Daniel 4 - Arabela

Nabucodonosor niishitiaja jatasacari juhua juunu niishitiajara

¹ Na nuhuaji Nabucodonosorri naa sequequiaari: “Janiyari camarnu Nabucodonosorni. Janiyari quiarijia puetunu jiyacajinia quijiaca pueya panitiaani nojori cuaara juhuajaniya quijiaca quiiria, naajaa, jaara quiri tamaquiicuaji tahue, tiquiyocua jiyacajinijinio tamaatia rupaa pocuajaca soj.

² Janiyari quiarijia jiyocuacaanu quijia Pueyaso quiria jiyajeneta na miishano tonu paniya puetunu niajaniyajanaani.

³ Na cumaacata na miishanoori nocuaji jiuujiatesano tojetaarucuajanaa. Nojuajaari camarnujuanaa quiriquiano pueyaracaanu. Na cumaacaari maja quenaaja na piriuquiniu quiniutianiya.

⁴ “Janiyari Nabucodonosorni. Queraatia jiyacajinia quijiaca pueya jiitiana cua quiniuucua, janiyari naacua juhuajaniya cua tiaco quijiani queraatia casamiriaca cua quiniuucua.

⁵ Saniniuujia tamonu niucua cua maquesacari, janiya puereeta maquiyojocanuni. Naa cua maquiyojosano cua niishiriojonuucuatej, janiyari jiyanohua puerereeni.

⁶ Naacuatej, janiyari nio puetunu cua jiitiasano Babilonia jiyajinijinio niishijiacajanaa jiiquiootecanuni cucua nojori nijionura. Janiyari naa miiquianuni nojori pohuatanura quiria casaa naa cua maquiyojosano tonu paniya janiyani.

⁷ Naacuatej, puetunu cua Babilonia jiyajinijinio nio pojoriiri cucua nijiocanu: joneneya cumaacaraca quijiaca, casapueraca niishijiaca, jiyanohua niishijiaca, riya serojonuucua niishijiaca pueyajuhuaj. Puetunu cuno pojorijianaari maja quenaaja na naata quiriucuaa quiria pohuatanu casaa naa cua maquiyojosano tonu paniya janiyani.

⁸ Na nuhuaji cucua niquianujuanaa cutaraari Daniel. Nojuacuajaari cua pueyasohuara cua jiyatesano sesaanucua, Beltsasar. Nojuajaari sesa miyaquijia Pueyaso Sohuanu niishitiajaraca. Janiyari jiyacari cua maquiyojosanojiniji naa na pohuatareeni:

⁹ ‘Puetunu niishijiacajanaa camarnura cua jiyatesano Beltsasarnaa, janiyari seetanujuanaa niishiyani, quiaari sesa miyaquijia Pueyaso Sohuanuraca. Cuno Sohuanuuri quia tonujuquiaa. Quiaari naacua puetunu niishishoo casaajanaa niishijia cutara. Cua tojiri. Quia pohuatareera cua maquenujinia cua niquishano. Quiarijia cua tore casaa cua maquenujinia cua niquishano tonu paniya janiyani.

¹⁰ Nioori cua maquenujinia cua niquishano: Naanaari jiya jiuujiajinia nujuariquiaa, jiyanohua jiyaconajatej.

¹¹ Cua niquiaraja shitiquii socua jiyaconajaraari. Jiyanohua queranajara quiquiijaariuhuaj. Na nacatuuri jiya cajiniocua tohuariquiiriquiaa. Naacuatej, cuno naanaari jiyanohua tucuacaanuji maatia niquishaariquiaa.

¹² Na muecacaari maninia neequera quiriquiaa. Jiyanohua jaaraca quiriquiaajaariuhuaj. Naacuatej, puetunu mijiria quijiaca pueyajanaari tiji miariquiaa. Majaari na pueetanu quiriquiaa. Naajuhuaj, puetunu casamijianaari na cariquioco shinishiquio nujuaturiquiaa. Puetunu jaacuatujuaca casamijianaari na cashacucuaacua jesuuriquiaajuhuaj. Naacuatej, cuno naanaari puetunu mijiria quiniaajanaa rishitinia quiriquiaa.

¹³ “‘Canashiyaquiji janiyari cojuana Pueyaso seru niquirii jiyocuacaanuji roseyanoni.

¹⁴ Nojuajaari jiyanohua nacaree naatej: “Cuno naana nia nure. Jiyareta nia cashacureerenoj. Na muecaca nia joojorejuhuaj. Puetunu na jaajanaa nia niyacare tiquiyocua. Naajuhuaj, puetunu na cariquioco nujuatiuyano casamijianaa nia jaacare, na cashacucuaacua tiuutiuyano jaacuatujuaca casamijaajanio.

¹⁵ Niocua tiijia tarinitiare noju na nujuacataja. Naa nia miiniu nuhuajitij, niocua hierrojiniji, broncejiniji shipinishano jiyocuata noju camarucutejore. Niocua tiijia na tarinitiarenoj cuaara tama tii shiquitiaarajaaja. Shushiquia cuaara tii nocua tiiria. Naajuhuaj, cuaara jiyasocua miaquejoora juyacata jaarajaaja.

¹⁶ Na niishitiaja cuaara cushitiiria juhua na cojishano juyaca niishitiaja na jiitianura. Nojuajaari naa pueyaracaanu quiniutianiyaquij cuaara na shocojoorajaatijia siete marijia.”

¹⁷ “‘Pueyaso seruuri naa sequereejuhuaj: “Pueyaso seya canaa quiniuucua, canaari naacua puetunu niojuanaa sequereeni. Cunoori puetunu mijiria quijia pueyajanaa niishiniuria jiyocuacaanu quijia Pueyasojuanaa cutaraari cumaacaraca na jiitianura puetunu mijiria camarucuajanaa. Naajuhuaj nojuajanaari camarnura jiyateja pueyano, cana na paniya camarnu na quiniuriacuajani. Jiya camarnura jiyateja samiritiasano pueyajaariuhuaj.” ’

¹⁸ “Camarnu Nabucodonosorri Beltsasar sequeree socua: ‘Puetunu niojuanaari cua maquenujinia cua niquishano. Quiarijia saniniuujia Beltsasarnaa, cua maquenujinia cua niquishano cua pohuatare, casaa na tonu paniya janiyajanojoni. Nio tama cua Babilonia jiyajinijinio niishijiaca cuarta taucuacani, nojoriiri maja na naata. Janiyari quiocua tiuya cutarani, quiaari quiria maatia pohuatanutaniyaquinioj. Quiaari jiyocuacaanu quijia sesa miyaquijia Pueyaso Sohuanu jiitiaacuaja.’

¹⁹ “Jiyacaritij cuno Danielni, teyonu canaa jiyaniquiquiaari Beltsasartajaniuhuaj, nojuajaari sanaa tojiriquiaa cua pohuatasano. Nojuajaari jiyanohua niishiriojoriquiaa na tacaatiasacari cua pohuatasano. Janiya, camarnu Nabucodonosorniqui, janiyari naa na sequereeni: ‘Beltsasarnaa, maja naa cua maquiyojosano tacaatianutej. Majaari cua maquiyojosano tonu panishano taacanuunu pohuatanujuhuaj.’ Naacuatej Beltsasarri cua riucuaree: ‘Cua camarnunaa, cuno puetunu quia maquiyojosanojanaa cuaara quiiria juhuari puetunu quia paraaranojanaa.

²⁰ Quiaacuajaari cuno jiyaconaja queranaja naana niquitishaarucuaa. Jiya cajiniocua tohuariquiiriquiaari. Naacuatej, jiyanohua tucuacaanuji niquishaatiaja quiriquiaajaariuhuaj.

²¹ Na muecacaari maninia neequera quiriquiaa. Queraatia jaaraca quiriquiaajaariuhuaj. Naacuatej, puetunu pueyajanaa, puetunu casamijianaari tiji miariquiaa. Na cariquioco shinishiquio nujuaturiquiaajaariuhuaj puetunu jiyasocua miaquejaca seyajanaa. Shuhuari puetunu na cashacucuaacuajanaa jesuuriquiaajuhuaj.

²² Cua camarnunaa, quiaacuajaari juhua cuno naana. Quiaari juhua maashiriucuaa. Quiaari cumaacaraca seetanujuanaa. Naacuatej, camarnunaa, quia cumaacaari juhua jiyanohua maashiriucuaa. Jiya cajiniocua tohuariquiimiaari. Naa cumaacaraca quia quiniuucuatej, puetunu jiyacajinia quijiaca pueyajanaari quia jiitiasano pueya.

²³ Quiaari cojuariquiano Pueyaso nujuatesano na seru niquiriucuaa jiya cajiniocuajiniji roseyanojuhuaj. Na rosesacari, nojuajaari naa sequeriquiaaquij: Cuno naana nia nuure. Niocua maninia na rapitiarenoj. Niocua tiijia tarinitiare noju na nujuacataja. Naajuhuaj, niocua hierrojiniji, broncejiniji shipinijiosano jiyocuata na camarucutejore. Na nuhuaji niocua na tarinitiarenoj cuaara tiijia shiquitiaara tamajaaja. Shushiquia cuaara nocua tiiria. Naa jaarajaaja juyacata jiyasocua miaquejonutaniyari cuaara na shocojoorajaatijia siete marijia.

²⁴ Cua camarnunaa, nioori quia niishiniuria jiyocuacaanu quijia Pueyasojuanaari quia saniitionutaniya.

²⁵ Cua camarnunaa, quiaari quiarta pueyacuaji rupateriquiano juyacata quia quiniuria. Quiaari jiyasocua miaquejoriquiano juhua juunujua. Shushiquia tiniuucua quiocua, quiaari jiyareta piquiasuu canujuucojoriquiano. Quiaari siete marijia shocotejoriquiano naa quia quishacaritij. Quiaari naa quiriquianotej quiaa cuaara niishiiriajaatijia jiyocuacaanu quijia Pueyasojuanaa cutaraari cumaacaraca na jiitianura puetunu mijiria pueyano jiitiasano jiyacajanaa. Naajuhuaj, nojuajanaari camarnura jiyateja pueyano cana na paniyacuajani.

²⁶ Quia niquiara sequesaarucuaajaariuhuaj naanaju cuaara na nujuasaquijia tarinitiasaaria puetunu na nujuacatajanaa. Cua camarnunaa, quiaa jaara tama niishirijiaaja Pueyaso cutaraari cumaacaraca mijiria, maja quiajaniya, quiaa jaara naa miiritij, quiaari puetunu quia jiitiasano jiyacajanaa tacatosaanutaniuhuacuhuaj.

²⁷ Naacuatej cua camarnunaa, quiarano cua sequesano quia tojiri: Maninia miijiojua quia quiri. Majaari socua sacuaraatia miijionu. Puetunu sesa quia miijionujuanaa quia tarinitiare. Saniniuujia quia taraajere cutara casamiijiu pueyacua. Nojori quia niquitiore na panishano. Quiaa jaara naa miiritij, quiaa jiyoteeri naacua juhuajaniya quiriquiano, tojishanojuhuaj.’”

²⁸ Puetunu nio sequesanojuanaa camarnu Nabucodonosorrano quiquiaarini, puetunujuanaari naa tohuatequiaaritij:

²⁹ Niquiriyatu marijia nuhuaji, tamonu juuca, Nabucodonosorri na tia cacojori tacaquiaari Babilonia tiacajinia. Tii na canujuucojosacari, nojuajaari naa caapueshijioriquiaaquij:

³⁰ “¡Nia niquishuriniaja! Shanohua cua Babilonia tiacaari jiyanohua puereetuuca. Cua jiitiasano pueya cua cumaaca tojitijia cua quiniuucua, naacuatej nio Babilonia tiacaari cua quiquiorano cua tiatesano. Janiyari niiquiji jiitiaa puetunu jiyacajinia quijiaca casaajanaani. Naacua cua nuhuajitij, pueyari pueyaracaanu jiuujiatenutaniya naa niishijia cua quiniuucua, shanohua puereetuuca tiaca cua tiatenuucua.”

³¹ Camarnu Nabucodonosor caapueshijiosacarijia, rupaari jiya cajiniocuaji tojishaaree. Naa sequereeri: “Nio quia tojiri, camarnu Nabucodonosornaa. Cuno, puetunu jiyacajiniajanaa quia jiitiasano pueyani, nojoriiri maja tari quia jiitiasano pueya.

³² Quiaari pueyajiniji rupatasaanutaniya. Quiaari quiarijia juyacata quiniutianiyacujua. Quiaari siete marijia shocotejonutaniya jiyasocua quia miaquejosacari juhua juunujua. Quiaari naa quiriquianotej quiaa cuaara niishiiriajaatijia jiyocuacaanu quijia Pueyasojuanaa cutaraari cumaacaraca na jiitianura puetunu mijiria pueyano jiitiasano jiyacajanaa. Naajuhuaj, nojuajanaari camarnura jiyateja pueyano, cana na paniyacuajani.”

³³ Jiyacarijianij, Nabucodonosorrano Pueyaso sequesanoori nera tohuatequiaari. Pueya shuriucuaji caponeesaareeri. Juhua juyaca miaquejosee jiyasocuaari. Shushiquia jiasanoori jiyareta mocuashii canujuucojojua. Na cajacaari tucuanacara maashiquiaari. Na juaashococua jaarajaaja, juhua surohua miooru juaashococuara maashiquiaariiri.

Nabucodonosor mosenu tajiyatesacari

³⁴ Nabucodonosorri socua naa pohuataquiaaritij: “Cua saniitiosaanu marijia jaara tari cua shocojoquiaari, janiyari jiyacari jiyocuacaanu maureeni. Naacuatej cua mosenuuri cucuaji tajiyatemohuani. Jiyacaritij janiyari shushajanaa pueyaracaanu jiyocuacaanu quijia Pueyaso maniniuhuaqueetaree naani: ‘Quia cumaacaari pueyaracaanu quiriquianojuhuanaja. Mijiria puetunu casaajanaa quia jiitianuuri pueetaaquiriquiano. Mijiria jiyaca camarucua sanitijiotoosacaricuaa, quiaa cutaraari pueyaracaanu camarnujuanaa quiriquiano, sanitiyaquishoo.

³⁵ Quiara, majaari jiyajeneta puetunu mijiria quijiaca pueyajanaa quia jiitianura. Quiaari puetunu quia panishano miijiajuhuanaja, jiya cajiniocua, nio jiyacuajaajanio. Mijiria, majaari quenaaja niquiriyatu quijia quiniu, na nujuatanura quia cumaaca. Naajuhuaj, majaari quenaaja niquiriyatu quijia quiniu na nequesotariquiano quiajaniya ¿casaara naa quia miyani?’

³⁶ “Jiyacaritij, coojiaari juhua cucua tiuquimiohuani. Puetunu cua jiitiasano jiyacajanaari quiria jiyatesaarohuacuhua. Puetunu cua pueyajanaari cua panijiacara quiriohuacuhuaj. Janiyari cua jiitiasano pueya maniniuhuaqueetasano quiriohuani. Cua casamiiri quiria quiriohuajuhuaj. Cua nacasunaa jiyaniijianucuara cua jiyatesano pueyani, camarucuara cua jiyatesano pueyajuhuaj, puetunu nojorijianaari cucua tacatequiaariuhua. Naacuatej, janiyari puetunu cua jiitiasano jiyaca camarnura quiriohuaniuhuaj. Janiyari socua tojishano quiriohuajaniuhuaj juhua coteenujua.

³⁷ Naacuatej, quiarijiani, janiya Nabucodonosorni, janiyari naacua jiya cajiniocua quijia Camarnujuanaa timitiaani. Puetunu na miishanojanaari tojetaarucuajanaa maninia cutara. Nojuajaari maninia miiquiaa maninia miijiaca pueya. Saniniuujia nojuajaari naacua saniitiojua puetunu sesa miijiacajanaa. Noo pojori cararojojuajaariuhuaj tama na cuaqueyajaaja camarucuajacatej.”