2 Samuel 12 - Arabela

Pueyasoori Nataan nacasutequiaari David

¹ Pueyasoori pueyarano na sequesano caminiujiunia Nataan jiyaroquiaari Davidcua. Nataan jaara tiuquishiiquiaari Davidcua, Nataanri naa David pohuataree: —Querajaa pueyanoori tamonu tiacajinia quijia. Niquiriyatuuri casamiriaca quijia cutara. Tamonuuri tojetaarucuajanaa casamiijiu quijiaaja.

² Cuno casamiriaca quijia pueyanoni, nojuajaari queraatia borreecohua jiitiaja, queraatia juyacajaajanio.

³ Cuno, casamiijiu pueyano saniniunijia, nojuajaari niquiriyatu borreeco niquiojuaniyojua jiitiaja, tamasacajiniji na masesano saajaarohuaj. Na camarujuanaaari cuno borreeconiyojua canashitiquiaari. Na camaru niquiohuata maashiiquiitiaquiaariiri. Puetunu na camaru miasanojiniji miaquejojuaari. Na camaru raatonuquejiniji rarujujuajaariuhuaj. Na camaruuri na jiriquiajinia na maquiojojua. Cuno pueyanoori naacua cuno borreeconiyojua panijia juhua neyatujua.

⁴ Tamonu juuca, casamiriaca pueyanoocua tiuquiquiaariiri tamonu pueyano. Casamiriaca quijia pueyanoori jiyacari maja quenaaja niquiriyatu na borreecohua na juyacajiniji monu paniyaquirii nocua tiuquinio na mianuutesocoriquiano. Jiyacari cuno casamiijiu jiitiasano niquiriyatu na borreeconiyojua jaariutiaree na mosocoriquianoori. Cuno mianuuteree na tiajinia tiuquinioori.

⁵ Naa David tojishacari Nataan pohuatasanotej, jiyanohua juaariiri. Davidri naacua Nataan sequereequij: —¡Seetanujuanaa Pueyaso niquiara quia sequeyanijia, naa sacuaraatia miijia cuaara mosaaria juhuari!

⁶ Naa narta pueyano na miiniuucua nocua na taraajeyaquiniutiatej, cuaara na camaru tacatohuara cuatro borreeco saniniuujia cuno na mosano borreeco niti.

⁷ Nataanri jiyacari naa David seequereequij: —¡Quiaacuajaari nojuacuaja, naa miinioniquitij! Quiarijianij, Israel pueya Pueyasoori quiocua cua jiyaroreeni quiara nio cua caminiujiuniuria. Naa quia sequeyari: “Janiyari cua Israel pueya camarnurano quia saquiriojononi. Nio quia niishiriquiajuhuaj, maja Sauul miaquenura quiajaniya, janiyajanaari nocuaji quia cojuanoni.

⁸ Davidnaa, janiyari camarnuucuaji cua tiatesanojiniaaco cajiriquiano quia saquiriojononi. Naacuatej, juhuajaniya quia quiniuria, janiyari naacua puetunu quia camarnu Sauul niquiocohuajanaa quia niquitiono juucuani. Naajuhuaj, janiyari nio querajaa maanura raquitiijinio quiarta pueya camarnurano quia saquiriojononi. Nojoricuajaari nio querajaa maanu cua pueya, Israel, Judaanio. Naa puetunu cua niquitiosanojanaa jaara puera secaja quiquianu quiara, janiya maara socua queraatia quia niquitiomanij.

⁹ Quiarijia saniniuujia, ¿casaara quiarano cua sequesano quia shocoterucuaarinij, naa sacuaraatia cua soosano quia miiniurianiquitij? Quiaari Uriias morucuaa Amonita taucuaca juaashiquiajinia quia jatanuucua nojuaja. Quiaari naacua necocua ririucuaaquij.

¹⁰ Naa quia motenuucua Hitita tahue Uriiastej, necocua quia riniuucuajuhuaj, quiaari cua shocoterucuaa tama quia panishanojaaja quia miiniuria. Naa cua soosano quia miiniuucuatej, quiaari naacua pueyaracaanu macaariquianotej quia niquiohua tacaresetanuucua puecootoonu tama nojorijiaaja.

¹¹ Janiyajanaa Pueyasoniqui. Quiara sequeya nionijia: Cuno naa sacuaraatia cararaatia quia miiriquianoni, cunoori tama niquiriyatu quia niquiohuajinijiniojaaja. Jiyacaritij, janiyajanaari quia namijiataqui quia niquiocohua niquitiojoriquiano niquiriyatu quia niquiohuajinijinioni. Nojuajaari na caririquiyaquiniutia puetunu Israel pueya niquiarajanaa quia niquiocohua jiuriariquiano juhuajaniya.

¹² Quiaa jaara jiyasohuaja miiquianucuaa naa sacuaraatiatej, janiya cutaraari naacua saniniuujia puetunu Israel pueya niquiarajanaa quia naminiutianiyacujua. Naacuatej, puetunu pueyajanaari naa cararaatia miishanojiniji niishiriquiano.”

¹³ Naa Pueyaso sequesano Nataan caminiujiushacari Davidtij, Davidri naa sequeree: —Seetanujuanaa, janiyaqui sesa miiriucuaa Pueyasoni. Nataanri jiyacari na sequeree: —Davidnaa, Pueyasoori maja na saniitionu quiniutianiya quiajaniya naa sesa quia miiniuucuatej. Majaari na shaajanu quiniutianiya quiajaniya.

¹⁴ Naa seetanujuanaa Pueyaso quia najiquitiniuucuatej, cuno shusha rananu quia niyanuuri shaajeriquiano cutara.

¹⁵ Nataan riujiuushacariuhua na tiajinia, Pueyasoori jiyacari David niyanu Uriias niquiocuaacua na mueratesano cusoteree jiyanohua.

¹⁶ Davidri jiyacari Pueyaso secojoree neyanu naatanuhuara. Miaqueyaquiriijaariuhuaj socua maninia Pueyaso na secojonura. Jiyocua pojonuucua juhuaquejojuajaariuhuaj seetanujuanaa Pueyaso na secojosacari.

¹⁷ Na jiyaco jiyaniijianucuara na jiyatesano pueyari na sananuucua nijiojua juucua. Saaja nojori ruuretajaari. Naa jiyanohua neyanuucua na miiniuucuatej, majaari na paniniu quijia mianujuhuaj.

¹⁸ Conaajaari siete juucajinia cusoquiaari. Jiyacaritij, na jiyaco jiyaniijianucuarano na jiyatesano pueyari David puerequiaari neyanujiniji na numootetunura. Tama nojorijiaarijia naacua naa sequetooquiaaritij: —¿Taa pa numooteyacuaanoj? Saminio mueya quishacarijia, nojuajaari saa pa ruuretajacuaja. ¡Quiarijia socuatejaj! Mosaatia miirii tama na cuaqueyajaniquijia.

¹⁹ David niquishacari na tiaco seyari tama sasacoojotariquiaajaacujua, Davidri niishiquii neyanuqui tari cusoquee. Naacua na seya nequesotareeri: —¿Mueyatee tari cusoquee? Na seyari na riucuaree: —Jaa, tari cusoqueeno.

²⁰ Davidri jiyacari jiyocua na sayocojosaquiji sanerohua. Nanareeri. Na cuaqueyacua shuquiujiutiaree shanohua jaanutajaari. Na toque maniniuqui cushiriijaariuhuaj. Naa miyanoori Pueyaso secojojua tiaco tiuquiquiaari tii Pueyaso na maniniuhuaqueetanura. Tiji tohuataanoori na tiajinia quiaarohua. Miaajeeju na quiniuucua, sequereeri miaquesano cuaara nera ruposaaria. Davidri miaqueree.

²¹ Na seyari naacua David nequesotatureequij: —Camarnunaa, ¿Casa quia miyarinijia? Mueya shaajeyaquishacarijia, quiaari Pueyaso quia secojonura miaqueyaquijia. Quiaari saa nujuquenuucua quijiajuhuaj. Mueyari juucua tari nimishiquiicuaja, quiaari saaja quia sayocojosaquiji saneree. Quiaari tari juhuajaniya miaquereejuhuaj. ¿Casaara naa quia miyarinij camarnunaa?

²² Davidri jiyacari naa riucuaree na seyatej: —Mueya cusoyaquishacarijia, janiyari Pueyaso cua secojonura miaqueyaquijiani. Janiyari saaja nujuquejajaniuhuaj. Janiyari naa miijiorucuaani cua jiyanishacari Pueyaso naasucua cucua taraajenutaniya quiyanu na naataniniuhuara.

²³ Quiarijia quiria cusoquee saajaari. ¿Janiyatucua casaara najuhuana cartere miaquenuni mueyacuara, Pueyaso cua secojonuranij? ¿Maatucua naatarohuajanojoni? Seetanujuanaa niishiya cutaranijia, janiyari na nuhuaji quiyanu coqueriquianoni. Nojuaja cutaraari maja na naata samiitianuhua, na coquenuhuara janiya.