Daniel 5 - Arabela

Camarnu Belsasar niquishacari pueyano juaashiquia sohuacaacua naajiyano

¹ Nabucodonosor nuhuaji, Belsasarri Babilonia jiya camarnujuanaa quiquiaari. Na queranacunu panishacari, nojuajaari jiyaniijianucuarano na jiyatesano mil narta taucuaca masuuquiaari cuno na Babilonia jiyajinijiniojua. Naa nojori queranacusacaritij, Belsasaarri queraatia vino raturiquiaa na masuusano pueyata.

² Queraatia na ratunuucua tari shitiiriquiaari. Jiyacaritij, Belsasarri orojiniji platajiniji shipinijiosano ratujua casaa pooteree. Puetunu cuno ratujua casamijianaani, cunoori na que Nabucodonosor pootesano quiquiaari Pueyaso Secojojua tiacoji Jerusaleen tiacajiniji.

³ Jiyacaritij, Belsasarcua poosaaquiaariiri secacocua, querashiquia ratujua casaa Pueyaso secojojua tiajiniji poosano Jerusaleen tiacajiniji. Camarnu Belsasarri tii raturee; tiji raruureejaariuhuaj na camiyosano necocohua, na camiyosoo necocohuanio. Puetunu masujanaari tiji raruureejuhuaj.

⁴ Jiyacaritij, puetunu cuno pojorijianaari vino raruuriquiaa. Naa na raruunutaja jeecojosano na pueyasohuara na jiyatetusano timitiaturiquiaari. Cuno na pueyasohuara na jiyatetusano casapueni, cunoori nio cumueeca casaajiniji jeecojosano quiriquiaa: oro, plata, bronce, hierro, naanajinijijuhuaj, saajiajinijinio.

⁵ Camarnu sohuaca nojori tii quenaacuturiquiaani, cunoori cohuajata noshijiosano quiriquiaa. Jiyacaritij, samari noshiquioyano caaniuji niquishaareeri pueyano juaashiquia sohuacaacua naajiyano.

⁶ Naa camarnu Belsasar niquishacari sohuacaacua naajiyano juaashiquiatej, tiijiquiiri. Naa jiyanohua na shiriiquiniuucuatej, na niohuacacajiniji coteeree tetecanuuri. Puetunu na caco quiamaajanaari.

⁷ Jiyacari nacareeri. Naa na pueya sequereeri: —Miji quiria nia numootejore puetunu nio pojori cua Babilonia tiacajinijinio niishijiacajanaa: casapueraca niishijiaca, jiyanohua niishijiaca, riya serojonuucua niishijiacanio. Nojori nia numootejore cuaara miji cucua nijioora. Cuno pojori jaara nocua tiuquitiaquiaari, camarnu Belsasarri naa nojori sequereequij: —Niquiriyatu niajaniyajinijinio jaara cuno sohuacaacua naajio serojore quiria, janiyari maninia na miiniutianiyani. Naajuhuaj, cuaara quiria pohuataara casaateja cuno naajio sequeyani. Janiyari quiarijiaja naa quiria pohuatana cushiyotenutaniya naatuque neeruque naata toqueyani. Riquiajiniji jaasuretasano orojiniji shipinishano casaa cushitianishaanutaniyajaariuhuaj. Naa na miishaanu nuhuajitij, janiyari camarnura na jiyatenutaniyani jiuujianura camarucua canaa quiniuria.

⁸ Puetunu Babilonia tiacajinijinio niishijiacajanaari camarnu Belsasarcua tiuquitiaquiaari. Puetunu nojorijianaari maja na naata quiquiaari serojonu cuno naajio. Majaari na niishitiunu quiriquiaajuhuaj casaa cuno naajio sequeyani. Naacuatej, nojoriiri maja na naata caminiujiuniu quiriquiaa camarnu Belsasarra.

⁹ Camarnu Belsasarri naacua shiriiquirii socuatej. Na jiquiocoori jiyanohua tiijiquii. Jiyaniijianucuarano na jiyatesano pueyari maja na niishtiuniu quiriquiaa casaa na miitiuniutianiyacuaani.

¹⁰ Jiyacaritij, camarnu Belsasar nucuaari neyanu tojiriquiaa na tacaaniutia nacojiyano. Tii nata queranacuyano narta jiyaniijianucuaari na tacaaniutia nacooriquiaajuhuaj. Na nucuaari jiyacari nojori queranacusaqui tiuquimiaa. Naa neyanu sequereeri: —Cua camarnu cuaara pueyaracaanu jiiriataara. Maja najuhuana tacaaniu; majaari tiijiniujuhuaj.

¹¹ Puetunu quia jiitiasano jiyacajinijiniojuanaani, niquiriyatu pueyanoori jiyocuacaanu quijia sesa miyaquijia Pueyaso Sohuanu jiitiaa cutara. Tariucuacaanu camarnu quia que quishacarijia, cuno pueyanoori niishishoo casaa niishiniu maniniu quijia. Tojetaarucuajanaa jiyanohua niishijiaari juhua pa pueyasohuaja. Naajuhuaj, na niishitiajajinia pueyano niishiriojosano niishijiajaariuhuaj. Quia que Nabucodonosorri naacua cuno pueyano jiyatequiaari puetunu nio Babilonia jiyajinijinio niishijiaca jiyaniijia na quiniuria. Nojuajaari nio pojori jiyaniijia quijia: joneneya cumaacaraca quijiaca, casapueraca niishijiaca, jiyanohua niishijiaca, riya serojonuucua niishijiacanio. Quia queeri cuno pueyano jiyaniquiquiaari Beltsasartajuhuaj.

¹² Seetanujuanaari cua sequesano quiajaniya. Nojuajaari tojeeca sohuanu jiitiaa. Nocuaji jiuujiatesano tojetaarucuajanaa. Jiyanohua niishijiaari. Maquenujinia niquishano pohuatanu niishijiajaariuhuaj, maatia na niishishaanura. Tojetaarucuajanaa jiyanohua jiyajeneta niishishoo casaa niishijiajaariuhuaj. Quiarijianij, camarnu Belsasarnaa, Daniel quia numootetere cuaara quiocua niiria. Nojuacuajaari quiara pohuatanutaniya maatia cuno sohuacaacua naajiojiniji.

¹³ Janiyari naacua camarnuucua jiyatasaaquiaarini. Camarnu Belsasarri naa cua nequesotareequij: —¿Quiaatee Daniel jiyanishano, niquiriyatu noo Judiiocuacajinijinio cua shipininio Nabucodonosor na quiootequiaari Judeea jiyajinijitij?

¹⁴ Quiocuara tosaareenijia, quiaanaari Pueyaso Sohuanu jiitiaa. Quiaanaari naacua niishijia cutara. Majaari quenaaja casaa cureenu quia niishishoo. Quiaacuajaari puetunujuanaa na niishiya.

¹⁵ Nio cua Babilonia jiyajinijinio jiyanohua niishijiacaari niya quitiuriquiaa. Sohuacaacua naajio serojotunu panitiuriquiaano quiria juucua, na nuhuaji quiria na pohuatatunura casaa na sequenu paniyajanojoni. Nojoriiri maja quenaaja na niishitiuniu casaatejaara cuno naajioni.

¹⁶ Quiarijia saniniuujia, janiyari quiocuara tosaareeni. Quiaanaari maatia pohuataja cutara pueya taacanuutasano casaa. Naajuhuaj, quiaanaari tojetaarucuajanaa jiyajenetesano casaa niishijia cutara maatia quia caminiujiushocoriquiano. Quiarijiani, jaara quia naata quiri, quiria quia serojore cuno naajio. Quiocua na nuhuaji cua sequerohua casaa na sequeyajanojoni. Quiaa jaara naa miiri quiriatej, janiyari quiarijia quia cushiyotenutaniya jiyanohua naatuqueya neeruqueya toqueyani. Quiaari orojiniji shipinishano riquiajiniji jaasutaja cushitianishaanutaniyajuhuaj. Naa quia miishaanu nuhuajitij, janiyari quia jiyatenutaniya jiuujianraca camarucua pa quiniuria.

¹⁷ Janiyari jiyacari naa na riucuareequij: —Cua camarnunaa, maja tacaaniu. Quia racatare cuno nareja quia niquitiojonu panishano casamini. Naajuhuaj, tamonu quia shiiniotare cuno, quiata camarnu na quiniuriani, quia jiyaco quiriquianojuhuaj. Naajaa, janiya cutara quiara pohuatanutaniya sohuacaacua naajioni, casaa na sequeyajanojoni.

¹⁸ Cua tojiri, cua camarnu Belsasarnaa, jiyocuacaanu quijia Pueyasoori quia shipininio Nabucodonosor jiyatequiaari tojishano camarnujuanaa na quiniuria. Queraatia jiyacajinijinio pueya na tojitiquiaariiri. Jiyanohua queraatia casami na niquitioquiaarijaariuhuaj.

¹⁹ Naa cumaacaraca na quiniuucuatej, nojuajaari na jiitiasano pueyacua paaretaja na cumaaca. Tiquiyocua quijia tiacacajinijinio pueyari na jiitiasano pueya quijia. Tamonu jiyacajinijinio tama na rupaaca pocuajaca pueyari na tojitiajaca quijiacajuhuaj. Puetunu cuno jiyacajinijinio pueyajanaari na pueretujuaca quijia. Na juaashacari, nojuajaari na juaashano mojua. Saniniuujia, cana na jiyanooniu paniriquiaanijia na jiyanoojiajaariuhuaj. Naajuhuaj, tamasaca jiyateja camarucuaraari, tamasaca cararojuajaariuhuaj nojori na ruuretanuucua.

²⁰ Naa miijia na quiniuucuatej, tama nojuajaarijia na cuaqueya jiyatequiaari camarnurajanaa. Naa shocotaja na quiniuucuatej sacuaraatia sesa miijiojuara coteequiaariiri. Naa na miiniuucuatej, na cumaaca jaariutiasaaquiaariiri. Pueyari na shocotequiaari tojetaarucuajanaa. Nareja niquishano quijiaari, maja juhua camarnujua.

²¹ Narta pueya shuriucuaji taanuusaaquiaariiri. Cuhuariquiajiniara canujuquiaariiri. Noojiaari jataquiaari juhua nacujiniaacoji casaa na quiniuria. Nacujiniaacojinio burrohua cojishiiri. Jiyasocua miaquejojuaari juhua juyacaja. Jiyareta mocuashii juhuaquejojuaari shushiquia tiniuucua nocua. Naa cuhuariquiajinia quiquiaariiri tama nojuajaaja cuaara niishiquiaarijaatijia jiyocuacaanu quijia Pueyaso cutaraari camarnujuanaa. Pueyasoori cumaacaraca cutara na jiitianura puetunu pueyapuejanaa puetunu mijiria jiyacajiniajanaa. Nojuajaari camarnura jiyateja cana na jiyatenu paniya camarnuracuajani.

²² Quiarijianij, cua camarnu Belsasarnaa, quiaacuajaari naa miishano niyanu. Quiaacuajaari maninia niishiya naa quia shipininio miishaanujinijitij. Quiaari jiyareta na nuhuaji neteree, quenaatucuajaraj nojuacuajatej. Quiaari tama quia cuaqueyajaaja jiyaterucuaa camarnurajanaa.

²³ Quiaari jiyocuacaanu quijia Camarnujuanaa rerequeteree quiarijia nio quia miishanota. Quiaari Pueyaso Secojojua tiajiniji tariucuacaanu poosano ratutaja secacocua querashiquia casaa pooteree niyara nia queranacusaquiriani. Quiaari tii raturee vino. Quiaari tii raatojoree quia masujuhuaj. Cuno, naa nia queranacununiquitij, cunoori nia pueyasohuara nia jiyatesano nia maniniuhuaqueetanura. Cunoori nio cumueeca casaajiniji jeecojosano casami: oro, plata, bronce, hierro, naana, saajianio. Cuno nia pueyasohuara nia jiyatesanoni, namijiaraca juucuacuajaari, majaari na niquiniu. Numaaracajaariuhuaj, majaari na tojiniu. Tojetaarucuajanaa niishiyashijiacaari. Saniniuujia cua camarnu Belsasarnaa, majaari noo Pueyasojuanaa quia timitianu quenaajaaja teyonu juaashiquiajinia quia quiyacuajani. Nojuacuajaari pa cumaquijia pa miiniuria puetunu pa miiniu panishanojuanaa.

²⁴ Cua Pueyasoori naacua jiyaroree cuno juaashiquiatej, quiara na naajionura nio:

²⁵ MENE, MENE, TEKEL PARSIN.

²⁶ MENE: Nioori naa sequeyaquij: Pueyasoori tari serojoreecuaja taa juuca quia camueenutaniyajaarani quia quishacarijia. Tari sequereejaariuhuaj, taacari naa camarnu quia quiniu puequenutaniyani.

²⁷ TEKEL: Nioori naa sequeyaquij cua camarnunaa: Quia niiquiaari tari shanacusaaree Pueyaso niiquia shanacutarujinia. ¿Casaara namacatequia? Quiaaquiiri najuhuanajuhuanajaj.

²⁸ PASIN: Nioori naa sequeyaquij cua camarnunaa: Puetunu quia jiitiasano jiyacajanaari tari raquiriatasaaree quiara. Quia jiya raquiiri Asia jiyajinijinio tamasaca taucuaca niquitiosaanutaniya. Cuno pojoriiri Medo Persa jiyanishano.

²⁹ Jiyacaritij, camarnu Belsasarri na pueya sequeree janiya cuaara naatuqueya neeruqueya toqueya cushiyotesaaria. Naajuhuaj, cuaara orojiniji shipinishano cua riquiajiniji jaasutariquiano cushitianishaariajuhuaj. Camarnu Belsasarri jiyacari puetunu pueyajanaa numootejoreejuhuaj, janiya narta camarnujaajanio.

³⁰ Cuno Babilonia tiacajinijinio camarnu Belsasarni, nojuajaari cuno niucuaja mosaaquiaari.

³¹ Saniniuujia, Media jiyajinijinio Dariio jiyanishanoori camarnura quiquiaari na niti. Jiyacaritij, Dariiori tariucua sesenta y dos marijia shocotejonu quiriquiaa.