1 Samuel 17 - Arabela

Davidri nata miaquejonaa puerojona maniniu quijia

¹ Jiyacaritij, Filisteocuacaari coquetooquiaari Israelpueyata na miaquetoonura. Cuno Filisteocuacaari Socoo jiyanishano tiacajinia rerejoquiaari. Cuno Socoo tiacaari supuetana Judaa niquiohuacuajinio caneno pueya tiaca quijia. Cuno Filisteocuacaari na suhuortuhua nujuatejotaquiaari Efes-damim jiyanishano tuhuananuucua. Nojoriiri cuniqui cutetuquiaari. Cunoori jiyareta Socoo, Azeca tiacaca tajiniacoma quijia.

² Naajuhuaj, Sauulri narta Israel pueya rerejotequiaari. Puetunu nojorijianaari saniniuujia Elaa jiyanishano jamatu tuhuanuucua cutetuseequiaari, tiji na miaquetoojonura cuno Filisteocuacata.

³ Naacuatej, cuno Filisteocuacaari Israel pueyata jiriquiotooriquiaa nojori quishaquij tuhuananuhuajiniji. Nojori quijia tuhuananuhua tajiniocuaretariquiaa maniniaari samo jaateja jamatu.

⁴ Jiyacaritij, juhuacatecara na ruutaquetoonura, Filisteocuaca tajiniji sanereeri nojori cumamaca. Tres metro jiitiariquiaari, jiyaconajatej. Goliat jiyanishanoori quiriquiaa, Gat tiacajinijinio.

⁵ Cumueeca broncejiniji shipinishano nacaque cushiriquiaari. Broncejiniji shipinishano toque cushiriquiaajaariuhuaj. Cincuenta y cinco kilo quiriquiaari cuno toque niiquia.

⁶ Na cashacucuaacua na rupojotasanoori broncejiniji shipinishano quiriquiaajuhuaj. Na numueejiniji shiijia cashana tamacaari naa cuno broncejiniji shipinishano quiriquiaajuhuaj. Na muetusano cashanaari jiyanohua queramaca quiriquiaa. Hierrojiniji shipinishano na quiajani, na niiquiaari seis kilojiniji socua niiquia quiriquiaa. Nocuaji cashi nujuna na naacunaari na puetariquiaa.

⁸ Jiyacaritij Goliatri nujuasee. Naa sequeree nojori taquijiria maano Israel pueyari: —¿Niaateeri taquiya canaa miaquejonu quejaaruhua, naa jaarajaaja canaacuaji nia manuraniquitij? Janiyari nia tahue Filisteoni. Niajaniya saninuujia, niaari Sauul jiitiasano pueya. Naacuatej, quiarijia niquiriyatu niajaniyajinijinio nia saquiriojore nia cumamaca, cuaara miji cucua roseera, niya canaa sanitiooreejanaaraj.

⁹ Cuno niajaniyajinijinio jaara seetanujuanaa cumueeca quiri, jaara cua shocotare, canaari nia pueya quiriquianoni. Saniniuujia, janiya jaara na shocotarenoj, puetunu niajaniyajanaari canaa pueya quiriquiano.

¹⁰ Tari maatia nia sequereecuajanijia, Israel taucuacanaa. ¡Niquiriyatu niajaniyajinijinio cuaara niya cucua roseerajaj, canaa sanitiooreejanaaraj!

¹¹ Sauul, puetunu na pueyajanaa tojishacari naa cuno Filisteo sequesanotej, puetunu nojorijianaari na mohuaneetaturee. Jiyanohua shiriiquitiuriijaariuhuaj.

¹² Jiyacaritij, Judaa jiyajinia, Beleen tiacajinia quijiaari Isaii jiyanishano pueyano. Sauul quishacari Israel pueya camarnu, Isaiiri jiyacari tariucua jiyanohua saaquiano quiriquiase. Nojuajaari ocho niquiohua jiitiariquiaa jiyacari. Niquiriyatu nojorijinijinio quiriquiaacuajaari David.

¹³ Jiyacaritij, jiuujianaraca Isaii niquiohuajinijinioori Sauulta miaquetoojoriquiano maanujinia quiriquiaa. Nioori nojori sesaca: Na jiyapueranu Eliab, na nuhuajishana Abinadab, nojori parajanu Samaanio.

¹⁴ Davidcuajaari nojori caracu quijia.

¹⁵ David quiniuucua tapueyocuaca naatujua, saaja tapueyocuacaacua rucuanejaari nojori na niquiniuria. Na nuhuaji tiji tacatejohua Beleen tiacajiniohuari na que borreecohua na cojuanuhuara.

¹⁶ Cuno Filisteori puetunu juucajanaa Israel pueya ruutaqueja nocuara tariquiicuaji, tenacarinio. Naa miijiojuajuhuanaari tii cuno cuarenta juuca nojori quishacari.

¹⁷ Tamonu juuca, Isaiiri naa sequequiaari neyanu Davidtij: —Veinte suhuoco mishaja quia taquirioore shuquijiajau trigojiniji, nio diez panjaajanio. Quia tapueyocuacaacua quia netetacoonoj.

¹⁸ Miaquetoojoriquiano parta pueya jiyaniijiarano quia poyare nio diez quitiaaca cumanijiasanojuhuaj. Quiocua quia tapueyocuaca niquishii, seetanujuanaa quia niishiniuria taa nojori quiyani. Quiaa jaara riujiuuuquioo, quiocua cua numootesuhuanoj, cua niishiniuriajuhuaj taa nojori quiyanij.

¹⁹ Sauul, David tapueyocuacajuhuaj, puetunu narta Israel pueyajanaari jiyacari cocuaarojotooriquiaa cuno Filisteocuacata Elaa jiyanishano jamatujinia.

²⁰ Tariqui saniniuujia, Davidri shusha juhuaquesacari sanequiaari. Na nuhuajiria na borreecohua seerataquiaari narta pueyanoori. Na que seeratasano coseyaca jiyataquee tapueyocuacaacuaari. Nojuaja jaara tiuquishiiquiaari narta pueya suhuortucuajinia, pueyari jiyacari jaacoonu coteeree juhua tari miaquetoojonuucua nojori cocuatenuraja.

²¹ Jiyacaritij, Israel pueya, cuno taucuaca Filisteocuacajuhuaj, nojoriiri jiriquiotooriquiaa. Nojoriiri jaquera jaacuaturiquiaa. Tariucua na cashi poonuuri quiriquiaa.

²² Davidri na nitiasano coseyaca jaratamaa ritia noo pueyano cari, teyonutucuaja cashi cojuana quiriquiaani, miaquesano cojuanajaajanio. Ritia tajiniocuareemaari tapueyocuacaacua nojori na nequesoreenura taa na quitiuriquiaanij.

²³ Tapueyocuacata David pocoojosacari, jiyacaritij cuno Gat tiacajinijinio miaquejoru Goliat jiyanishanoori narta Filisteocuaca tajiniji sanerohuacuhuaj. Puetunu tii quiniaa Israel pueyajanaa ruutaquerohua nocuaraariuhuaj. Nojuajaari puetunu juucajanaa naa miijiojuajuhuanajaj. Davidri jiyacari shushajanaa na tojirii.

²⁴ Naa Israel pueya niquishacari Goliattej, nojoriiri jiyanohua na pueretujua. Nojoriiri na puerenuta na nijiniara shupioconequetaturee.

²⁵ Jiyacari naa sequetureeri: —¿Niaatee tari niquiriiquinio? Nojuajaari naa pa ruutaquequiaajuhuanajaj. Quiarijia saniniuujia, canteja na moquiniutianiyani, pa camarnuuri cuno pueyano niquitionutaniya queraatia casami. Neyatu niquitioriquiano necoranojaariuhuaj. Naajuhuaj, majaari socua cumaneeca mashiniquishaanu quiniutianiya pa coonu moquiniajiniji, na quejiniji, tapueyocuacajinijijuhuaj.

²⁶ Davidri jiyacari tii nata quiniaa nequesotaree: —¿Maatucua casaa niquitiosaarejanojoni noo pueyanoni jaara cuno tahue Filisteo more? Jaara mosaare, sacuaraatia Israel pueya na sequesanoori naacua niyajeriquianotej. ¿Casaara naa Pueyaso niishiyashijia tahueseque quejareecuaa naa nocuara na ruutaquenura quijiajuhuanaja Pueyaso jiitiasano pueyacuaani?

²⁷ Narta pueyari Davidra pacuterohua sequenuhuaj, casaa Goliat mona niquitiojosaanutaniyanij.

²⁸ Na saaquiano Eliabri David tojirii naa narta pueya nequesoreyanotej. Na saaquianoori naacua najiquiquiiquij. Naa na juariiri: —¿Casaacua miji canaacua quia niyareerinij? ¿Cana quia seerataarucuaa cuno caapiquiriyatu borreeconiyojua pa jiitiasanorinij cariiquia jiyajiniaarinij? Janiyari naacua quia niishiyani. Quia niishiriojosanoori maja maninia. Quiaari niya canaacua tiuquirii nareja canaa quia shootianura canaa miaquetoojosacari.

²⁹ Davidri naa riucuaree na saaquianotej: —¿Janiyacuaaquiniateja nequesoteecujuataj? ¿Taateerinitioj? ¿Casaateeri sesanij?

³⁰ Davidri na saaquiano shuriucuaji shiriquirii. Tamasaca na nequesotasacari casaa Goliat mona niquitiosaanutaniyanij, naa sequesaareejaariuhuaj taa coteenu na sequesaareecuajanij.

³¹ Tamasaca tariucua David nequesoreeno tojinioori Sauulcua cateconuquiaari na pohuatatunura. Sauulri naacua na piiriiquij.

³² Davidri jiyacari Sauul sequeree: —Puetunu niya quiniaajanaani quenaaja niquiriyata cuaara cohuanashiyaquiiria cuno tahue Filisteo na puerenuucua. Janiya quia seruniqui, camarnunaa. Janiyari na saniniuucua sanenutaniyani.

³³ Sauulri David riucuaree: —Quia naata tamajaajatucuara cuno Filisteoni, najuhuana naasucuanij. Quiaacuaraja puera naatujuajaj. Cuno Goliat cutaraari na naatujuajiniji naa miaquejonuucua tariucua jiitiniojuhuanajaj.

³⁴ Davidri jiyacari Sauul riucuaree: —Janiya quia seruniqui, cua camarnunaa. Janiyari cua que seya cojuanani. Naa cuhuariquiajinia borreecohua cua cojuasacaritij, juurunu sare, oso maaraja, juucua na maanu tajiniji satuquiaa borreeco tarajanuuri.

³⁵ Janiyari na nuhuaji sacuaquiaani. Janiyari na rupaamaji na sananu jaariutiaquiaaquinioj. Cucua tacatequiaa juucuaari. Janiyari saaja na muesanaajiniji na quiaquiaaquinioj. Janiyari jiyocua na piquiquiaaquinioj. Janiyari tariucua macu na carteriquiohuani.

³⁶ Janiya quia seruniqui, cua camarnunaa. Janiyari naa miiquiaa cuno soorujuritij. Naajaa, jaara quiri juurunu sare, oso maaraja, janiyari saaja na moquiaaquinioj. Cuno Filisteo, Pueyaso niishiyashijiasequeni, ¿casaa na jiyaniyajanojoni? Janiyari quiarijia juhua soorujuri cua miiniujia saniniujiuniutianiya nocuani. Casaara nocuara na ruutaree quijiajuhuanaja Pueyaso jiitiasano pueyacuaraanij.

³⁷ Naacuatej, juurunu sareecuaji osoocuaji cua cojuano cua Pueyasocuajaari quiarijia cua cojuanutaniya nio Filisteocuajijuhuaj. Sauulri naacua David sequereequij: —Quia sanishiiqui. Quiaacuaja na sequeya. Pueyaso cuaara quia cojiiria.

³⁸ Sauulri jiyacari sequeree David cuaara na miaquejotaja toque cushitishaaria. Davidri jiyacari broncejiniji shipinishano nacaque cushitishaaree. Na jiriquia nucuriquiano broncejiniji shipinishano toque cushitishaareejaariuhuaj.

³⁹ Puetunu cuno casaajanaa na cushiyotesaanu nuhuajitij, Davidri Sauul nijiniaquetucuaja mueruu tunuree na shuucuaji. Na cushiyosano ruhuanetanu sanirii juucuaari. Tariucua nocua jiitiyo na quiniuucua, manaatia na tuhuaquenetariquiaa saajaari. Davidri naacua Sauul sequeree: —Maja cua naata ruhuanetanunoj, nocua jiitiyojuhuanijia. Davidri jiyacari puetunu na cushiyaqueyajanaa jocojoree.

⁴⁰ Tama na natacajaaja ririiri. Samo jaatejajiniji maninia cinco cariyajaaca sai saquiriojoreejaariuhuaj. Na shuuquitiasano camajinia na niojoreeri. Jiyacari na jacutaja shoruque ririiri. Cuno Filisteocua canujiyareeri.

⁴¹ Filisteori jaarajaaja David naacureejuhuaj, mariyataa na catecanotoonura. Cuno Filisteo naacunaari jiyareta na cari neteriquiaajaa.

⁴² Catecaji Filisteo niquishacari David, Davidri seetanujuanaa mashajaniyojua quiriquiaa. Macushiiri quiriquiaa, maninia niquishanojuhuaj. Naacua David puereyaquiriquiaari.

⁴³ Cunora naa David sequereeri: —¿Janiyateeri sareruhuani naa cucua macaca quia poonuraniquitij? Goliatri jiyacari naa David sesacaree, “Cua pueyasohua cuaara quia juurequejiaara.”

⁴⁴ Naa David sequereejaariuhuaj: —¡Miji, miji! Mopue, soorujuri tootijioriquia quia shucuacuarateni.

⁴⁵ Davidri saniniuujia naa na riucuareecujua: —Quiaari cucua poya mueruu, cashana, caruhuanajaajanio. Janiya cutaraari cumaacaraca quijia cua Pueyasoocua cua tiuuniu neretaa quiocuani. Nojuajaari Israel pueya Pueyasocuaja, teyano pojori quia ruutaree quiocuaracuajanij.

⁴⁶ Pueyasoori quiarijia quia jataree cua juaashiquiajinia. Naacua quiarijia quia monutaniyanijia. Janiyari quia nacatarohuani. Janiyari mopueeri tooquiotenutaniya quiarta Filisteocuaca shucuani, soorujurijaajanio. Puetunu jiyacajinia quijiaca pueyajanaari naacua niishiriquianotej Israel pueyari, nojori jiitiana Pueyasoraca.

⁴⁷ Puetunu niya quiniaajanaari quiarijia niishiniutianiya Pueyasoori maja na tiuuniu mueruucua, cashanaacuanio. Canaa Pueyasojuanaari nia paraca. Nojuajaari naacua quiarijia canaa miaquejotenutaniya niajaniya.

⁴⁸ Goliatri ritia sanequee Davidcua. Davidri jaarajaaja ritia nocua cateconureejuhuaj.

⁴⁹ Davidri ritia niquijiajau saajia pueraree. Na shoruqueta jaree Goliat jinijiiri. Saajiaari maninia shiishii na jiniji. Juhua jatasaaree na saracaraari.

⁵⁰ Davidri naa shocotaquiaari cuno Filisteotej. Saaja cuno shoruquetani niquijiajau saajiajaajanio, Davidri saa cunotaja na puetuquiaarijianaa cutara. David jiitiaaquiniuucua tama na mueruujaaja, naacua ritia netequee pojiyano Goliatcuaari.

⁵¹ Tama na camaruucuarajaaja mueruu shitiaree na cojinijiiri. Nataja camitiaree Goliatri. Naa na miiniu nuhuajitij, na nacatarohuari. Narta Filisteocuaca niquishacari taa nojori cumamaca mosaareenij, na cocuatetuqueeri.

⁵² Jiyacaritij, Israel pueya, supuetana Judaa niquiohuacuajinio caneno pueyajuhuaj, puetunu nojorijianaari jaacoonuuree na paraa nuhuaji na netecuatunura. Na neteyotatureeri. Jiyareta Gat tiaca tohuateyaji na jatatuseeri, Ecroon tiaca tohuateyajijaajanio. Saaraim tiacajiniji, Gat, Ecroon tiacajiniara neteja nucuamani, puetunu nucocojuanaa pojocoriquiaari puecoosano Filisteocuaca.

⁵³ Naa na neteyotatunu nuhuaji nojori paraatej, Israel pueyari na paraa suhuortucuajinia riujiuuriohua teje na cocuatatuquiaaricuajanoj. Nojoriiri puetunu nojori paraa casamijianaa pooturee nojoriria.

⁵⁴ Davidri na camarutasano naca pamohuacujua. Jerusaleen tiacajinia na tiuquitiasuhuari. Davidri Goliat mueruu cashana racataree tama nerajaaja na suhuortujiniaaco cutara.

⁵⁵ Coteenujuanaa shusha David netesacari cuno Goliatta na naacuneetoonurani, Sauulri jiyacari miaquejoriquiano na pueya jiyaniijia Abner jiyanishano nequesotaquiaari: —Abnernaa, ¿canteja cuno mashajaniyojua queni?

⁵⁶ Abnerri naa Sauul riucuareequij: —Cua camarnunaa, seetanujuanaa maja cua niishiniu canaquitijia na quetejaj. Sauulri Abner sequeree: —Quiria quia nequesoreere cana niyanutejanojoni.

⁵⁷ David monu nuhuaji Goliat, Davidri naca jaasuteriquiohua. Abnerri jiyacari na naacunuucua saneree. Na quiaseeri. Jiyacari David canujuteree Sauulcuaari.

⁵⁸ Sauulri David nequesotaree naatej: —Mashajanaa, cua sequere. ¿Cana niyanuteja quiajaniyani? Davidri Sauul riucuaree: —Janiya Beleen tiacajinia quijia Isaii niyanuni. Canaari quiara poonijionaa pueyacuajani, camarnunaa.