Daniel 1 - Arabela

Nabucodonosor jiyatasacari quioosano Judiiocuaca Babilonia tiacajiniara

¹ Jerusaleen tiacajinia, Joaquimri tari shocotejoquiaari jiuujianraca marijia puetunu narta Judiiocuaca camarnu na quishacari. Jiyacaritij, tahue Babilonia jiyajinijinio camarnuuri na soldadohuata Judiiocuaca tiaca Jerusaleen tiuquitiaquiaari. Cuno camarnuuri Nabucodonosor jiyanishano tahue quijia.

² Jiyacaritij, Pueyasojuanaari Joaquim shanacuquiaari cuno Nabucodonosor morojonura nojuaja na Babilonia jiyajinia na jiyatasocoriquianohua. Jiyacarijuhuaj, cuno Nabucodonosorni, nojuajaari Pueyaso Secojojua tiaco tiuquiquiaari. Queraatia Pueyaso Secojojua tiaco cooshano orojiniji shipinishano casami juutequiaariiri. Cuno Nabucodonosorri naa morojonucuaca queraatia Judiiocuaca jiyataquiaariuhua na Babilonia jiyajiniohua. Saniniuujia, Pueyaso Secojojua tiacoji na shooshano orojiniji shipinijiosano casami niojoquiaari tama na pueyasohua na jiyanishano tiacoori.

³ Na nuhuaji puetunu na tiaco poonijionaa jiyaniijiarano na jiyatesano Aspenaz jiyanishano sequereeri: —Miji quiria quia saquiriojore cuno Israel pueyajinijinio camarucua niquiohua, jiyaniijianucua tojishano niquiohuajuhuaj.

⁴ Puetunu cuno mashiquiorijianaa cuaara quiiria mashiquiori maniniu tojetaarucuajanaa, maja sesaruhuojori najuhuanaj. Cuno pojori cuaara quiiria cararaatia miyaquijiaca, niishijiacajuhuaj. Cuaara quiquioora noojiajinia pueyano niishiriojosano niishijiaca. Cuaara quiquioora puetunu jiyanohua jiyajeneta niishishoo casaa niishijiacajuhuanajaj. Jiyano mashiquiori jaara quiritij, nojoriiri niya cua tiaco poonijionuuriquiano. Cuno mashiquiori cuaara niishitiojosaaria pa rupaa. Cuaara niishitiojosaaria puetunu pa Caldeo nequesoreetuneecajinia naajiojanaa. Cunoori maninia na niishijiaca nojori quiniuria. Aspenazri na camarnu Nabucodonosor sequesano miiquiaari.

⁵ Naajuhuaj, cuno Nabucodonosorni, nojuajaari nera poonijiona seerataquiaari puetunu cuno mashiquiorijanaa. Cuno nera poonijiona sequereeri cuno mashiquiori cuaara mianuutesaaria nerano sumatuucuacajiniji. Cuaara raatojosaaria na ratusano vinojinijijuhuaj. Cuno na seru nera poonijiona sequereejaariuhuaj, nojuaja cuaara puetunu cuno mashiquiorijanaa niishitiojoora puetunu Caldeo niishishanojanaa jiuujianraca marijiara. Naa jiuujianraca marijia cuno mashiquiori niishitiojosaanu nuhuajitij, naacua cutaratej nojoriiri tari na naata poonijionu camarnu jiyaco.

Daniel narta mashiquiori quishacari camarnu tiaco

⁶ Puetunu cuno mashiquiori maanujiniajanaani, tii quiriquiaari cuatro mashiquiori supuetana Israel niyanu Judaa niquiohuacuajinio supueno. Nioori nojori sesaca: Janiya Daniel, Ananiias, Misael, Azariiasnio.

⁷ Cuno Aspenaz jiyanishanoni, nojuajaari puetunu camarnu tiaco poonijionaa narta taucuaca nujuanuna quijia. Nojuajaari canaa Judiiocuaca mashiquiori sesaca jataniquiaari tama nojori Caldeo rupaajiniajaaja. Beltsasarta cua jiyaniquiriiri. Ananiias jiyaniquiriiri Sadrac. Misael jiyaniquiriiri Mesac. Azariias jiyaniquiriiri Abed-negoo.

⁸ Jiyacaritij, janiyari tama niishiriojoquiaarijaanijia: Canaa quiniuucua Pueyaso saquiriojosano Judiiocuacani, canaara majaari maninia na quiniu quiriquiaa canaa miaquenura tariucua canaa pueresano casaa. Tahuejinia canaa quishacari, canaari canaa pueretusano casaa miaqueriquiano quiriquiaa juucuani. Naacuatej, janiyari camarnujuanaa tiaco poonijionaa pueya nujuanuna sequereeni: —Maja canaacua shuniujiuniuujia canaa mianuutesaanura camarnurano sumatuucuacajiniji. Majaari canaa ratunu paniniu na raruhuaca vinojinijijuhuaj.

⁹ Pueyaso naacunuucua canaaniqui, camarnu tiaco poonijionaa nujuanunaari cua maniniucuaquiaari.

¹⁰ Saniniuujia, cuno tahueri naa cua sequereequij: —Janiya cua camarnu puereyacujua. Nojuajanaacuajaari cua seeratarucuaa niajaniyani maninia cua miatenura niajaniya. Naacuatej, niaa jaara masecore, niaa jaara tiijiquiorejuhuaj, cunoori maja maninia. Saniniuujia, taquiya niaacuaji maninia miaano niarta mashiquiorijinijinio jaara querasapiriujua quiricueaa, jaara naataniquiacatohua quirijuhuaj, cunoori jiyanohua puereeta quiriaaja. Camarnujuanaa jaara naa nia niquiritij, nojuajaari naacua cua motenutaniyacujua. Janiya jaara naa miishaareni, cunoori niaara cua miiniuucua nia sequesano.

¹¹ Naacuatej janiyari canaa miateriquianota pocoojoreeni. Cunoori camarnu tiaco narta taucuaca nujuanamitiniacuaja. Nojuajaari canaa miatenacuaja, janiya, Ananiias, Misael, Asariiasnio. Janiyari naa sequeree cuno tahueni:

¹² —Jiyaniijianaa, quiarijia nio canaa quia jiyaraajia sequesano quia tojiricuara quenaaja. Canaa quia saniri. Diez juuca canaa quia mianuutere saa miasano jaamasucuaja, canaa ratusocoriquiano mohuacajaajanio.

¹³ Naa saa cunojua canaa miaquejosacari jaara tari canaa shocojore diez juuca, quiajaniyajanaacua canaa jiquioco niatare taa canaa niquishiyani. Jiyacaritij, quiaari niishiniutianiya teyonu canaa maanuteja socua maninia quiya quiarani; canaa Judiio mashiquiori maanu, camarnurano sumatuucuacajiniji miaquejonaa mashiquiori soj. Naa quia miiniu nuhuajitij, quiocua canaara miiri taa canaa jiquioco quia niatareecuajani.

¹⁴ Cuno tahue, janiya, cuarta mashiquioritiaja na seeratasaaquiaarini, nojuajaari cua sequesano tojiquiaari. Naacuatej, naa diez juuca canaa sanirii mianuutenu canaa panishanoori.

¹⁵ Cuno diez juuca shocojonu nuhuaji, canaari saa maniniushiquiaarijiani. Canaari saa maninia niquitiariquiaajaani. Canaari tojetaarucuajanaa saminiucua quiriquiaani, cumaacaracajaajanio. Canaata quiniaa taucuaca mashiquiori saniniuujia, camarnu sumatuucuajiniji mianuutesaaquiaaritij, nojoriiri maseyoturujua quiriquiaacujua, tiyaniquiacatohuajuhuaj.

¹⁶ Naacuatej, cuno tahue canaa seeratasaaquiaari canaa miateriquianoni, nojuajaari janiya, Ananiias, Misael, Asariias cariji patootarohua canaa pueresano sumatuucuaca. Saniniuujia saaja nataacuaca miaquesano jaamasucua niojotaja canaa cariiri.

¹⁷ Pueyasoori janiya, cuarta mashiquiori niquitioquiaari niishitiaja. Naacuatej, canaari puetunu cuno taucuaca nequesoreetujinia niishitiojosanojuanaa maninia na niishijiacara quiquiaarini. Naajuhuaj, janiyari maatia niishiquiaari puetunu pueyajanaa Pueyaso niquitishano nojori niishitiajajinia nojori maquenujiniajaniuhuaj. Naacuatej janiyari pueyara caminiujiujiani casaa Pueyaso tonu paniriquiaa miriqui nojorini.

¹⁸ Jiyacaritij, jaara juhuaquequiaari camarnu sequesano juuca puetunu mashiquiorijanaa jiyatasaanura nocua, cuno tiaco poonijionaa pueya nujuanuna tahueri puetunu canaajanaa jiyataquiaari camarnuucua.

¹⁹ Camarnuuri puetunu canaatajanaa pocoojoree. Puetunu canaa mashiquiori maanujinijiniojuanaanij, majaari socua tamasaca jiyanohua niishijiaca mashiquiori quiniu quiriquiaa juhua janiyaja, Ananiias, Misael, Azariiasnio. Naa jiyanohua niishijiaca canaa quiniucuatej, camarnuuri canaa jiyateree na naacunaa canaa quiniuria.

²⁰ Pueyaracaanu camarnu nequesoreesacari canaa jiyanohua jiyajeneta casaajiniji, canaa cuatro Judiiocuaca mashiquiorini, canaari jiyanohua socua niishijiaca quiriquiaani puetunu camarnu tojishano niishijiacajiniji puetunu na jiitiasano jiyacajinijinio, puetunu na tojishano shimiacurijinijijanaajuhuaj.

²¹ Janiyari naacua camarnu jiyaco jateequiaarini tii cua poonijionura. Janiyari naa tii jateequiaarini Ciro jiyanishano tahue cuaara coteequiaari cuno jiya camarnu na quiniuriajaatijia.