1 Reyes 21 - Arabela

Acab riutiocosacari Nabot cuhuariquia

¹ Tamacari, Jezreel tiacajinijinio pueyanoori Samaria tiacajinia quijia. Nabot jiyanishano quijiaari. Nabotri uva cuhuariquiaraca quijia. Cuno na cuhuariquiaari, Samaria tiacajinia quijia jiyareta camarnu Acab tia shuriuquiumia.

² Tamonu juuca, Acabri naa Nabot sequeree: —Quia uva cuhuariquia cua niquitiore, janiyacua naacua cua nataacuaca cuhuariquia jiitiarenijia. Cuno quia cuhuariquiacuajaari namitia camarnu cua quiniuucua cua tia shuriucuataa. Janiya juhuari na niti quia niquitioya socua cuhuariquia maniniu cuno quia cuhuariquiajinijini. Quiaa jaara paniri, cua naata cua cumaneeca niquitionu quiajaniya quia cuhuariquia sami.

³ Nabotri jiyacari naa camarnu Acab riucuareequij: —Pueyaso cuaara cua cojuaara maja cua niquitionura quiajaniya cua shipininiojiniji cua supuetanaa naquiyara.

⁴ Naa Nabot ruuretanuucua Acab masesanotej, camarnu Acabri taraatia najiquia riujiyarohua na tiajinia. Na matujinia pojosuhuari. Sohuaca matacaacuara jiriquioriquiaari. Majaari cuno juuca na miaquenu paniniu quiriijuhuaj.

⁵ Necocua Jezabelri jiyacari nocua tiuquiquiaari. Na nequesotareeri: —¿Casaacuateja cumanetashiyani, casaateja taraajetashiyajaniuhuaj?

⁶ Acabri necocua riucuaree: —Jezreel tiacajinijinio Nabot jiyanishano uvaraca na cuhuariquia cua cumaneecata sanirii masenu juucuanijia. Janiyari na sequereeni, jaara cumaneeca paniyaquiri, cua naata na niquitionu tamonu uvaraca cuhuariquiajuhuaj na cuhuariquia niti. Majaari na paniniu. Saa cua jamuereenojua.

⁷ Necocua Jezabelri naa na riucuareequij: —¿Majateeri quiajaniyacuaja nio Israel pueya camarnuni? Juhuajaniya quia miaquesee. Quioojia quia cajitirijuhuaj. Janiyacuajaari Nabot cuhuariquia jiyateriquiano quiarani.

⁸ Jiyacaritij, Jezabelri neyaca Acab niti naajioree. Acab sesaraca naajio casaata jiriaqueree na naajioneecajiniajaariuhuaj. Na nuhuaji Nabot quijia tiacajinia jiyaniijianucuaacua jiyaramiquirii cuno na naajioneecaari, cuno tiacajinia quijiaca niishijiaca pueyacuanio.

⁹ Jezabelri na naajiojinia naa sequeree jiyaniijianucuatej: “Puetunu pueyajanaa nia numootejore maja nojori miaquenura Nabot rerejotasaanu juucajinia. Niocua cuno juuca Nabot cajitiri rerejono pueya tacoji.

¹⁰ Jiyacaritij, niocua Nabotcuara na sapojonuta saquiriojotariquiano nia rootasano querajaa pueyano cajitijiore Nabot tacoji. Cuno querajaa pueyanoni, nojori cuaara na cuaracashijionuta naa sequeera: ‘¿Casaa nia jiyaniya nio Nabotnijia? Nojuajaari Pueyaso sesacarucuaa. Camarnu Acab sesacarucuaajaariuhuaj.’ Niocua jiyacari tiacajiniji tamamara na jaarinioj. Niocua na pueturejanaa saitia jacunu.”

¹¹ Naacuatej, Nabot quijia tiacajinijinio pueyani, puetunu na niishijiaca pueyajanaa, na jiyaniijianucuajaajanio, nojoriiri naa miiquiaari taa na naajiojinia Jezabel sequequiaari nojori miiniuria neracuajanij.

¹² Puetunu nojorijianaari pueya numootejoquiaari maja na miaquenura cuno juuca. Nabotri jiyacari puetunu pueya tacojijianaa cajitishaaree.

¹³ Querajaa pueyanoori jiyacari tiuquiijioquiaari. Cuno pojoriiri tariucua rootasano quiriquiaa, puetunu pueya niquiarajanaa na cuaracashijionuta naa na saquiriojotanura Nabotcuara: “¿Casaa nia jiyaniya Nabotnijia? Nojuajaari Pueyaso sesacarucuaa. Camarnu Acab sesacarucuaajaariuhuaj.” Pueyari jiyacari Nabot quiaturee. Tiacajiniji tohuatesaareeri. Tii na cusojuaturee saitia jacunuuri.

¹⁴ Tariucua naa miitiuyanoori Jezabel numootetuquiaari Nabotri tari saitia jacusano cusojuasaareecuaja.

¹⁵ Jezabel jaara tosaaquiaari, ritia naa sequeree neyaca Acabri: —Quiarijia quiara quia jiyatere cutara Jezreel tiacajinijinio Nabot cuhuariquia. Cuno cuhuariquiacuajaari quia cumaneecata na camaru quia masenu panishano juucua, majaari tari na camaru quiniu. Tari cusoqueeno.

¹⁶ Acab jaara niishiquiaari cuhuariquia camaru Nabotri tariucua macu quiriquiaa, quiaqueeri. Uvaraca Nabot cuhuariquia jiyateree neraari.

¹⁷ Pueyasoori jiyacari pueyara na sequenu panishano caminiujiunia Tisbee tiacajinijinio Eliias sequeree naatej:

¹⁸ —Samaria tiacajinia quijia Israel pueya camarnu Acabcua ritia quia neteyare. Nojuajaari quiarijia uvaraca Nabot cuhuariquiajinia quiya Samaria tiacajinia. Tari nera jiyatereeno cuno cuhuariquia.

¹⁹ Quiocua naa sequeseenotej: “Pueyasoori naa quia sequeyaquij Acabnaa: ‘Quiaari Nabot moteree jiyanohua quia jiaatianuucua na cuhuariquiaacua. Quiaari quiarijia cuno cuhuariquia jiyateree quiara saniniuujia. Naacuatej, tee sareya tamuereecuaa Nabot nanacacuanij, sareyari cuniquijia quia nanaca tamuenutaniyajuhuaj.’”

²⁰ Acabri jiyacari naa Eliias riucuareequij: —¿Naatee, cua paracanaa? ¿Seetanu quiajaniyatejanaa cua riuriatareeniquij? Eliiasri na riucuaree: —Taaquiriirinij. Janiyacuaaquiniateja quia riuriatareejaj. Cunoori maja najuhuanaj. Quiaari saaja sacuaraatia miijioquiaa Pueyaso niquiara.

²¹ Quia tojiri. Pueyaso naa quia sequeyaquij: “Janiyari quia cartenutaniya naquiya quia miishaanurani. Quiocuajinio caneno pueya puecariquiano tojetaarucuajanaanijia. Puetunu canuujuanaa quia muetusanoni, tuma nojori jiyani quia nuhuaji quiriquiano. Janiyari puetunu narta Israel pueya tajinijiniojuanaa nojori puecariquianoni.

²² Naacuatej, janiyari quia niquiohua puecanutaniya puetunujuanaani, naatej, taa cua miiquiaari Jeroboam niquiohuacuaani, puetunu Baasaa niquiohuajaajanio. Nojoriiri nocuara cua najiquititiunio, sacuaraatia casaa na miitiniuucua narta Israel pueya.”

²³ Pueyasoori saniniuujia naa Jezabel sequeyaquij: “Sareyari Jezabel miaquenuuriquiano Jezreel tiaca cuhuariquiacajinia.”

²⁴ Puetunu quiocuajinio caneno canuujuanaa saniniuujia, nojori jaara tiacajinia cusoyare, sareyari na miaqueriquiano. Saniniuujia, jaara cusoyare cuhuariquiajinia, mopueeri na miariquianojuhuaj.

²⁵ Majaari socua tamonu quiniu quijia juhua camarnu Acabja. Necocua Jezabelri saaja sesa miiniuucua na shiniujiujia Pueyaso niquiara na miijionura sacuaraatia.

²⁶ Socua jiyanohua sacuaraatia miiquiaariiri, Pueyaso soosano jeecojosano casaa na jiyatenuucua tama na pueyasohuarajaaja. Nocuara jacamajaari juhua Pueyasoocuaraja. Naa na miijiosanoori juhua Pueyaso niishiyashijiaca cuno taucuaca Amorreocuaca miijiosano quijia. Pueyasocuajaari na Israel pueya quijiara na jiyajiniji cuno taucuaca taanuuno.

²⁷ Naa Acab tojishacari puetunu Eliias sequesanojanaa nojuajatej, jiyacari na toque sureereeri. Na taraajenuucua, toqueya cocuaqueya cushiyojoreeri. Majaari na miaquenu quijiajuhuaj. Cuno cocuaqueya toquetaja maquiyojojuaari. Puetunu taraajenucujujuajanaari.

²⁸ Pueyasoori jiyacari naa sequequiaari Eliiastej:

²⁹ —¿Quiaatee Acab niataa? Pueyanoshiitia pishiriiniocuara quenaaja. Majaari tari na quiniu juhua socua tojishano pueyanojua. Naa quiria cua niquiara na jatanuucuatej, maja juhuari na quishacarijia cua saniitionu quiniutianiya nocuajinio caneno canuu. Neyanu saniitioriquiano cutaranijia, camarnu na quishacari.