2 Samuel 15 - Arabela

Absaloon taanuunu panishacari na que David, camarnu na quiniuria na niti

¹ Pasanaataja cuno nuhuaji, Absaloonri rucuanejotajaru caballohua jaatiasano masequiaari. Cincuenta cumamaca pueya saquiriojoquiaarijaariuhuaj na tacoji netucuaturiquiano nucoco na rucuanesacari.

² Absaloonri tariquiicuaji saneneecojojua tiacajiniara tiuquijia nuu shuriuquiocora na nujuanura pueyacuaji. Pueyari juucua camarnu Davidcua nijiojua sesa nojori miishanojiniji na jeecatoonura narta pueyanota. Absaloonri naa nijiono pueya cojeteja tiaca tohuateyajijiatej. Tii nojori nequesoreejaari teyano tiacajinijinioteja nojorini. Cuno pueyano jaara na riucuaquiaari nojuajaari Israel pueyajinijinio quiriquiaajuhuaj, Absaloonri jiyacari naa nojori sequejatej:

³ —Cuno quia juaaquiaca quiaa camarnuucua na netetaaniqui, cunoori seetanujuanaa. Saniniuujia, shaaqui cutaraari jiyaniijiara pa camarnu jiyatesano quia tacaatiasano casaa jeecariquiano quiara.

⁴ Absaloonri naa pueya niquiara maniniuhuaqueejajuhuaj. Naa sequeja pueya niquiaraari: —¡Casaama cua jiyateriquia puetunu cuarta pueya nequesoreenara cutaranij! Janiya maara pueyacuaji cajiri cutaranij puetunu nojoririajanaa cua jeecanura nojori tacaatiasano casaa.

⁵ Naajuhuaj, pueya jaara Absalooncua cateconuquiaari nocuara na jacamatunura, Absaloonri saaja nojori quiaja na cacanuunura. Pueya nujuunequejajaariuhuaj.

⁶ Absaloonri naa miijia puetunu narta Israel pueyajanaatej, noo pojori, canapuetucuaja camarna Davidcua quiojojua juucuani, nojori miitioosanojiniji nojori jeecanura. Naa Absaloon miiniuucua saniniuujia narta pueyatej, narta pueyari na maniniucuatuquiaari naacuatej.

⁷ Absaloon jaara tari shocojotequiaari cuatro marijia naa narta pueya na miijiosacaritij, camarnu na que David sequeree naa socuaari: —Cua camarnunaa, nareja cua niquiri. Janiya quiarijia quianu paniya Hebroon tiacajiniani. Janiyari tii seetanujuanaa Pueyaso cua sequesano miiniuucua quianu paniyani.

⁸ Nio quia seru quitiasusacari Guesur tiacajinia, Siria jiyajiniani, janiyari tii cua quishacari naa sequeno Pueyasoni: “Pueyasonaa, quiaa jaara cua quiniutiaja cua riujiuutiriohua niiquiji Jerusaleen tiacajiniohua, janiyari quia tojijiara quiriquianoni.”

⁹ Camarnu David na queeri naa na sequeree: —Juhuajaniya quia quiaare. Absaloonri jiyacari Hebroon tiacajinia quiaquee.

¹⁰ Nojuajaari jiyacari na pueya jiyaramiquiquiaarijuhuaj, nio na sequesano numootejosaanura puetunu narta Israel pueya tiacaqueyajiniajanaa. Nioori narta pueyarano na sequesano quijia: —Pueyanaa, niaa jaara trompeta jonenenuunu tojiri, niocua jiyacari sequere: “Absalonquii tari camarnura jiyatesaaree Hebroon tiacajinia.”

¹¹ Absaloonri Jerusaleen tiacajinijinio dosciento pueya masuuquiaari na cojiriquiano Hebroon tiacajinia na quiasacari. Cuno pueyari juhuajaniya na nuhuajitiuquiaari. Nojoriiri maja na niishiniu quiriquiaa casaa Absaloon niishiriojoriquiaa miiniuni.

¹² Tari Absaloon puecoonu panishacari Pueyasorano na seya, jiyacari Ahitofel jiyanishano numootetereeri nocua na niniuria Guilo na quijia tiacajiniji. Cuno Ahitofelri camarnu David nacasuna quijia. Absaloonri naa masuuquiaari Ahitofeltej, na cojiriquiano seya na puecoosacari Pueyasora. Naa na que David pueya na masuunujunuucuatej, Absaloon pueyari tari queraraqui quiriquiaa na que na tacaretanura camarnu na quiniu paniniuucua.

David mashishacari Jerusaleen tiacajiniji neyanuucuaji

¹³ Jiyacaritij, tamonu pueyanoori Hebroon tiacajiniji netequiaariuhua Jerusaleen tiacajiniohua, naa na numootenura camarnu David. —Puetunu Israel pueyajanaari tari Absalooncua pacuree, Absaloon quiniuria nojori camarnu quia niti.

¹⁴ Davidri jiyacari jiyaniijianucuara na jiyatesano Jerusaleen tiacajinia na pueya sequeree naatej: —¡Ritia niiquiji pa mashiri Absalooncuaji! Nia ritiuniri, paa mariqui puereeta miishaareeri, paa mariqui niyaja puetunujuanaa pa Jerusaleen tiacajinia ritiasaaseeri, nijiniaquetucuaja mueruuta shooshocoriquiano.

¹⁵ Na seyari naa camarnu David riucuatureequij: —Camarnunaa, canaacuajaari puetunu quia miiniu panishanojuanaa miiriquianoni.

¹⁶ Jiyacaritij, camarnu Davidri puetunu na tiajinia quijiacajanaa mashitiaree Jerusaleen tiacajiniji. Saniniuujia, tucuaji na rucuajeejosanojinijinio saa diez maajipohuaja tiujiaquiaari na tia cojuariquianoori.

²³ Puetunu noo pojorijianaa Jerusaleen tiacajiniji mashiriquiaani, puetunu nojorijianaari marteturiquiaa na nujuquenuta. Puetunu David pueyajanaari Cedroon jiyanishano samo niuutiaquiaari. Camarnu Davidri nojori nuhuajiriquiaa. Naacuatej puetunu pueyajanaari camarnu David puetatuquiaari cariiquia jiyajiniara neteja nucuama.