Deuteronomio 8 - Arabela

Pueyanoori rishiriquiano na tojishacari puetunu Pueyaso Rupaajanaa

¹ “Pueyanaa, quiarijia niaarano cua sequesano tojijiaca, na miijiaca nia quiriquia pueyaracaanu. Niaa jaara na tijijiaca quiri, niaari naacua juhuajaniya quijiaca quiriquianotej. Niaari naacua jiyanohua caneriquianojuhuaj. Janiya cutanaari nia shuniujiyani, tama nia cuaqueyajaaja nia cumaquiri. Niocua na jiyajiniji nia paraa miaquejore jiyareta. Pa Camarnu Pueyasocuajaari tariucuacaanu sequequiaari pa supuetanaa, nojuacuajaari cuno jiya niquitioriquiano pajaniya.

² Noo nia niishiriquia taa pa Camarnu Pueyaso camarucuneetaniquiaari pajaniya cariiquia jiyajinia pueyaracaanuni. Naa pa camarucuneetasacari pa shocojoquiaariiri cuarenta marijia. Naa nia miiquiaariiri maja nia jiyaniniuria niaari socua maninia pueya tamasacajiniji. Naa nia miiquiaarijaariuhuaj na niatanura niajaniya niaate nia sesa miiniujiniji pishiniutianiya, maja soj. Pueyasojuanaari jiyacari maninia niishiniu panijia niaate seetanujuanaa niaarano na sequesano miijiaca, tojijiaca quiniutianiya, maja soj.

³ Naajaa Pueyaso miiniuucua naquiya niajaniya cariiquia jiyajinia, tii na miaajetenuucua niajaniyajuhuaj, cuno nuhuaji, nojuajaari jiyocuacaanuji manaa jiyanishano tiniquiaari pa miaajaara pa miishocoriquiano. Cuno manaari maja quenaaja pa niishishano casaa quiniu quijia. Pa supuetanaa niishishoo quijiajaariuhuaj. Pueyanaa, cunoori nia niishiniuria nio: Pueyanoori maja na rishiniu saa miasanoocuajatej. Seetanujuanaa saminio quiniutianiya cutaraari na tojishacari puetunu Pueyaso Rupaajanaa.