2 Croonicas 6 - Arabela

Salomoon jiyatesacari tia, Pueyaso Secojojuara na quiniuria

¹ Jiyacaritij Salomoonri sanequiaari. Naa Pueyaso sequereeri: —Quiaacuajaari naa sequenotej, Camarnujuanaanaa: “Janiyaquijia ninishiqui quiyacujua.”

² Saniniuujia janiyari naacua quiocuaji tiaterucuaaquij, tii quia quijiara pueyaracaanu.

³ Na nuhuaji camarnu Salomoonri narta pueyacua jiriquiorohua. Puetunu cuno pueyajanaari nujuaturiquiaa. Pueyari jiyanohua queraatia na tacoji mariquiaa. Jiyacaritij, camarnu Salomoonri naa maninia rupaajinia sequeree na tacoji maano pueya:

⁴ —Pa supuetana Israel Pueyaso cuaara shuquiriaatia quiiria. Naacuatej, Pueyasocuajaari quiarijia tari tohuateree naa cua shipininio David na sequesanotej:

⁵ “Egipto jiyajiniji cua jaatianujiniji cua saquiriojosano pueya, majaari juhuanojuaja cua saquiriojonu teyano Israel niquiohuacuajinio caneno pueya maanu tiacajinia cua tiatenutaniyani, cuno tiaco cua sesa cojuasaanura. Naajuhuaj, majaari juhuanojuaja cua saquiriojonu teyano pueyanoteja cua saquiriojosano Israel pueyajiniji camarnu quiriquianoni.

⁶ Saniniuujia quiari naataja janiyari Jerusaleen tiaca saquiriojorucuaani tii cuno tiacajinia cua sesa cojuasaanura. Naajuhuaj, janiyari David saquiriojononi cua pueya jiitiariquiano.”

⁷ Naacuatej cua shipininio Davidri Israel pueya Pueyasorano tiatenu paninio juucua cuno tia quiniuria Pueyasorano seetanujuanaa.

⁸ Saniniuujia, Pueyasojuanaari naa na sequequiaari: “Quiaacuajaari maninia miya, cua quijiara quia tiatenu paniniuucua.

⁹ Saniniuujia, cuno cucuaji tiateriquianoni, majaari quiajaniya. Nojuajaari tama quia muetusocoriquiano quia niyanujaaja. Nojuacuajaari cua quijiara tiateriquiano.”

¹⁰ Pueyasocuajaari seetanujuanaa na sequesano tohuaterucuaa. Naacuatej janiyari cua shipininio David niti quiya camarnu quiarijiani. Naa cuarta Israel pueya camarnu cua quiniuucuatej, janiyari Pueyaso quijiara tiaterucuaani. Nojuajaari Israel pueya Pueyasocuaja.

¹¹ Janiyari cuno tiajiniaaco niatarucuaa Pueyaso quiquio cojeeni. Cuno cojeejiniacuma niatasano quiyacuajaari seetanujuanaa Pueyaso miishocoriquiano na sequesano pajaniyara na Israel pueyaniqui.

¹² Salomoonri na nuhuaji Camarnu Pueyasora catijiaja juhuacutu tacoji nujuaree. Puetunu tii quiniaa narta Israel pueya niquiarajanaa shiitioree jiyocuacaanu na juaashiquiacaari.

¹³ Salomoonri broncejiniji juhuacusano juhuacutujiniji nujuariquiaa na pocuasacari. Cuno broncejiniji juhuacutuuri querajaa metro jiitiariquiaa socua veinticinco centiimetro na tucohuana. Na cajiniocua shanacuuri naa quiriquiaajuhuaj juhua na tucohuanajuhuaj. Juhuacutu jiyaconajaari niquiriyatu metro quiriquiaa socua treinta y cinco centiimetronio. Salomoonri cuno juhuacutu jeecatequiaari. Secojojua tia cari jiuujiajinia na nujuaretaquiaariiri. Salomoonri jiyacari puetunu narta Israel pueya niquiarajanaa mojoquetaree. Jiya cajiniocua na juaashiquiaca na shiitionuta naa sequereeri:

¹⁴ —Camarnujuanaanaa, Israel pueya Pueyasonaa: Jiya cajiniocua, nio jiyacuajaajanio, majaari socua Cumaacaraca Quijia quiniu juhua quiajaniyaja. Quiaari quia sequesano tohuateja. Quiaari quia paniniu toquiaa, noo pojori canapuetucuaja quia panishano miiquiaa puetunu noojiatajanaani.

¹⁵ Quiarijia nio juucajani, quiaari tari tohuateree tariucuacaanu seetanujuanaa quia miishocoriquiano quia sequesano cua shipininio David.

¹⁶ Naacuatej Camarnujuanaa, Israel pueya Pueyasonaa, tariucuacaanu cua shipininio David quia sequesano quia tohuaterejuhuaj. Quiaari naa na sequenotej: “Quia muetusano quia niquiohuajinijinioni, pueyaracaanu niquiriyatu nojorijinijinioori camarnu quiriquiano cua Israel pueya jiitiariquiano, nojori jaara maninia miijiaca quiri, naajuhuaj nojori jaara niaarano cua naajio tojijiaca quirijuhuaj taa maninia cua tojijia quia quiquiaaricuani, Davidnaa.”

¹⁷ Naacuatej Camarnunaa, cuarta Israel pueya Pueyasonaa, quiarijia quia tohuatere seetanujuanaa quia seru cua shipininio David quia sequesano.

¹⁸ ¿Seetanujuanaatejanojoni? ¿Pueyasotee na naata mijiria quiniu pueyatani? Jiya cajiniocuaari puequeetuuju, naajaa puera shiitianiyojuaari quia quijiara. Socua niotejaj, pueya secojojuara quiajaniya cua tiatesano quia quijiarani.

¹⁹ Naajaa cua Camarnu Pueyasonaa, quia tojiricuaraja cua masenu quiajaniya. Quenaaja quia tojiricuaja nio quia jiyaraajia sequesano quiajaniyani cua masesacari quiajaniya.

²⁰ Maja cutaraari quiocuajinio cua riuriotaca tiacoji pooniu, juuca niucuanio. Tama quiajaniyajanaacuajaari sequeno quiaari nio tiaco quiriquiano. Quiarijia nio quia jiyaraajia sequesano quia tojiricuaraja quenaaja.

²¹ Nio tiaco cua secojosacari, quiocua quiria miiriquia cua masesano quiajaniya. Quiocua cuarta Israel pueya secojosano tojiriquiajuhuaj. Jiya cajiniocua quia quiquiojinijini, quiocua tiji tojiriquia quia secojonuujuaca nio secojojua tiaacuara nojori jiriquionuta nojori secojosacari, tamaqui nojori quishacari. Canaa quia jiyanooriquiajuhuaj sesa canaa miishanojiniji canaa seetaaquishacari quiajaniya.

²² Pueyano jaara taa miiri narta pueyano, sesa miijiaari shiniujiushaariquiano seetanujuanaa sesa na miishano na pohuatanura quiara seya catijiaja tacoji maja na seetanura sesa na miishanojiniji.

²³ Quiocua jiya cajiniocuaji tojiri nojori secojosano. Quiocua nojori masesano miiri nojoriria. Quiocua quia panijiaca pueyacuaji tacuriquia. Saniniuujia sesa miijiaca quia saniitioriquia sacuaraatia nojori miiniuucua. Nojoriicua quia tiuutiariquia puetunu sacuaraatia nojori miijiosanojanaa. Saniniuujia, maninia quia miiriquia sesa miyaquijiaca.

^24-25 Canaa paraa jaara quia Israel pueya shocotare canaa miaquetoosacari, cunoori sesa canaa miiniuucua. Canaa jaara seetanujuanaa pishiri sesa canaa miiniujinijini, canaa maniniuhuaqueetasacariuhua quiajaniya, naajuhuaj, canaa jaara nio secojojua tiajinia quia masere canaa quia jiyanooniuria, quiocua jiya cajiniocuaji canaa masesano tojiriquia. Naacuatej, quiocua canaa riujiuutiriohua canaarano canaa supuetanaarano quia niquitiosano jiyajiniohua.

²⁶ Maruqueya jaara niyaquiri tojetaarucuajanaa, cunoori canaa quia pueya miiniuucua sesa. Sesa canaa miiniuucua canaa quia saniitionuucua, canaari canaa pishiniutia nio secojojua tiajinia quia secojonutaniuhua canaa maniniuhuaqueetanuta quiajaniyani.

²⁷ Quiocua naacua jiya cajiniocuaji canaa secojosano tojiriquia canaa seetaaquishacari sesa canaa miijiosano. Naacuatej quiocua cuarta Israel pueya jiyanoori. Canaa quia niishitiojore maninia miijiaca canaa quiniuria, maja canaa jiyajenenura. Naacuatej, quiocua cuarta Israel pueya jiyarano canaa quia niquitiosano jiyacua maru nitiriquiacuaa.

²⁸ Quia tojiyashijiaca canaa quiniuucua, quiaari naa canaa saniitioriquiano: miaajenuuri quiriquiano; canaari ritia pacujua cusonu puequetariquianoni; nataacuacaari macuhuajeriquiano maru niyaquiniuucua; mauri moririquiano jiya tojenuucua; sequeruuri jiyanohua caneriquiano; nataacuaca paracaajia canashuriuuri caneriquianojuhuaj, socua tamasaca nataacuaca paracaajianio; canaa paraari canaa quijia tiaca cosejoriquiano canaa na miaquejonura. Naajuhuaj, canaa jiyoteeri taa miishaariquianojuhuananij, cusonuunu puequetariquiano soj.

^29-30 Jiyacaritij, pueyano secojosano quia tojiriquia, puetunu canaa quia saquiriojosano Israel pueya secojosanojuanaanio. Canaa jaara naquiya canaa miiquionuucua canaa juaashiquiaca shiitiore nio secojojua tiaacuara canaa secojosacari quiajaniyani, quiocua quia quiquio jiya cajiniocuaji canaa masesano tojiriquia. Quiocua canaa jiyanoori sesa canaa miiniuucua, quiocua canaacua taraajere maninia canaa miiniuucuajuhuaj. Quiaacuajaari puetunu pueyano jiuujiajanaa niishiya, na niishiriojosanojaajanio.

³¹ Naa quia jiitiasacari quia pueyatej, canaari quia panijiaca, quia tojitiajaca quiniutianiya canaa quishacari canaa supuetanaarano quia niquitiosano jiyajiniani.

³² Naajuhuaj, tamonu jiyajinijinio tahue jiyoteri niya tiuquiniutianiya na secojonura quiajaniya, na niishiniuucua quia cumaacata quia miishanoori seetanujuanaa nocuaji jiuujiatesano. Cuno tahue jaara nio secojojua tiaacuara na jiriquionuta quia secojore, quiocua na tojirinioj.

³³ Quiocua jiya cajiniocua quia quiquiojiniji puetunu na masesanojanaa miiriquia nera. Naacuatej, puetunu jiyacajinia quijiaca pueyajanaari quia niishiniutianiya, quia maniniuhuaqueetatunutaniyajaariuhuaj. Nojoriiri naa miiniutianiyajuhuaj taa canaa quia Israel pueya miiquioquiaacuaanij. Nojori cuaara niishitiuuriajuhuaj, quiaari nio secojojua tiaco maniniuhuaqueetasano, quiocuaji cua tiatesanoni.

^34-35 Canaa quia saquiriojosano pueyaniqui, canaa quia sanatasacari canaa paraa canaa miaquejonura, canaari na miiriquianoni. Quia saquiriojosano Jerusaleen tiacaacuara canaa jiriquionuta canaa secojosacari, nio quiocuajinio cua tiatesano tiaacuarajaajanio, quiocua jiya cajiniocuaji canaa secojosano tojiriquiacuara quenaaja. Quiocua canaa naacure sacuaraatia miijiaca canaa paraa canaa miaquejosacari.

^36-37 Saniniuujia, canaa jaara sesa miiriquia saajani, quiaacuajaari niishiya pueyanoori saa sesa miiniuucua netejaja. Quiaa jaara naa sesa canaa miiniuucua canaa juaatiaretej, quiaari canaa paraa shanacunutaniya canaacua, canaa cuaara quioosaaria taucuaca jiyajiniara. Canaa jaara tama canaa jiyajiniji pacusaare tucuacaanuni, catecaja soj, naajaa, quioosano jaara taucuaca jiyajinia sesa canaa miiniuucua canaa jiuujia tacatosee canaa pishiniuucua, quiocua canaa secojosano tojiriquia.

^38-39 Canaa paraa jiyajinia canaa quishacari, terara canaa quioosaanutaniyacuajanij, canaari canaa pishiquionuucua canaa jiuujia tacatonutaniya quiocuani. Canaari naacua quia secojonutaniyaquij. Naacuatej, canaa jaara canaa supuetanaarano quia niquitiosano jiyacuara canaa jiriquionuta quia secojonuure, canaa jaara secojonuure quia saquiriojosano Jerusaleen tiacaacuara canaa jiriquionutajaniuhuaj, quiarano cua tiatesano secojojua tiaacuara canaa jiriquionutajaajanio, quiocua canaa secojosano tojiriquia jiya cajiniocua quia quiquiojiniji. Quiocua naacua canaacuaji tacuriquia sesa canaa miiniu panijiaca. Quiocua naa canaa quia saquiriojosano pueya jiyanooriquia sesa canaa miishacari quia niquiara.

⁴⁰ Cua Pueyasonaa, canaa quia pueya quia cojuariquia. Nio secojojua tiajinia canaa masesano quia tojiriquia.

⁴¹ Camarnu Pueyasonaa, quiocuajinio cua tiatesanojiniaaco quia jiiriatasee cumaacaraca quia quiquio cojeetaja. Pueyacuara secojonaa pueya cuaara quia jiyanootiriquia quia pueya. Canaa quia tojijiaca pueya cuaara shuquiritiaara maninia quia miijionuucua canaani.

⁴² Camarnu Pueyasonaa, majaari pueya camarnurano quia saquiriojosano cua samiritianuujua. Noo quia niishiriquia, quiaari maninia miinio cua shipininio quia jiyaraajia David.