueya jaara Faraoon niquiquiaari na soldadohuata nojoriicua niyano, jiyanohua shiriiquitiuriiri. Jiyacaritij, na puerenuta Pueyaso martetureeri.

¹¹ Nojoriiri jiyacari naa sequeree Moiseestej: —¿Majateeri jamaca quiniu Egipto jiyajiniani? ¿Casaara niya cariiquia jiyajinia canaa quia jiyataarucuaacuaraaranij, niya canaa quia moquijianurani? ¿Casaara naa naquiya canaa quia miitiareecuaani? ¿Casaara canaa quia mashiquiriucuaa Egipto jiyajinijinij?

¹² Canaacuajaari cunora naa quia sequeja Egipto jiyajiniaja canaa quishacarini: “Canaa quia tarinitiare. Nareja canaa quia niquiri. Canaa poonijioreeraj naajaa nio taucuacara. Maniniacuajaari poonijiotesano pueya canaa quiniuria. Sesa cutaraari cuno, cariiquia jiyajinia moquenuununiqui.”

¹³ Moiseesri naa riucuaree pueya: —Tuma quiriquiano jiyaninioj. Cunojuanaari pa paraa nia niquiniu. ¿Niaatucua quiari naataja na pacuterohua niquiniuhuacuaraj? Nioojia nia cumaquiri. Quiarijia nia niatasureeraj taa Pueyaso miiniutianiya quiarijia pa paraani. Niojuacuajaari pa paraa tacunutaniya pocuaji. Majaari socua nia pacutenu quiniutianiya niquiniunioj.

¹⁴ Majaari najuhuana puereconu. Pueyasojuanaacuajaari pa niti pa paraa moquiniutianiya.

¹⁵ Jiyacaritij, Pueyasoori naa Moisees sequereequij: —¿Casaara nia maseya cua naacunura niajaniya? Quiarijia quia sequere Israelcuajinio caneno pueya, cuaara ritia canujuucuatuura.

¹⁶ Quiajaniya saniniuujia, shoniniacu caminia caco quia shiitiore quia nataca caminia quia raquitianura, noojiajinia joojeecaaco pueya niuuniuria caminia taquijiria.

¹⁷ Janiyari saniniuujia cuno Egipcio taucuaca juaatiniutianiya jiyanohua niaacuarani. Naacuatej nojoriiri joojuashiquio caminia jiuujiaaco nia nuhuajiniutianiya juucua. Jiyacaritij, janiyari cuno Faraoon moquiniutianiya cua cumaacata cua miishano casaatani, puetunu na soldadohuajanaa, puetunu caballohua jayotasano rucuanejotaruhuajuhuaj, puetunu nojori caballohuajanaanio.

¹⁸ Janiya jaara naa cusojuare Faraoon caminia jiuujiajinia, puetunu na pueyatajanaatej, jiyacaritij Egipto jiyajinia cureeno narta taucuacaari niishiniutianiya janiyajanaari Camarnujuanaa cutarani.

¹⁹ Jiyacaritij nojori puetaano Pueyaso, cohuaja najacajaajanio, nojoriiri pacuquiaari. Pueya paramaji nujuatuseeri.

²⁰ Naacuatej cohuaja najacaari maninia cuno querajaa pueya maanu tajiniocoma nujuatuquiaari. Egipcio taucuacara, cuno najaca nujuanoori tojetaarucuajanaa jiyanohua ninishiqui quiquiaari. Saniniuujia, Israelcuajinio caneno pueya cuhuataquiaariirijia. Naacuatej, Egipcio taucuacaari maja na naata coquenu quiquiaari Israelcuajinio caneno pueya puetunu cuno niucuajanaa.

²¹ Jiyacaritij, Moiseesri shoniniacu caminia caco shiitioree na numatu. Naacuatej pananu muetasamaji, Pueyasoori paratu piyarojoteree jiyanohua puetunu cuno niucuajanaa. Naa paratu piyarojonuucua jiyanohuatej, caminiaari raquitiiquii. Pueyasoori naa raquitiaquiaari caminiatej maninia na sacuanetanura.

²² Cuno niucuajani pueyari naacua tojetaarucuajanaa joojuashiquio niuuquiaari caminia taquijiria. Mohuacaari juhua sohuaca nujuariquiaa pueya miaquetajaacuara, nojori muenecaacuaranio.

²³ Jiyacaritij, puetunu caballohuajinia neteyotanuujua Faraoon soldadohua, puetunu caballohua jayotasano Faraoon rucuanejotaruhuajanaanio, puetunu cuno taucuacajanaari caminiajinia tiuquitiaquiaari juhua catecara. Israelcuajinio caneno pueya nuhuajitiuyareeri joojeeca caminia jiuujiaaco.

²⁴ Shusha juhuaquenu panishacari, Pueyasoori cohuaja mani najacajiniji Faraoon soldadohua niquirii. Jiyacari cuno taucuaca tojetereeri. Naacuatej tama nojorijiaarijia cushitiiquiaari.

²⁵ Pueyasoori nojori caballohua jayotasano ruhuanejotajaruhua cashacucua ruparequetereejuhuaj. Naacuatej, majaari tari socua nojori naata quiriquiaa neteyotanu Israelcuajinio caneno pueya. Naacuatej, cuno taucuacaari naa sequetureequij: “¡Nio Israelcuajinio caneno pueya pa tarinitiare neteyotanu! ¡Ritia pa riujiuuriohua! ¡Camarnu Pueyasojuanaari Israelcuajinio caneno pueyacuaji tacuya! ¡Naacuatej nojuajanaari pocua saneree!”

²⁶ Pueyasoori jiyacari naa sequeree Moiseestej: —Quia numatu quia shiitiore caminia caco. Cua raquitiasano mohuaca quia cajitiriohua cuno Egipcio taucuacaacua, naajuhuaj, puetunu caballohua jayotasano ruhuanejotajaruhuacuajuhuaj, noo pojoriicuajuhuaj saa caballohuaracajatej.

²⁷ Naaratej, Moiseesri na numatu shiitioree caminia caco. Jiyacari shusha cuhuateriquiaari. Mohuacaari jiyacari na quiquiojinia cajiquiuhua juhua juhuanoraja. Naa cuno Egipcio taucuaca riujiuushacariuhua nojori nuhuajiuhuara juucuatej, saaja mohuaca naacuturohuari. Mohuacaari juhua nojori miaquee, ¡coo! Pueyasoori naa cuno Egipcio taucuaca puecooquiaari shoniniacu caminia jiuujiajiniatej.

²⁸ Naa moo cajishacariuhua na quiquiojiniohua juhua juhuanohuarajatej, puetunu caballohua jayotasano ruhuanejotajaruhuajanaa nucuquiaariiri, naajuhuaj, puetunu saa caballohuaraca taucuacajuhuaj, puetunu soldadohuajanaanio teyonu pojoritiucuaja Israelcuajinio caneno pueya nuhuajiquiaari joojuashiquio caminia jiuujiaacocuajani. Naacuatej, majaari quenaaja niquiriyatu Faraoon soldado cureenu quiquiaari saminio.

²⁹ Israelcuajinio caneno pueya saniniuujia, puetunu nojorijianaari juhuajaniya joojuashiquio niuutiaquiaari caminia jiuujiaaco. Raquitiinio mohuaca raquiiri nojori miaquetajaacuara, nojori muenecaacuara nujuariquiaa.

³⁰ Cuno juuca, Pueyasoori naa moquiquiaari cuno Egipto jiyajinijinio taucuacatej. Naacuatej, Israelcuajinio caneno pueyari puetunu cuno caminia casacaacojuanaa niquiquiaari Egipto jiyajinijinio macunucua.

³¹ Naa nojori niquiniuucua Pueyaso miishano jiyanohua na cumaacata cuno Egipto jiyajinijinio taucuacatej, nojoriiri naacua Pueyaso maniniuhuaqueetaquiaarina puerenuta. Naacua Pueyasoocua tiuutiuriiri, na jiyaraajia Moiseescuajaajanio.