Daniel 2 - Arabela

Puereeta Nabucodonosor maquiyojosanojiniji pohuatasano

¹ Querajaa marijia jaara tari shocojoriquiaa camarnu Nabucodonosor quishacari Babilonia jiyajinia, jiyacaritij nojuajaari puereeta maquiyojoquiaari. Jiyanohua tacaatiaree na maquiyojosanoori. Naacuatej, majaari niucuaqueya na maquenu quijia.

² Jiyacari socua jiiquiooteree puetunu nio pueyajanaari: joneneya cumaacata jiyajeneta casaa miijiojuaca, casapueraca niishijiaca, shimiacuri, jiyanohua niishijiacanio. Naa nio pojori jiiquiootequiaariiri na jiyanishacari nojori naasucua niishiniutianiya casaa na maquiyojosano tonu paniya nojuajani. Naacuatej, puetunu nio niishijiaca narta taucuacajanaari camarnuucua tiuquinitiasaaquiaari.

³ Jiyacari naa nojori sequereeri: —Puereeta maquiyojorucuaanijia. Janiyari naacua jiyanohua tacayani. Jiyanohua jiaatiaa cua maquiyojosano niishiniu paniniuucuanijia casaama cua torenoj.

⁴ Puetunu cuno niishijiacajanaari naa camarnu sequeturee tama nojori Arameo rupaajiniajaaja: —Canaa camarnu cuaara pueyaracaanu jiiriataara. Quiarijia nio puetunu quia seyajanaanij, canaa quia pohuatare quia maquiyojosano. Canaari saniniuujia quia tonutaniya quia maquiyojosanojinijini.

⁵ Camarnuuri saa naa cuno pojori riucuareejaa: —Maninia cua tojitiuri. Nia niishirijuhuaj, niaa jaara quiarijia tama niishirijiaaja casaa cua maquiyojorucuaanij, cunoori maninia quiria. Naajuhuaj, quiria quiarijia nia caminiujiutiuri casaa cua maquiyojosano tonu paniya janiyani. Naajuhuaj, niaa jaara quiria caminiujiutiuyaquiri cua maquiyojosano, janiyari juhua casuhuaca nia cashacureetenutaniyani. Nia tiacacaari tojetaarucuajanaa niyarequetasocoriquianojuhuaj.

⁶ Saniniuujia, niaa jaara tama niishirijiaaja casaa cua maquiyojorucuaani, cunoori maninia. Naajuhuaj, janiyari timiniutianiyani niaa jaara cua toture cua maquiyojosanojiniji. Naacuatej, janiyari cua jiitiasanojiniji nareja nia niquitiojonutaniyani. Naajuhuaj, janiyari nia masesano miiniutianiya niaarani. Janiyari nia jiyateriquiano parta taucuaca tojishocoriquianojaniuhuaj. Quiarijianij, cua pohuatature casaa cua maquiyojorucuaani, casaa na tonu paniya janiyajanojoni.

⁷ Jiyacaritij, cuno niishijiacaari socua naa pacuteturohua camarnu riucuanutej: —Camarnunaa, canaa quia pohuatarecuaraja quia maquiyojosano. Canaari naacua niishiniutianiya cutara quia maquiyojosanojinijini canaa tonura quiajaniyatej.

⁸ Camarnuuri saa naa juaariijia: —Janiyacuajaari nia niishiyani. Niaari quiarijia sapuenu tarishiniujiyajaara cua niishiniu panishano nia caminiujiuniuria quiria. Niaari naa cua miyaquij nia niishishacari janiyacuajaari nia sequeree puecoonuni.

⁹ Nia saniriquiacuara quenaajateni. Niaa jaara quiarijia cua maquiyojosano cua pohuatatiuyaquiri, puetunu niajaniyajanaari puecoosocoriquiano. Niaaquiiri tonujutooree, naaratej taa cua niataa niajaniyanijia. Niaari saa cua sequesano pataaja. Niaari tama nia niishiriojosanojaaja nia sapojonuta najuhuana mariyateyacayaquij. ¿Niaateeri naacua jiyaniyaquij, janiyari nia puecoonu tarinitianutaniyani? Nia sequeyacuajanijia, ritia cua pohuatature cua maquiyojosano. Janiyari naacua niishiniutianiyani nia naatacuajaari cua maquenujinia cua niquishano cua totunujuhuaj, casaa na tonu paniya janiyajanojoni.

¹⁰ Puetunu niishijiaca taucuacajanaari naa camarnu riucuatureequij: —Camarnunaa, puetunu mijiria nio jiyajiniajanaanij, majaari quenaaja niquiriyatu pueyano quiniu na tonura quia niishiniu panishano. Nio quia niishirijuhuaj camarnunaa, tariucuacaanu quiocuaji quijiaca cumaacaraca camarnucuaari maja jiyano jiyajenuta casaa na nequesotanu quijia. Nio pojoriiri jiyacari juucua quijiacacuaja: joneneya cumaacaraca quijiaca, casapueraca niishijiacajuhuaj, jiyanohua niishijiacanio.

¹¹ Cuno quiarijia quia niishiniu panishanoni camarnunaa, cunoori tojetaarucuajanaa jiyajeneta. Majaari quenaaja niquiriyatu pueyano quiniu quia niishiniu panishano na pohuatanura quiara. Saaja pa niishishoo pueyasohua cutaraari na naata cutara. Noo juhuarij, nojoriiri maja mijiria na quiniu pueya tajiniani.

¹² Jiyacaritij, camarnuuri jiyanohua najiquirii. Naacuatej jiyaniijianucuara jiyatesano narta tahue seerataree na puecoonura puetunu Babilonia tiacajinia niishijiacajanaa.

¹³ Puetunu cuno tiacajinia quijiacajanaa jaara tari numootejotasaaquiaari puetunu cuno niishijiacajanaari puecoosaanutaniya, jiyacaritij janiya, cuarta Judiiocuaca mashiquiorijaajanio, canaari puecoosocoriquiano pajesaareejaniuhuaj.

Daniel pohuatasacari casaa Nabucodonosor maquiyojosano tonu paniriquiaani

¹⁴ Jiyacaritij, niishijia cua quiniuucua, janiyari jacaria pocoojoree Arioc jiyanishanotani. Nojuajaari camarnu cojuanuucua na nujuanuna quijia. Cuno Ariocri tari quera coteeriquiaa juucua puetunu cuno niishijiacajanaa puecoonu.

¹⁵ Janiyari jiyacari naa na nequesotareeni. —¡Ariocnaa! ¿Casaara pa camarnu ritiuniya pueranij, naa ritia puetunu niishijiacajanaa na puecoonuraniquitij? Ariocri jiyacari maatia cua pohuataree casaara naa camarnu puecootenu paniriquiaa puetunu niishijiaca canaajanaani.

¹⁶ Naacuatej, janiyari camarnuta cua pocoojonura nocua tiuquiquiaarini. Janiyari naa na sequereeni: —Camarnunaa, rupaquijia cua tarishitirijiaara maja ritia canaa puecootenu. Janiyari quia maquenujinia quia niquishano quia tacaatiasano quia pohuatanutaniyani, naajuhuaj, casaa quia maquenujinia quia niquishano tonu paniya quiajaniyani.

¹⁷ Cua tiuquishacariuhua cua tiajinia, janiyari Ananiias, Misael, Azariias pohuatasuhua puetunujuanaani.

¹⁸ Janiyari cua cojiniaa sequereeni nojori naacunura masenu jiya cajiniocua quijia Pueyaso, Pueyaso tonura canaa camarnu niishiniu panishano na maqueyojosanojiniji, maja canaa cojiritiasaanura puecoonu Babilonia tiacajinijinio niishijiacata.

¹⁹ Cuno niucuajanij, Pueyasojuanaari cua niquitirii cuno camarnu maquiyojosano na tacaatiariquiaani. Naacuatej, janiyari jiyanohua cua timiniutia jiya cajiniocua quijia Pueyaso maniniuhuaqueetareeni.

²⁰ Janiyari naa Pueyaso sequereeni: —Cua Pueyaso cuaara pueyaracaanu timitiasaaria. Puetunu pueyano niishitiajajanaari na niishitiajacuaja. Pueyano cumaacaari na cumaacajuhuaj.

²¹ Nojuajaari tacareejonu jatanijia shuniyara, saniniuujia shuniya jatanijia tacareejonurajaariuhuaj. Naajuhuaj, nojuajaari jiya camarnura jiyateja cana na paniyacuajani. Jaara na maniniucuasoo quiri, na samiritiajajaariuhuaj. Niishijiaca niquitiojua niishitiajajaariuhuaj. Naajuhuaj, niishijia na quiniuucua, nojuajaari niishitiaja niquitiojua niishijiaca, socua niishijiaca nojori quiniuria.

²² Nojuajaari tojetaarucuajanaa juhua queronijinia quiyano niishishoo casaa tonujujua. Jiyasohua niishishano casaa pa tonujujuajaariuhuaj. Naajuhuaj, ninishiqui quiyano niquishoo casaa pa tonujujuajaariuhuaj. Nojuajaari naa miijiatej, tojetaarucuajanaa cuhuashiqui quijia na quiniuucua.

²³ Quiajaniya, cua supuetanaa Pueyasonaa, quiaari niishijiara cua jiyaterucuaa, cumueecajuhuaj. Naacuatej, janiyari quiarijia quia paacarashootiuyani. Janiyari naacua quia maniniuhuaqueetaajuhuaj. Quiaari quiarijia cua niquitirii noo casaa, teyonuucuara canaa maseriquiaa quiajaniyacuajanij. Quiaari quiarijia canaa toree noo casaa camarnu na tacaatiaquiaa na niishiniu paniniu juucuatej.

²⁴ Na nuhuaji, janiyari Arioccua quiaquiaarini nata cua pocoojonura. Camarnucuajaari cuno Arioc seerataquiaari na puecoonura puetunu Babilonia tiacajinijinio niishijacajanaa. Janiyari naa sequeree cuno tahuetej: —Maja senota puecoonu niishijiaca pueya. Quiarijianij cua jiyataare pa camarnuucua. Janiya quiarijia nera pohuatanutaniya casaa na maquenujinia na niquishano na tacaatiasano sequenu paniyani.

²⁵ Ariocri ritia cua jiyataquiaari camarnu Nabucodonosorcua. Ariocri naa camarnu sequeseequij: —Janiyari niyarano quioosano Judiiocuacajinijinio niquiriyatu niishijia riuriatareeni. Nojuajaari quia maquenujinia quia niquishanojiniji quia pohuatanutaniya.

²⁶ Tii, tahuejinia canaa quishacari, janiyari Beltsasarta jiyaniquishaaquiaarini. Naacuatej camarnuuri naa cua nequesotareequij: —Beltsasarnaa, ¿seetanujuanaa quia naatatee cua maquenujinia cua niquishano pohuatanu quiriani? ¿Naajuhuaj, quia naatatee niishiniujuhuaj casaa cua maquenujinia cua niquishano tonu paniya janiyani?

²⁷ Janiyari camarnu riucuareeni: —Mijiria nio jiyajinianij, majaari quenaaja niquiriyatu pueyano quiniu quia niishiniu panishano na pohuatanura quiajaniya. Naajuhuaj, quiaa jaara nio pojori nequesoreere; niishijiaca, casapueraca niishijiaca, joneneya cumaacaraca niishijiacajuhuaj, riya serojonuucua niishijiacanio, puetunu cuno pojorijianaari maja na naata pohuatanu quiniutianiya quia niishiniu panishano quia maquiyojosanojiniji.

²⁸ Cua camarnunaa, saaja niquiriyatu Pueyasojuanaa cutaraari jiya cajiniocua quiya. Nojuajaari pa niishiyaquishoo casaa pa tojua. Quiarijiani, nojuacuajaari quia tonu paniya taa nio jiya quiniutianiya pa rishiniu nuhuajini. Quiarijia quiara pohuatareera quia maquenujinia quia niquishano, noojuhuaj, quia tacaashacari quia niquishanotej.

²⁹ Jiyacaritij, cua camarnunaa, quiaari quia matujinia mariquiaa. Quiaari jiyacari niishiriojoriquiaa ta pa rishiniu nuhuaji nio jiya quiniutianiyacuaanij. Mijiria pa niishishoo casaa niishijia cutaraari jiyacari quia niquitirii cuno quiaa na niishiniuucua tacayani.

³⁰ Nojuacuajaari quia niquishano cua niquitiriijuhuaj. Majaari jiyaniniu janiyari cuno niquitishaareejaniuhuaj socua niishijia cua quiniuucua parta pueyajiniji. Janiyari cuno niquitishaarucuaa cutarani, cua camarnura cua caminiujiushocoriquiano casaa cuno quia maquiyojosano tonu paniya quiajaniyanij. Naacuatej cua camarnunaa, quiaari quiarijia niishiniutianiya tama quioojiajinia quia niishiriojosanojaaja.

³¹ Nioori quia maquenujinia quia niquishano: Quia tacoji nujuacanuuri jiyanohua puereetuuca casaa juhua pueyanorano quejasanojua. Shacantuucaari quiriquiaa. Tojetaarucuajanaa puereeta niquishanoori quiriquiaajuhuaj.

³² Na nacaari jiyareta saa orojua quiriquiaa. Puetunu na jiriquiajanaari na numatucuataja plata quiriquiaajuhuaj. Puetunu na saracajanaari na ruhuajacucuataja bronce quiriquiaa.

³³ Naajuhuaj, na majeenacucua na saasuhuatajani, hierroori quiriquiaa. Na niohuacacaari saniniuujia hierro quiriquiaa marauta cojitishano.

³⁴ Quiaari shitimia na shootiariquiaa, cua camarnunaa. Canashiyaquiji tuhuananujiniji, saajiaari tamajaaja rupatequee. Cuno juhua pueyanorano quejasano nujuaano niohuacacaacua cuteseeri. Tojetaarucuajanaa na jacanojoreeri.

³⁵ Jiyacaritij, puetunu cuno hierrojanaa, marau, bronce, plata, oronio, jiyanohua jacanajeree tojetaarucuajanaari, naatej, taa jaaruusa namajaaca paaquioquiaacuaatej. Naacuatej, paratuuri na piyarojoree tojetaarucuajanaa. Majaari quenaaja na shiriniyojua manu quiquii na nuhuaji. Saniniuujia, cuno saajia juhua pueyanorano quejasano nujuaano jacanojorucuaani, cuno saajiaari jiyanohua puereetuuca tuhuananura jataquee. Puetunu nio jiyajanaa pueturiquiaari.

³⁶ Cua camarnunaa, nioori quia maquiyojosano janiya quiara na pohuatareeni. Quiarijia saniniuujia, quiara pohuatareera casaa naa quia maquiyojosano tonu paniya quiajaniyani.

³⁷ Cua camarnunaa, quiaari camarnujuanaa cutara puetunu tamasaca camarucuajinijijanaa. Naacuatej, jiya cajiniocua quijia Pueyasocuajaari puetunu jiyacajinia quijiaca pueya jiitianara quia jiyatequiaari. Quiaari quia cumaaca tojitiquiaa puetunu quia jiitiasano pueyajanaa. Quiaari jiyanohua cumaacaraca. Quiaari cumueeca, tojishanojuhuaj.

³⁸ Naacuatej, quiaari puetunu jiyacajinia quijiaca pueya jiitiana, nacujiniaaco quijiaca jiitianajuhuaj, puetunu jaacuatujuaca jiitianajanaanio. Quia niishiri; Pueyasojuanaari quia jiyatequiaari naa puetunu cuno casaajanaa jiitiana quia quiniuriatej. Naacuatej cuno puereeta casaa naca saa orojua quia niquishanoni, quiaacuajaari nojuaja.

³⁹ Quia nuhuaji, quia niti quiriquiano tamonu camarnuni, nojuajaari cumaacaraca quiriquianojuhuaj. Maja cutaraari cumaaca na jiitianu quiniutianiya juhua quia cumaacaja. Cuno nuhuaji socua tamonu camarnuuri supuenutaniya cumaacaraca cutara. Cunoori juhua quia maquenujinia quia niquishano bronceja. Naacuatej, nojuajaari puetunu jiyacajiniajanaa quijiaca tojitiriquiano na cumaaca.

⁴⁰ Naa cuno jiuujianraca camarucua nuhuajitij, socua tamonu camarnuuri supuenutaniya. Nojuacuajaari noo hierro quia maquenujinia quia niquishanotej. Naa jiyanohua cumueeca juhua hierro na quiniuucuatej, nojuajaari tamasaca camarucuajiniji socua cumueeca quiriquiano. Naacuatej, hierroori narta cumueeca casaa cocuaseja. Na jacanajojuajaariuhuaj. Naa jiyanohua cumaacaraca cuno camarnu quiniuucuatej, nojuajaari puetunu narta camarucuajanaa miaquejoriquiano.

⁴¹ Cua camarnunaa, quia maquenujinia quia niquishano niohuaca quia niishirijuhuaj. Cuno niohuacaari marauta hierrota cojitiquia quiquianu, na nacatucua naajuhuaj. Cuno marauri nareja cuno hierro cumaquiriquiano cojitishano quiriquiaa taa quia niquiriucuaacuajano. Naacuatej marauta cojitishano cuno hierro quiniuucua, querajaa maanura raquiritiariquianoori. Naacuatej noojiaqueyari maja cumaacaraca quiriquiano.

⁴² Naajuhuaj, niohuaca nacatucua quia niquishanoni, marau hierrota cojitiquia quiriquiaari. Cunoori quia niishiniuria cuno camarnuuri noojiaqueya juucua naataja cumueeca quiniutianiya.

⁴³ Cua camarnunaa, naatej taa quia maquenujinia quia niquiriucuaa cuno cumueeca hierro cojitishano marautacuajanij, cunoori quia niishiniuria, tamonu jiyacajinijinio camarucuaari cojitiiniutianiya. Tama nojorijiaarijia naa cojitiiniutianiyaquij, necohua camitioonuucua narta camarucuata. Naajaa, nojoriiri maja seetanujuanaa jatiqui quiriquiano, naatej, hierrocuaani majaari seetanujuanaa marauta na naata cojitiiniu.

⁴⁴ Naa cuno camarucua jiitiasacari puetunu tiquiyocuaca jiyacajinia nojori pueyatej, jiya cajiniocua quijia Pueyasoori saniniuujia jiyacari tamonu camarnuujuanaa nianutaniya mijiria. Nojuajaari pueyaracaanu rishiriquiano cutara. Na paraa jaara na miaquejonu paniri, shocotaaquishoo quiriquianoori, shaajayaquishoojuhuaj. Tamonu jiyajinijinio jaara nocua quejare miaquejonu, najuhuana nocua saneriquianoori juhua na nujuatariquianojua. Nojuajaari saniya nojori puecajoriquiano miaquejonu puetunujuanaa. Naa na paraa na miaquejonu nuhuajitij, camarnujuanaa na quiniuucua tama nojuajaarijia pueyaracaanu rishiriquiano cutara.

⁴⁵ Cua camarnunaa, quia maquenujinia quia niquishano noo saajiatej, cunocuajaari seetanujuanaa cua pohuatasano quiajaniya. Cuno saajiari tamajaaja canashiyaquiji tuhuananujiniji rupateno. Jiyocua cuteseeri. Puetunu nio jacanojoreejanaari: hierro, bronce, marau, platajuhuaj, orojaajanio. Pueyasojuanaacuajaari tari quia numooteree, camarnunaa, taa nionihuaji nio jiya quiniutianiyani. Quia maquenujinia quia niquishanoori seetanujuanaa. Naacuatej, quiara cua caminiujiushanoori tojetaarucuajanaa seetanujuanaajuhuaj.

⁴⁶ Jiyacaritij, camarnu Nabucodonosorri cucuara mojoquetaree na timitianuucua janiya. Jiyocuara jacamareejaariuhuaj. Na jiniji rupueteree jiyocuaari. Nera poonijionaa pueya sequereejaariuhuaj, seya cuaara puecoosaaria quiria. Nera poonijionaa sequereejaariuhuaj shanohua jaanujua naana riyaca cuaara catijiasaaria quiriajuhuaj.

⁴⁷ Na nuhuaji naa cua sequereeri: —Nia Pueyasoquiiri seetanujuanaa Pueyasojuanaa cutara tama canaa pueyasohuara canaa jiyatesano pueyasohuajiniji. Nojuajaari puetunu mijiria camarucuajanaa camarnu. Niishishoo casaa tojuajaariuhuaj. Naacuatej quiaari cuno niishishoo casaa niquitishaarucuaa quia tonura janiya.

⁴⁸ Naacuatej, cuno Babilonia jiyajinijinio camarunuuri maninia cua miiquiaari. Queraatia na jiitiasano casamijinijinio nareja cua niquitiojoquiaariiri. Naajuhuaj, puetunu Babilonia jiya camarnurajanaa cua jiyatequiaariiri. Janiyari puetunu cuno Babilonia jiyajinijinio niishijiaca tuacuaca camarnu quiriquiano jiyatesaaquiaarijaniuhuaj.

⁴⁹ Janiyari cuarta mashiquiori Judiiocuacara masequiaarijaniuhuaj nojori cuaara jaarajaaja cuata cojiritiasaaria camarucua nojori quiniuriajuhuaj. Naacuatej, Nabucodonosorri Sadrac, Mesac, Abed-negoo jiyatequiaari Babilonia jiya jiyaniijianucua nojori quiniuria. Janiya saniniuujia, janiyari Nabucodonosor shuriucua jateequiaari tii poonijioriquianoni.