Deuteronomio 18 - Arabela

Cante seetanujuanaa Pueyaso rupaa caminiujiuniani nojuaja cuaara tojishaariquia

¹⁵ “Pa Pueyasoori niquiriyatu pajaniyajinijinio mueratenutaniya na rupaa caminiujiuriquiano, niocua na tojirinioj.

¹⁶ Niaacuajaari nio maseno pa Pueyaso Horeb tuhuananu pajama pa quishacari. Puetunu pa maanujuanaa quishacari jatiqui niaacuajaari naa pa Pueyaso sequenotej: ‘Maja socua canaa tojiniu paniniu pa Pueyaso pocuanu. Majaari tari canaa niquiniu paniniu na manijuhuaj canaa mariqui cusonuuqueeni.’

¹⁷ Jiyaritij, Pueyasoori naa cua sequereequij: ‘Maniniacuaja cuno, cua Israel pueya sequesano.

¹⁸ Tama nojorijinijinio muetariquianoori nojoririano cua sequesano caminiujiunia pueyano juhua quiajaniyaja. Cuno pueyanoori saaja pueyarano cua sequenu panishano sequeja quiriquiano, maja tama na niishiriojosano casaajaaja.

¹⁹ Saniniuujia, canapuete pueyara cua sequesano caminiujiunia sequesano ruuretaja saajani, janiyajanaari cuno pojori nequesoreeriquianoni.

²¹ Niaa jaara tama nioojiajiniajaaja naa sequeriquiatej: “¿Cuno caminiujiushanotee seetanujuanaa Pueyasojinijini, maja soj?” Maatia nia niishiniuria nia niatanurajuhuaj, nio nia niishiri:

²² Pueyarano cua sequesano caminiujiunia sequesano jaara tohuateyaquiriquia niaara, niocua na niishiri nojuajaari na sapojonuta cua sequesano caminiujiuriquiaa. Nojuajaari naa caminiujiuriquiaa na jiyaniniuucua nojuajaari socua maninia pueyano tamasacajiniji, cua sequesano caminiujiunia na quiniuucua narta pueyara. Jaara naa miijiaca quiriquiatej, majaari na sequesano nia tojishacari puereconu.’