1 Samuel 21 - Arabela

David mashishacari Sauulcuaji

¹ Davidri Nob tiacajinia quiaquiaari tii na pocoojonura pueyacuara secojona Ahimeelec jiyanishanota. Ahimeelec niquishacari David, shiriiquiriiri. Na naacunuucua tohuataquiaariiri. Jiyacari naa David sequereeri: —¿Casaacua tamajaaja quia tiuquiyanij? Quiaa mariqui cojiniaaraca quiri.

² Davidri naa Ahimeelec riucuaree: —Pa camarnu Sauul niya cua jiyaroree casaa cua niquiniuria nerani. Cua sequereejaariuhuaj, pueya cuaara niishiyaquiiria casaacua na jiyaroya janiyanij, naajuhuaj, casaacua niya cua tiuquiyanij. Janiyari cua cojiniaa pueya sequeree cutarani, nojori cuaara cua sashitiuuria nojori cua sequesaqui.

³ Ahimeelecnaa, ¿Quiaa jiyo coseyacaracacuaa? Cinco pan cua niquitiore, jaara quiri.

⁴ Pueyacuara secojona Ahimeelecri naa David riucuareequij: —Nio cua jiitiasano panni, cunoori maja narejariquia. Cunoori saaja Pueyasora jiyatejosano pan. Naajaa, janiya quia niquitiojonutaniyaquinioj, quia cojiniaa pueya jaara seetanujuanaa maaji miijionuucua juhuaquejeyo quiquiore.

⁵ Davidri jiyacari maatia Ahimeelec sequeree: —Canaacuaaquiniatejaj tucuacaanu quiquiaa maajipohuacuajijiaj, naa miaquetoojonuucua canaa quishacari. Ritia canaa nishacari niyara, cua cojiniaa pueyacuajaari tariucua maajipohua quioo quiriquiaa tari. Quiarijianij nojoriiri tojetaarucuajanaa maajipohua naaquiijiu.

⁶ Naacuatej, Ahimeelecri David niquitiojoree Pueyasorano jiyatesano pan. Tii, Pueyaso secojojua tiajiniani, majaari socua tariquia pan quiniu quijia. Cuno pan David niquitiojosaaquiaarini, cunoori tariucua shiniitiuriquia quiriquiaa. Pueyaso tacoji poosanohua quiriquiaari. Naa na poosaanu nuhuajitij, nasariquia shusha majeetejosanoori Pueyaso tacoji niojosano quijia pueyaracaanu.

⁷ Jiyacari tii Pueyaso secojojua tiajinia quiriquiaari Doeg jiyanishano. Nojuajaari Edom jiyajinijinio tahue quijia. Sauulra cuhuariquiajinia seya cojuanaa pueya jiyaniijia quijiajaariuhuaj.

⁸ Davidri jiyacari Ahimeelec sequeree: —¿Majatee niya quia jiitianucuaa cashana, nijiniaquetucuaja mueruujaajanio? Puera ritia camarnu Sauul secootenuucua, janiyari naajaa juhuasu neteyarucuaani. Majaari quenaaja cua riniu quiyarucuaa tama cua nijiniaquetucuajajaaja, tama cucuaji cua namitiajara cua casaajaajanio.

⁹ Ahimeelecri naa David riucuaree: —Taaquiriirinij. Elaa jiya jamatujinia quia mosano Goliat nijiniaquetucuajacuaja nooj jati racateyatej. Tucuaque toquejinia jiunioconucua pojiyano, cuniqui cua toque tamajiriani. Quia pare. Quiaa jaara socua casaa paniri, maja socua casaa cua jiitianuni. Davidri Ahimeelec riucuaree: —Cuno nijiniaquetucuaja mueruucuaja maninia quiria. Miji cua niquitiorenoj.

¹⁰ Cuno juucajanij, Davidri Sauulcuaji mashiquiaari. Cunora socua tiuquishiiquiaari Aquiis jiyanishanoocuaari. Aquiisri Gat tiacajinia quijiaca taucuaca camarnu quiriquiase jiyacari.

¹¹ Jiyacaritij, Aquiis pueyari naa Aquiis sequetureequij: —Nio pueyanoqui Davidcuaja. Israel pueya camarnutej. Sauul jiyaraajiajaariuhuaj. ¿Niaatee noo niishiyaquij, na pueyacuajaari na timiquionuta na nianujunuusacari na jaaquenuunuta naa na maniniuhuaqueetanotej? Naa sequetujuaari: “Sauulri mil moree. ¡Davidri diez mil moreecujua!”

¹² David tojishacari naa taucuaca sequesano nojuajinijitij, nojuajaari cuno Gat tiaca camarnu Aquiis puereree jiyanohua.

¹³ Naacuatej, Davidri nojori niquiara na sapojonuta juhua paateca miijionu coteeree. Davidri cuno Aquiis tia tiootiuhuajiniji na tacuarashijionuta najuhuana naajiojonu coteeree. Na riacaacuaca jaasuteree na mohuajinijijaariuhuaj.

¹⁴ Camarnu Aquiisri naacua na pueya sequereequij: —¡Nia niquiri! Nio pueyanoqui seseno. ¿Casaara jiyano pueyano nia tiuquiniriucuaa niyajaarinij?

¹⁵ Niya pa tiacajinia quiyacuajaari seseno pueya. Naacuatej, majaari cua paniniu socua seseno pueya naa sacuaraatia na miijionura niya cua tiacotej.