1 Samuel 16 - Arabela

Samuel jiyatesacari David camarnu na quiniuria Sauul niti

¹ Pueyasoori naacua Samuel sequequiaaritij: —¿Taacari quia tarinitianutaniya Sauulcua nujuquejonuurinij? Quiarijianij, janiyajanaa cutaraari maja cua paniniu tari socua Sauul quiniuria Israel pueya camarnu. Quiarijia quia sanere. Shiyocua quia mishiniri nacajajinia. Quiarijia quia quiaare Beleen tiacajinia quijia Isaii jiyanishano quiarta pueyanoocua. Janiyari necohuajinijinio tari niquiriyatu saquiriojoree camarnu quiriquianoni.

² Samuelri naa Pueyaso riucuareequij: —¿Taa cua miya quiarijia nocua cua quianuraarinij? Sauul jaara niishiri naa quiarijia quia sequesano janiyatej, nojuajaari cua monutaniya. Pueyasoori Samuel riucuaree: —Seru juunu macujuashi maaji quia quiare. Quiaa jaara nequesotasaare, quiocua nojori riucuare, cunoori quiriano na nanaca quia shootesocoriquiano.

³ Quiocua Isaii masuure necohuataja, na cojiniuria quiajaniya quiria quia mosacari quia seru. Janiyajanaacuajaari quia niishitiojonutaniyani taa quia miiniutianiyanij. Quiocua jiyacari camarnura jiyatere teyano cua sequenutaniya quiajaniyacuajani.

⁴ Samuelri naa miiriiquij taa Pueyaso sequeree nojuacuajanij. Beleen tiacajinia Samuel tiuquishacari, tiacajinijinio jiyaniijianucuaari tiacajiniji tohuareetaquiaari Samuel naacunuucua na puerenuta. Jiyaniijianucuaari jiyacari naa Samuel nequesotatureequij: —¿Quiaatee seetanujuanaa panaatia tiuquiya canaacuani? Samuelri nojori riucuaree:

⁵ —Taaquiriirinij. Pueyasora seru monuucua niyajuhuanijia. Quiarijianij, juhua nia tutere puetunu sacuaraatia nia miijiosanojinijijanaa. Niocua naacua panaatia juhuajaniya cua cojitiuritij, Pueyasora cua mosacari nerano riuriotaca seru. Samuelri jiyacari Pueyasora Isaii tuteree necohuataja puetunujuanaa. Naa nojori na miiniu nuhuajitij, Samuelri nojori masuuquiaari na cojitiuniuria nojuaja Pueyasora na shootesacari juunu nanaca, nata nojori miaquenurajuhuaj. Isaii tiuquiijiosacari necohuataja, Samuelri jiyacari Eliab niquirii. Nojuajaari tama noojiajiniajaaja naa sequereequij: “Nioqui camarnurano Pueyaso saquiriojosano.”

⁷ Pueyasoori saaja naa Samuel sequereequij: —Pueyano maniniu na quiniuucua, tuma nojuaja jiyaninioj. Majaari jiyaconaja na quiniuucua na timitianujuhuaj. Maja nojuaja, na samiritiaanijia. Quiaajuhua na jiyajenetaaquinioj pueyano quia quiniuucua. Pueyanoori naajuhuanaja, saa na maniniu niquiyajaari. Cunoori saa na cuaqueyaja. Janiya sajara noojia niquiyajanaa cutarani.

⁸ Jiyacaritij, Isaiiri neyanu Abinadab piirii. Samuel tacoji na nujuatereeri. Samuelri saa naa sequereejaaquij: —Jiyano quinio naasucuate Pueyaso saquiriojosano, najuhuanateniquij.

⁹ Isaiiri socua tamonu neyanu Samaa jiyanishano piiriijuhuaj. Samuel tacoji na nujuatereeri. Samuelri saaja naa na sequereejuhuaj: —Teetecuaranojotij, naajaajaniuhuaj. Jiyano quinio naasucuate Pueyaso saquiriojosano.

¹⁰ Isaiiri naa puetunu siete necohuajanaa nujuatejoquiaari Samuel tacoji. Naacuatej, Samuelri Isaii sequeree: —Cuno siete quia niquiohuajinijinioni, majaari quenaaja niquiriyatu nojorijinijinio Pueyaso saquiriojosano quiniu.

¹¹ Samuelri socua naa Isaii nequesotareequij: —¿Niojuanaatee quia niquiohuaniquij? ¿Majatee tarajanu cureenuni? Isaiiri Samuel riucuaree: —Taaquiriirinij, cureyacuaaquiniateja quiquiohua naatujuajaj. Nojuajaari cua borreecohua cojuana. Samuelri jiyacari Isaii sequereequij: —Miji ritia nia sequecoo. Majaari juhuanojuaja pa cajitiuniu quiniutianiya pa miaquenura nojuaja cuaara tiuquiiriajaatijia.

¹² Isaiiri jiyacari tamonu jiyaroree neyanu numootenuucua. Na tiuquitiarohuari. Samuel tacoji na nujuatereeri. Isaii niyanuuri mashaja maniniu quiriquiase. Shanohua naataniquiaca. Na tiuquishacari, Pueyasoori jiyacari Samuel sequeree: —Cuno cutara. Nocua quia sanere. Nojuaja quia jiyatere camarnura.

¹³ Samuelri jiyacari shiyocua ritiaree. Mashaja na nacaacoji na totareeri. Samuelri naa camarnura jiyatequiaari cuno mashaja puetunu tapueyocuaca niquiarajanaa. Mashaja sesaari David quijia. Naa David miishaanu nuhuajitij, Pueyaso Sohuanuuri Davidcua niquiaari na jiitiariquiano. Naa Samuel miiniu nuhuajitij, na Ramaa tiacajinia quiacuhuari.

David quishacari Sauul jiyaraajia

¹⁴ Sauul saniniuujia, Pueyaso Sohuanuuri na cartequiaari. Sesaacaseque sohuanu nocua Pueyaso jiyarosanoni, cuno sohuanuuri naquiya na miitiquiaari saniniuujia.

¹⁵ Na seyari naacua naa Sauul sequetureequij: —Canaa camarnunaa, quiaacuajaari niishiya, cuno tojeeca sohuanu quiocua Pueyaso jiyarosanoori naquiya quia miitiaa.

¹⁶ Naacuatej canaa camarnunaa, nio quia seya canaaniqui, canaa quia jiyaramiquiri canaa pajenura maninia arpa taquiniona. Cuno sesoriquia sohuanuseque Pueyaso jiyarosano quiocua jaara quiocua cutemoquiohua naquiya na miitianura quiajaniya, arpa cuaara jiyacari quiara taquiniosaaria. Naa arpa taquinionu quia tojishacaritij, naquiya quia miiniuuri quiocuaji tajiyateriquiano.

¹⁷ Sauulri jiyacari naa sequereequij: —Quiria nia pajerecuarajaj. Cuaara quiiria maninia arpa taquinionu niishijia. Niocua miji cucua na canujuterenoj.

¹⁸ Niquiriyatu cuno Sauul seyajinijinioori jiyacari naa sequereequij: —Janiya Beleen tiacajinia quijia Isaii jiyanishano niishiyani. Niquiriyatu necohuajinijinioori maninia taquinionu niishijiya. Cumamaca mashajaari. Na paraca jaarteyaquijiaari, puereyaquijiajaariuhuaj. Na sequesano tojitijiaari. Pueyano maniniuuri. Nojuajaari Pueyaso naacusano pueyano.

¹⁹ Sauulri jiyacari na seya jiyaramiquirii Isaiicua. Seyari saniniuujia naa caminiujiutiuquiaari Sauul sequesano Isaiiria: —Cucua quia jiyarore quia niyanu David, quiara quia borreecohua cojuanani.

²⁰ Isaiiri naacua neyanu David jiyarotaquiaari Sauulcua pan, niquiquio vino caacajuhuaj, cabra macujuashinio. Burrori puetunu nio casaajanaa canujutaquiaari Sauulrano.

²¹ Davidri naa quiaquiaari Sauul jiyaco quiniuucuatej. Tii Sauul jiyaraajiara quishiiquiaariiri. David poonijionuucua maninia, Sauulri jiyanohua na maniniucuaquiaari. Naacua na naacuriquianora na jiyatequiaari socuaari.

²² Naa Sauul miiniu nuhuaji Davidtij, Isaiicua jiyaroquiaari na rupaari. Naa na sequequiaariiri: —Quia mueya quia tarinitiare. Maninia quiyacuaja. Na timitiaanijia. Naa sequequiaariiri David na maniniucuanuucua.

²³ Naa Sauul miitiariquiano sohuanu Pueyaso jiyarosano miitiasacari Sauultej, Davidri jiyacari arpa pataja. Na taquiniojuaari. Sauul tojishacari taquinionu cuno naquiya na miiniu tajiyatejaari. Noojia cajitijiajaariuhuaj. Cuno naquiya na miitijia sohuanuuri nocuaji shiriquijiajuhuaj.