1 Samuel 1 - Arabela

Pueyaso jiyapueratesacari niyajaru Ana

¹ Supuetana Efraiin niquiohuacuajinio caneno pueya jiya tuhuananuhuajiniani, tii quijiaari Ramaa jiyanishano tiaca. Tii cuno tiacajinia quijiaari Zufcuajinio muetano pueyano. Na sesaari Elcana quijia. Elcana queeri Jeroham jiyanishano niyanu quijia. Saniniuujia, Elihuuri Jeroham que quijia, Elcana jiyaso. Naajuhuaj, Tohuuri Elihuu que quijia. Sufri Tohu que quijia. Puetunu nio pojorijianaari supuetana Efraiin niquiohuacuajinio caneno pueya.

² Elcanaari querajaa niquiocohuaraca quijia. Niquiriyatuuri Ana quiriquiase. Tamonuuri Penina jiyanishano quiriquiase. Peninaari niquiohuaraca quijia cutara. Ana saniniuujia, nojuajaari niquiohuaju quijia.

³ Puetunu marijiarajanaa, Elcanaari na tiaca Ramaajiniji quiaja Siloo tiacajinia tii Pueyaso na maniniuhuaqueetanura. Tii na seya nanaca shootejajaariuhuaj cumaacaraca quijia na Pueyasora. Cuno Siloo tiacajiniani, pueyacuara Pueyaso secojojua Eliiri quijia. Nojuajaari querajaa niquiohuaraca; Ofni, tarajanu Fineesjaajanio. Cuno pojoriiri pueyacuara Pueyaso secojonaa quijiajuhuaj cuno tiacajinia.

⁴ Elcanaari na seya nanaca shootequiaari Pueyasorano. Na nuhuaji tiijia cuno shu miaquenuujua Pueyaso tacojiiri. Nojuajaari necocua Penina, necohua mashiquiori, necojori serotaja cuno shu tama nojori miaquesocoriquianojaaja.

⁵ Saniniuujia neco Ana niquitiojua socua na maniniucuasano shuuri. Elcanaari naa maninia miijia neco Anatej, jiyanohua na paniniuucua neco, naajaa Pueyasojuanaacuajaari Ana jiyatequiaari niyajarura.

⁶ Naacuatej, Peninaari neyacaacua juaajia Ana. Peninaari puera jiyareta Ana jiquioco sequejojua, na rerequetejajaariuhuaj. Naa Ana cararajojuaari niyajarura Pueyaso jiyatenuucua nartucuana.

⁷ Naa puetunu marijiarajanaa nojori quiasacari Pueyaso secojojua tiacotej, Peninaari saaja naa Ana macaatijiojuajuhuanajaj. Anaari naacua nujuquejojuatej. Majaari na miaquenu quijia.

⁸ Naa Ana macuhuajesacaritij, neyaca Elcanaari naacua naa na sequejatej: —¿Casaa quia nujuquetaanij? ¿Casaa quia taraajetaanij naa quia miaqueyaquiniuriatej? Quioojia quia cajitiri. ¿Janiyatee maja socua maninia quiara diez muerasujinijini?

⁹ Tamacari Ana quishacari Siloo tiacajinia, miaquenu nuhuaji, nojuajaari sanequiaari. Jiyacaritij, pueyacuara secojona Eliiri Pueyaso secojojua tia tohuateyaji cajiriquiaa na cajitiujinia.

¹⁰ Anaari nujuqueriquiaa juaatia na quiniuucua noojiajinia pueyaracaanu. Naacua Pueyaso coteeree masenuuri.

¹¹ Naa Pueyaso sequereeri: “Puetunu cumaacaracajanaa Camarnu Pueyasonaa, quiaa jaara cucua taraajere, quenaaja cua jiyapueraterecuarajaj. Quiaa jaara quiarijia naa cua sequesano miiri, quiria, janiyari naacua timiriquianoni. Naajuhuaj, janiya jaara cayaniyojua mueratereni, janiyari quiarano na niquitioriquianoni pueyaracaanu quia jiyaraajia na quiniuria. Seetanujuanaa na niishishaanura quiyanuuri quiarano cua niquitiosano, naacuatej na nacaari tojetaarucuajanaa tuquesoo quiriquiano.”

¹² Puera Ana tarishiniuucua Pueyaso na masesacari, Eliiri na shootiariquiaa sanaa na rupaa na majacutesacari.

¹³ Naa Ana secojosacaritij, nojuajaari seetanujuanaa Pueyaso maseriquiaa noojiajinia. Naacuatej, majaari na tojishaanu quiriquiaa. Saa na rupaajaari majacuriquiaa. Eliiri naacua jiyaniriiquiji puera vino na ratunuucua moseya naasucua.

¹⁴ Cunora naa na sequereeri: —¿Taacari naa sacuaraatia quia rarujunu quia cartenutaniyarinij? Cunojuanaacua vino quia ratunu quiri, majaari socua na caminiuhua ratunu saajuhuaj. Anaari saaja naa Elii riucuareequij:

¹⁵ —Quiaa najuhuana pa timioneyaquij, jiyaniijianaa. ¿Janiyatee vino ratuyajaarani? Maja najatunacuhua cua ratununi. Cua sequejosaanuucua cua juaaquiaca nujuquetaa Pueyaso cariquimiajijuhuanijia.

¹⁶ Majaari cua jiyaniniu janiyari cua mosenura rarujurucuani. Maja. Cua tacaaniuucua, cua taraajenuucua Pueyaso secojoriquiaa pueyaracaanujuhuanijia.

¹⁷ Eliiri Ana riucuaree: —Juhuajaniya quia quiaarohua. Pa supuetana Israel Pueyaso cuaara quia masesano miiria quiara.

¹⁸ Anaari na riucuaree: —¡Paacaraasho! Anaari na nishacoji riujiyarohua. Juhuajaniya miaquesuhua cutaraari. Cuno nuhuaji cutara, majaari socua na taraajenu quiquiaari.

¹⁹ Cuno tariqui saniniuujia, nojoriiri shusha juhuaquesacari sanetaquiaari Pueyaso maniniuhuaqueetanuucua secojonuujua tiajinia. Na nuhuaji panaatia quiojiyarohua nojori Ramaa tiacajiniohua cutaraari. Jiyacaritij, Elcanaari neco Ana canuquiaari. Pueyasoori Ana masesano niishiriquiaajaa secojonuujua tiajinia Ana sequesano nojuaja.

²⁰ Anaari naacua manajequiaaritij. Na ranu juuca jaara tari quiquiaari, caya raquiaariiri. Na jiyaniquiriiri Samuel. Naa na jiyaniquiriiri tama na sequenuucuajaaja, “nioori Pueyaso cua masesano.”

²¹ Elcanaari socua pacutequiaariuhua quianu Siloo tiacajinia necocuata puetunu necohuatajaajanio. Nojuajaari puetunu marijiarajanaa naa quiajajuhuanatej tii Pueyaso na secojonura, na seya puecoosaanura Pueyasoocuarajuhuaj.

²² Ana cutaraari maja na quianu quiyaree. Nojuajaari naa neyaca sequereequij: —Mueya shipiyatareera coteenu. Janiyacua tariucua shipiyateja na jiyataariquia Pueyasorano cua niquitiosocoriquianoni. Quiyanuuri naacua Pueyaso secojojua tiaco quiriquiano pueyaracaanutej.

²³ Neyaca Elcanaari naa Ana riucuareequij: —Naa quia miiriqui taa quia niishiriojoree miiniucuajani. Mueya quia canashitirijaaraqui, quiocuaqui tariucua shipiyateja jiyataariquianoj. Naa quia miiniuucuatej, Pueyaso cuaara na sequesano quiajaniya tohuateyara puera. Anaari neyanu canashitiquiaari cuaara na shipiyataquiaarijaatijiaj.

²⁴ Tariucua shipiyateja mueya quishacari, mueyari juhuanojuaja naatujua quiriquiaajaa. Anaari naajaa neyanu jiyataquiaari Siloo tiacajinia, Pueyaso secojojua tiajinia na niasacoriquiano. Anaari jiuujianaraca na seru juunu macujuashiya jiyataquiaari, niquiriu trigo cashojuajuhuaj, niquiquio shoquejinia mishinishano vino caacanio.

²⁵ Jiyacaritij, nojori reratenu nuhuaji Pueyasora majiriuutiasocoriquiano juunu macujuashi nanaca, jiyacari Elii niquitioturee mueyari.

²⁶ Anaari jiyacari naa Elii sequereequij: —Cua jiyaniijianaa, cua jiyanoori. Quiaaqui jiiriataajaa. ¿Quiaatee noo niishiyaquij? Janiyacuajaari noo maajini, niya jiyareta quia shuriucua Pueyaso secojonotej.

²⁷ Janiyari jiyacari Pueyaso masecanuni nojuaja cuaara cua muetuteera. Nojuajaari cua masesano cua niquitiocanuni. Nojuajaari niocuaja, quiyanuniyojuani.

²⁸ Quiarijia janiyajanaa saniniuujia, janiyari Pueyasora tari na jiyatereequinioj. Na rishishacarijia, nojuajaari saa Pueyasoraja quiriquiano. Eliiri jiyacari Pueyaso timitiaree. Cunora Pueyaso niquiara mojoquetareeri. Na jiniji rupueteree jiyocuaari.