Exodo 12 - Arabela

Pueyaso jiuujiaashacari Israel pueya jiyapueranuhua

¹ Moisees, Araoon quishacarijia Egipto jiyajinia, Pueyasoori naa nojori sequequiaari:

² —Niaara, nio raca cuaara quiiria marijia coteeja raca.

³ Puetunu niarta Israelcuajinio caneno pueyajanaa naa nia numootere: “Nio racajinia nia camueenujusacari diez juucajinia, puetunu niajaniyajanaacua tama nia tiacajiniaqueyajaaja na borreeco macujuashi more nia miaquesocoriquiano. Jaara borreeco quiyaquiri, cuaara quiiria cabra macujuashi.

⁴ Saniniuujia, niajianiyajinijinio jaara puera caapiquiriyatu quiri nia tiajinia, niocua niaacua cajitijiore nia shuriucua quiniaa. Naa nia miishacaritij, niocua maninia seraatiare miaquenu nia mosano seru shu.

⁵ Cuno nia seru cuaara quiiria niquiriyatu marijia shocoteno. Cuaara quiiria caya, seru maniniutij. Jaara quiyaquiri borreeco macujuashi, cuaara quiiria cabra macujuashi.

⁶ Niocua naa nia puecoosocoriquiano nia seya nujuatejorejaara. Nio raca catorce juucajiniani, puetunu niajaniyajanaacua shusha ninishacari cuno juucara nia riuriotaca borreeco more.

⁷ Jiyacaritij, niocus nia mosano seru nanaca reratere. Niocua cunotaja nia quijia suhuortucua tohuateyaca shocua suhuanacoree noshijionu tee cuniqui nia miaquenutaniya nia serucuajani.

⁸ Niocua cuno niucuaja rariyocuaca miaquere cuno shu. Niocua na cojiritiare miaquenu piiquia jiyasocuacajuhuaj, na poreetajaaju majeetejosano panjaajanio.

⁹ Majaari majaacaja na miaquenunoj, capiquiucuajaajanio. Niocua puetunujuanaa na rariyore, na naca, na cashacucua, juutasano na marecuhuajaajanio.

¹⁰ Naacuatej niocua puetunujuanaa na miaquerenoj. Majaari quenaa na curonu tariquiria. Niocua puetunujuanaa na miaquerenoj. Secaja jaara cureere, niocua na catijiarenoj.

¹¹ Jiyacaritij, niocua tariucua pueca quiri, tariucua toqueraca, tariucua nia sapatu cushiniojaajanio. Naajuhuaj, naa nia secoonuta nia miaquesacari nia borreeco rariyocuatej, niocua nia nacatu cacareja. Naa nia miiritij Camarnu Pueyaso juuca na quiniuucua. Jiyacaricuajaari Pueyaso shocojosacari nia tiaca tohuateyaji shuquiujiutiasano nanaca.

¹² Janiyari jiyacari cuno niucuaja puetunu Egipto jiya tiacaacojanaa tajiniutianiyani. Jiyacaritij, janiyari puetunu Egipcio taucuaca niquiohua jiyapueranuhuajanaa cusojuanutaniyani, puetunu nojori seya jiyapueranuhuajaajanio. Jiyacarijuhuaj, janiyari nojori niishitiniutianiyani na pueyasohuara nojori jiyatesano casaari najuhuanaj. Janiya, Camarnujuanaaniqui, janiyajanaacuajaari na sequeyani.

¹³ “Cuno nia tia tohuateyaji nia shuquiujiutiasano nanacani, cunoori cua niishiniuria niaaqui cuno tiajinia quiya. Naa cuno niucua cua puecoosacari Egipto taucuaca jiyapueranuhuacuaatej, majaari quenaaja niquiriyatu niajaniyajinijinio cusonu quiniutianiya. Naa nia tia jiyacuaji cua niquishacari nanaca shuquiujiutiasanotej, janiyari nia shocoriquianoni.

¹⁴ Quiarijiajiniji naacuatej, niocua nio juucua niishiriquia. Majaari na niyajetatunu. Niocua nio juuca queranacuriquia Camarnujuanaa nia timitianura maninia na jiuujiaaniuucua niajaniya. Puetunu marijiarajanaa cuno juuca nia queranacuriquia nia niishiriojosacari cua shoconu niajaniya. Cuno juuca nia racatare pueyaracaanutej. Majaari na niyajetatunu. Niajaniyajinijinio caneriquiano pueya cuaara cuno juuca niishijiaca quiiriajuhuaj, nojoriicuajinio caneriquiano pueya niishishanojaajanio.”

^27-28 Jiyacaritij, puetunu Israelcuajinio caneno pueyajanaari Pueyasoocuara jacamatuquiaari Pueyaso na timitiatunuta. Na nuhuaji nojoriiri cuniquiji quiojoquiaari. Puetunujuanaa naa miitiuquiaariiri taa Pueyaso sequequiaari Moiseescuajani, tarajanu Aaroonjaajanio.

Egipcio taucuaca jiyapueranuhua cusonuusacari

²⁹ Shiyaqueya cuno niucuajani, Pueyasoori puetunu cuno Egipto taucuaca jiyapueranuhuajanaa puecooree. Faraoon quiniuucua camarnujuanaa puetunu Egipto jiyajiniajanaa, naajaa neyanu jiyapueranu cusojuareejaariuhuaj. Na puecooree nujuatejojuajinia nujuatejosano jiyapueranuhuajaariuhuaj, puetunu seya jiyapueranuhuajaajanio.

³⁰ Cuno niucua Faraoonri sanequiaari, jiyaniijianucuara na jiyatesano jiyaniijianucuajuhuaj, puetuna narta taucuacajanaanio. Jiyacaritij, quera macaaniutia sariyocuatunu sapuenuuri tojishaaquiaari puetunu cuno Egipto jiyajiniajanaa. Majaari quenaaja niquiriyatu tia cureenu quiquiaari tee tahue jiyapueranu cureequiaaricuajani. Shaaqui tojetaarucuajanaa.

³¹ Cuno niucuajani, Faraoonri Moisees, Aaroon piitiquiaari nocua nojori niniuria. Naa nojori sequereeri: —Nia quiojore, pueyanaa. Ritia nia quiojore niiquiji canaa tajinijini. Puetunu niarta Israelcuajinio caneno pueyajanaa ritia nia jiyataare cua jiyajiniji. Nia Pueyaso nia timitianura nia quiojore taa nia sequequiaacuajani.

³² Puetunu nia seyajanaa nia jiyataare, nia borreecohua, nia juyacajaajanio. Nia miiniu panishano miiniuucua nia quiojore, taa nia sequequiaacuajani. Niocua quenaaja cucuara Pueyaso maseturejuhuaj.

³³ Jiyacaritij, Egipto tiacuacaari Israelcuajinio caneno pueya secootequiaari ritia nojori quianura nojori jiyajiniji. Nojoriiri jiyaniquiaari puetunu nojorijianaa naasucua puequenutaniya.

³⁴ Jiyacarijia cuno niucuajanij, Israelcuajinio caneno pueyari na poreetajaaju cashojua nojori miniquiootasano jiuniocojotaquiaari na quiquiotaja tama na toqueyajiniajaaja. Naajaa jereyojua na pootuquiaariiri.

³⁵ Naajuhuaj, puetunu nojorijianaari naa miiquiaari taa Moisees rootaquiaari nojoricuajani. Naacuatej, Israelcuajinio caneno pueyari cuno Egipto jiyajinia taucuaca mashiniquiquiaari oro, platajiniji maniniushitiaja casami, toqueyajaajanio.

³⁶ Pueyasojuanaari cuno taucuaca tojetequiaari capora nojori quiniuria. Naacuatej, Israelcuajinio caneno pueya mashiniquishacari nojori, nojoriiri juhuajaniya na casami niquitiojoquiaari. Israelcuajinio caneno pueyari naacua shooquiaari cuno taucuaca casami.

⁴⁰ Nio Israelcuajinio caneno pueyari cuatrociento treinta marijia shocotejoquiaari Egipto jiyajinia nojori quishacari.

⁴¹ Cuno cuatrociento treinta marijia shocojosacari, cuno juucajinianij, puetunu Pueyaso saquiriojosano pueyajanaari namitia cuno juucaja quiojoquiaari cuno taucuaca jiyajiniji.