1 Samuel 15 - Arabela

Pueyaso samiritiasacari Sauul maja camarnu na quiniuria pueyaracaanu

¹ Tamonu juuca, Samuelri naa sequequiaari Sauultej: —Pueyasoori quiocua cua jiyarocanuni na saquiriojosano parta Israel pueya camarnura cua jiyatenura quiajaniya. Naacuatej, quiarijia quia tojiri nio na sequesano.

² Cumaacaraca quijia Pueyasojuanaari naa quia sequeyaquij: “Janiyari Amaleccuajinio caneno cuno taucuaca saniniutianiyani. Nojoricuajaari Egipto jiyajiniji nia quiasacari nia ritiano, maja na jiyacuma nia tajiniuria.

³ Naa nojori miiniuucuatej, quiarija nojori quia tiuquitiare saniniuujia. Nocua nojori puecare tojetaarucuajanaa. Majaari na jiuujiaaniunioj. Quia puecoore canuu maajipohua, muerasu, shusha roonacajuhuaj. Quiocua nojori seya puecoorejuhuaj, juyaca, borreecohua, camellohuajuhuaj, nojori burrohuajaajanio.”

⁴ Sauul quishacari Tailam tiacajinia, na serojosocoriquiano na pueya piiquiaariiri. Na serojonu nuhuaji, tama na pueyajaarijia doscientos mil canuu quiriquiaa. Supuetana Judaa niquiohuacuajinio caneno pueyari diez mil canuu quiriquiaajuhuaj.

⁵ Naa Sauul miiniu nuhuajitij, Amaleccuajinio caneno taucuaca tiacajinia quiatuquiaariiri. Tii na tiuquishacari, cuno nojori paraa moo shuriuquioco jamaatiuquiaariiri.

⁶ Quenita jiyanishano taucuacaari Amalec tiacajinia quijiacajuhuaj. Supuetana Moisees niquiocua que niquiohuacuajinio caneno quijiaari nio Quenita taucuacani. Naacuatej, Sauulri nojoriicua taraajequiaari. Naa nojori sequequiaariiri: “¡Niiquiji nia mashiri! Nio Amaleccuajinio caneno taucuaca tiacajiniji nia quiojore, janiya mariqui nojoritiaja nia cojiritiare miaquejonuuri. Janiyari naa niaacua jiyanoyaquij, maninia nia miiniuucuacuaa cuarta Israel pueya, nojori mashishacari Egipto jiyajiniji.” Naacuatej, cuno Quenita taucuacaari ritia mashiquiaari cuno narta taucuaca Sauul miaquejosocoriquiano shuriucuaji.

⁷ Jiyacaritij, Sauulri nojori paraa Amaleccuajinio caneno taucuaca miaquejoquiaari Havila tiacajiniji. Shur jiya jamatujinia nojori carteseequiaariiri. Cunoori jiyareta Egipto jiya namiquiiquiumia. Sauulri naa na paraa shooquiaari.

⁸ Sauulri cuno taucuaca camarnu quiaquiaari. Puetunu cuno taucuacajanaa miaquejoquiaari mueruutaari.

⁹ Saniniuujia Sauulri na pueyata jiyanootiuquiaari cuno Agag jiyanishano taucuaca camarununi. Naajuhuaj, sesa miitiuquiaariiri na puecoyaquiniuucua borreeco maniniuhua, juyaca maniniuhuajuhuaj, querasapiriujua juyaca macujuashiyanio. Majaari na puecootunu quirii borreecohua canuujuhuaj. Casami maniniu curojotureejaariuhuaj. Saaja panishoo casaa puecootureeri, panishoo casaa catijiatureejaariuhuaj.

¹⁰ Saniniuujia, Pueyasoori naa sequequiaari Samueltej:

¹¹ —Jiyanohua taraajeyanijia. Janiyari najuhuana Sauul jiyatecanu camarnu na quiniuriani. Nojuajaari cua carterucuaa. Majaari cua sequesano na miiniu quiriucuaa. Naacuatej, Samuelri jiyanohua taraajeree. Naacua Pueyaso nenwcojoree puetunu cuno niucuajanaari.

¹² Cuno tariqui saniniuujia, Samuelri shusha juhuaquesacari quiaquiaari Sauulta naacuneetoonuucua. Tijinio pueyari Samuel sequeree: —Sauul Carmelo tiacajinia quiamaa. Tii sai paatiriinio na paraa na shocotanujiniji niyajetaaquishaanura. Cuniquijinioori Guilgal tiacajinia quiaarohuacuaa. Tii quiya quiarijiaari.

¹³ Samuelri Sauulcua tiuquishiiquiaari. Sauulri jiyacari naa Samuel sequereequij: —Pueyaso cuaara maninia quia miiria. Janiyacuaja tari Pueyaso sequesano miiriini. Samuelri Sauul nequesotaree:

¹⁴ —¿Casaa cua tojiyacuaraarinitioj? ¿Majatee borreeco sariyocuatunu, juyaca sariyocuatunujuhuaj?

¹⁵ Sauulri naa Samuel riucuareecujua: —Amaleccuajinio caneno pa paraa seya pueya jiuujiaashano cunohuaj. Pueyacuajaari saa borreecohua maniniujia juyaca maniniu jiuujiaariucuaaquij quia Camarnu Pueyasorano catijiasocoriquiano. Canaacuajaari puetunu cureeno casaajanaa puecoorucuaani. Canaari na catijiarucuaajaaniuhuaj.

¹⁶ Samuelri saa ritia na niyacutereejaa. Naa na sequereeri: —¡Sanaa! Cua tojiri casaa Pueyaso sequeree quiarijia nio niucua quiarani. Sauulri Samuel riucuaree: —Quia sequere. Pa tojiri.

¹⁷ Samuelri jiyacari naa sequeree Sauultej: —¿Majateeri noo quiajaniyacuaja, cua sequenotej “janiyatucua taa camarnu quiriucuaani?” Quiarijia saniniuujia, quiaari seetanujuanaa puetunu quiarta Israel pueya camarnujuanaa. Naacuatej, Pueyasojuanaari quia jiyatecanu na saquiriojosano Israel pueya camarnu quia quiniuria.

¹⁸ Jaara naa quiritij, Pueyasocuajaari juucua quia jiyarorucuaa nio na sequesano quia miiniuria. Cunoori quia puecoosocoriquiano quiquianu juucua puetunu cuno sesa miijiaca Amaleccuajinio caneno taucuacajanaa, maja quenaaja niquiriyatu cureenura.

¹⁹ ¿Casaara Pueyaso sequesano quia miyaquiriucuaarinij? Quiaari saaja pa paraa casamiicua jiuujiaterucuaa. Naa quia miishanoniquitij, cunoori sacuaraatia Pueyasora.

²⁰ Sauulri Samuel riucuaree: —Janiyacuaaquiniatejaj Pueyaso sequesano miiriucuaanijiaj. ¿Casaateeri saa sesa quiyariquiohuajaaniuhuaj? Jaara naa quiyaquiritij, ¿casaatucuaraari nooni, pa paraa camarnu Agagtej? Canaacuaaquiniateja nojori pueturucuaa miaquejonujuaj.

²¹ Pueyari cuno borreeco maniniuhua curorucuaa, juyaca maniniuhuajaajanio. Cunocuajaari quia sequesano puetunujuanaa puecoosocoriquiano. Pocuaqui Guilgal tiacajinia na puecoorenoj quia Pueyasora catijiasocoriquiano.

²² Samuelri jiyacari naa sequereequij: “Pueyaso cutaraari socua maniniucuaja paa jaara na sequesano miirini socua nera pa catijiasocoriquiano seyajiniji. Socua maninia cutaraari pa tojiniuria nojuaja, pa miiniuria na panishano. Paa jaara na tojiyashijia quirini, nera pa niquitiojosano seyari najuhuanaj. Borreeco canuu shiyocua catijiasanoori naajuhuaj.

²³ Naa Pueyaso sequesano quia miyaquiniuucua sacuaraatiatej, quiaari jiyanohua sesa miirii. Pueyasora na sequesano tojiyashijiaari juhua shimiacujua. Naajuhuaj, Pueyaso sequesano miyaquijiani, Pueyasora cunoori juhua noo pueyanojua jeecojosano casaa jiyatejaca tama na pueyasorajaajatej. Naacuatej Sauulnaa, naa Pueyaso sequesano quia ruuretanuucuacuaatej, nojuajaari quiarijia quia samiritiaajuhuaj, maja tari camarnu quia quiniuria.”

²⁴ Sauulri jiyacari naa Samuel sequereequij: —Seetanujuanaa sesa miiriinijia cua miyaquiniuucua Pueyaso sequesano janiya, cua shocotenuucua quia rootasanojuhuaj. Janiyari naa miiriucuaaquij pueya cua puerenuucua. Nojoriiri puera cua shiniujiuriucuaani maja cua ruuretanura nojori masesano.

²⁵ Quiarijianij, cucua quia taraajerecuaraja quenaaja. Cua jiyanoori naa sesa cua miiniuucuatej. Janiyari quiarijia quia panitiaani cuata quia tacatenuhuarua Carmelo tiacajiniohua tii Pueyaso pa maniniuhuaqueetanura.

²⁶ Samuelri saaja naa riucuaree Sauultej: —¡Maja! ¿Casaatucua cua tarajatere quiajaniyacuaranij? Casaara Pueyaso sequesano quia miyaquiriicuaraarinij, nojuajaari quiarijia quia samiritiareejuhuaj. Naacua quiarijia saniniuujiatej, majaari tari Israel pueya camarnu quia quiniu.

²⁷ Samuelri juucua tacatequee na quianuhuara. Sauulri saa na quiareejaa na tucuaque toque casacajiniji. Na toqueeri sutequee.

²⁸ Samuelri naacua naa Sauul sequereequij: —Naatej, taa cua toque quia sutareecuaanij, Pueyasoori naa quiarijia quia jaariutiaa Israel pueya camarnu quia quiniujuhuaj. Pueyasoori naa camarnu quia quiniu quia jaariutareequij, quiarta pueyano na niquitiosocoriquiano saniniuujia. Nojuajaari socua pueyano maniniu quiajaniyajiniji cutara.

²⁹ Pueyasojuanaani, nojuajaari Israel pueya Pueyasojuanaa cutara. Nojuajaari tojetaarucuajanaa sapojiyaquijia, pishiyaquijiajaariuhuaj. Nojuajaari maja pueyano naa na sequesano na jatanura.

³⁰ Sauulri naa pacuterohua Samuel sequenuhuaj: —Quiaa seetanujuanaa sequeree. Naacuaaquiniatejaj, sesa miiriucuaanijia. Cua tojiriucuaraja quenaaja. Maja puera cua cararonuujuataj. Puetunu Israel pueya niquiara, puetunu na jiyaniijianucua niquiarajuhuaj, quiarijia cua cojiri juhua nojori camarnujua nojori niquitiuniuria janiya. Majaari nojori niquiara cua samiritianuujua. Janiyari quiarijia paniyani cuata quia tacatenuhuara Guilgal tiacajiniohua quia Pueyaso pa maniniuhuaqueetanura tii.

³¹ Samuelri naacua tacatequiaariuhua Sauulta. Sauulri Pueyaso maniniuhuaqueetaquiaari.

³² Cuno nuhuaji, Samuelri naa pueya sequereequij: —Miji niya canujutere Agag, Amaleccuajinio caneno taucuaca camarnuni. Agagri juhuajaniya canujumaa Samuelcua na puereyaquiniutia. Tama nojuajaarijia jiyaniriquiaa maja naasucua na mosaanu quiniutianiya.

³³ Samuelri jiyacari naa Agag sequereequij: —Quiaari quia nijiniaquetucuaja mueruuta queraatia maajipohua mueejutequiaari. Janiyari quia nucua nitiniutianiya naa quia miishano maajipohua nuhuajijaniuhuaj. Samuelri jiyacari cuno tahue rapitiaree jiyareta Pueyaso niquiara Guilgal tiacajiniaja.

³⁴ Naa na miiniu nuhuajitij, na Ramaa tiacajinia quiacuhuari. Sauulri na tiajinia quiacuhuajuhuaj, tama na quiquiojiniohuajaaja.

³⁵ Cuno juucajiniji, Samuelri maja socua na niquiniu quiquiaariuhua Sauul. Samuelri jiyanohua taraajequiaari Pueyaso pishiniuucua Sauuljiniji, najuhuana Israel pueya camarnura na jiyatenuucua Sauul.