Deuteronomio 6 - Arabela

Socua na pueya tojishocoriquiano Pueyaso sequesano na rupaa

¹ “Nio rupaani, nioori pa Pueyaso sequesano nia tojishocoriquiano. Nojuajaari cua seeratarucuaa cuno niaarano na sequesano rupaa cua niishitiojonura niajaniya saniniuujia. Naacuatej, niocua nio niaarano na sequesano miijiaca quishiiquia noo jiyajinia, teyano jiya camaruhuara nia quiniutianiyacuajani.

² Naa niaarano na sequesano tojitiajaca nia quiniuucuatej, niaari naacua Pueyaso jiyatenutaniya seetanujuanaa nia Pueyaso na quiniuria. Naajuhuaj, naa pueyaracaanu mijiria nia rishishacarijiatej, niaarano cua sequesano miijiaca nia quiriquia pueyaracaanu. Nio niaarano cua sequesanoni, cunoori maja saa niaaranojua. Cunoori nia niquiohuarano, puetunu nia jiuhuaranojaajanio. Niaa jaara nio cua sequesano miijiaca quiriquia, niaari naacua pueyaracaanu rishijiacara quiniutianiya.

³ Naaratej, Israel pueyanaa, niaarano cua sequesano miijiaca nia quiriquia na tojijiacajuhuaj. Niaa jaara niaarano cua sequesano miijiaca quiriquia pueyaracaanu, puetunu nia cojetasano casaajanaari maninia quiniutianiya niaara. Naajuhuaj, niaari jiyanohua caneriquiano nio niaarano Pueyaso niquitiosano jiyajinia. Cuno jiyari jiya maniniu tojetaarucuajanaa. Cuno jiyacuajaari tariucuacaanu Pueyaso sequesano nia supuetanaa na niquitiosocoriquiano niajaniya. Cuno jiyajinianij, nia nataacuacaari tojetaarucuajanaa maniniushiriquiano. Naacuatej, niaari queraatia jiitiariquiano nia miasacoriquiano nia ratusocoriquianojaajanio.

⁴ “Nio nia tojiri, Israel pueyanaa: Pa camarnu Pueyasoni, jiya nojuajaari pa camarnujuanaa cutara.

⁵ “Nia Camarnu Pueyaso nia paniri puetunu nioojiatajanaa, puetunu nia sohuanutajanaa, puetunu nia cumaacatajanaanio.

⁶ “Nio, quiarijia cua sequesano niaaranonij, cuno nia maroore jiyanohua surocoshiquiara nia niishitiajajinia maja nia niyajetanura.

⁷ Niocua niaarano cua sequesano niishitiojoriquia pueyaracaanu nia niquiohua. Niocua pueyaracaanu nojoriria caminiujiuriquia nia tiajinia nia quishacari, tiquiyocua nia rucuanejosacarinio. Naajuhuaj, nojori nia niishitiojosocoriquiano niucua maquenura nia matusacari, tariquiicuaji nia sanetasacarinio.

⁸ Nio, nia miishocoriquiano cua sequesanonij, na niishijiaca nia quiriquia pueyaracaanu, majaari na niyajetanunoj. Niocua cuno naajio cushitiariquia nia nimatuucua, nia jiniji mortasanojuhuaj na niishijiaca nia quiniuria pueyaracaanu.

⁹ Naajuhuaj, nia miishocoriquiano cua sequesanonij, cuno rupaa nia naajiotariquia nia tia moriujiucuaacua, nia tia tiootiuyacuanio.

Moisees sequesano narta Israel pueya seetanujuanaa Pueyaso tojijiaca nojori quiniuria

¹⁰ “Camarnu Pueyasoori noo jiyajinia nia tiuquinitiariquianocuaja teyano seetanujuanaa na niquitionu sequequiaari nio pojori nia supuetanaacuajani: Abraham, neyanu Isaac, na jinianu Jacobnio. Cuno niarano jiyajiniani, niaacuaji tari tii quiyari shanohua puereetuuca tiacaca. Cuno tiacacaari maja quenaaja nia poonijiosano.

¹¹ Niaarano tari tii quiyajaariuhua tiacaca mishaja casami maniniutia. Cuno casamiiri maja nia paatijiosano juhuataja tama niaaranojaaja. Tari niaacuaji quiyajaariuhuaj cuariya. Cuno cuariyari maja nia poonijiosano quenaaja. Naajuhuaj, tari niaacuaji quiyajaariuhuaj nio miasano cuhuariquiaca: uva cuhuariquiaca, olivo cuhuariquiacajuhuaj. Puetunu cunojuanaari tojetaarucuajanaa nia poonijiosoo. Naajaa, tari niaacuaji quiyacuajaari puetunu nio cua serosano casaajanaa. Niaari puetunu cunojiniji miariquiano pueyaracaanu, niaa cuaara tooquioorajaatijia.

¹² Tari shuquiriaatia nia quishacari cuno jiyajinia, majaari nia Camarnu Pueyaso niyajetatunuujua. Nojuacuajaari Egipto jiyajiniji nia jaatianocuaja, tee cuniqui naquiya nia miitiasaaquiaari pueyaracaanu nia poonijiotesaanuucuajani.

¹³ Saaja nia Camarnu Pueyaso nia timitiariquia, naajuhuaj, saa nojuaja nia tojiriquia. Nia sequesano jaara saaja cuaracashitishaariquia, saaja maatia nia sequeriquia cutara: ‘Seetanujuanaari cua sequesano. Pueyasocuajaari na niishiya.’

¹⁴ Nio nia tojirijuhuaj, majaari na niyajetatunu. Maja cutaraari Pueyaso paniniu tojetaarucuajanaa sacuaraatia nia miijionura juhua nia shocua quijiaca taucuaja. Cuno pojorini, nojoriiri juaashiquiata quejasano casaacuara jacamatujuaca juhua Pueyasoocuaraja.

¹⁵ Nia Camarnu Pueyaso nia jiitiaacuajani, nojuajaari jiyanohua soquetanu niishijia. Niaa jaara niaacuara na najiquitirinioj, nojuajaari na naata puecoonu puetunu niajaniyajanaa.

¹⁶ “Majaari niaacuara na ruutanu najiquitiniu taa nia miiquiaaricuaja Masaajinia nia quishacaricuajani.