1 Reyes 18 - Arabela

Eliias muetasacariuhua camarnu Acabcua

¹ Jiuujianaraca marijia shocojonu nuhuaji maru niyaquishacari, Pueyasoori jiyacari Eliias sequequiaari: —Camarnu Acabcua quia muetare quiarijia. Quiocua na numooterenoj, janiya maru nitiniutianiya jiya na piquiojonurani.

² Eliiasri quiaquiaari Acabcua na muetanura. Samaria tiacajinia quijiaca pueyari quera na miaajaa titiacoriquiaa jiyacari.

³ Eliias muetaaquishacarijia Acabcua, Acabri tariucua na tiaco cojuana Abdiias piirii. Cuno Abdiiasni, nojuajaari Pueyaso panishano miijiojua quijia cutara.

⁴ Acab niquiocua Jezabel jaara Pueyaso saquiriojosano pueyacuara secojonaa puecoonu coteequiaari, Abiiasri jiyacari cien pueyacuara secojonaa jamojoquiaari. Querajaa maanura nojori raquiriojotaquiaariiri. Querajaa raaco nojori jamojoquiaariiri, cincuenta niquiriyatu raaco, cincuenta tamonu raaco. Tii nojori jamaatiushaquijia nojori miateja panri mohuacajaajanio. Majaari Acab niishiniu quijia.

⁵ Na nuhuaji Acabri naa sequeree Abdiiastej: —Quiarijia pa neteyocuare puetunu nio pa jiyajanaa pa niquiniuria tee samocua nanaca pacaretaja quiyajaanij, pa niishiniuriajuhuaj, tee mohuaca quiyajaa samocuajinianij. Naajuhuaj, pa caballohuacuaji, pa burrohuacuaji pa niquijiore tee jiyasocua quiya na miaquenuusocoriquianonij. Paa mariqui seyaju quiquiiri pa seya jaara cusonuuquee na miaajaara puetunujuanaa.

⁶ Jiyaritij, nojoriiri cuno jiya raquiriojotaree nojori netecuanura puetunu cuno jiyajanaa. Naacuatij, Acabri tamama quiareecujua, Abdiiasri tamonu nucoco quiaree tamajaajaaja.

⁷ Abdiias quiasacari nucoco, jiyacari Eliias naacuree saajaari. Abdiias jaara na niishiquiaari nojuajaari seetanujuanaa Eliias quiriquiaa, naa na sequenuta jacamaree nocuaraari: —¿Quiaacuajaruhua cua camarnu Eliias?

⁸ Eliiasri na riucuaree: —Taaquiriirinij, janiyacuaaquiniatejaj. Naa na sequereejaariuhuaj: —Ritia quia camarnu quia numootecoo janiya niya quiyani.

⁹ Abdiiasri jiyacari saaja naa Eliias riucuareequij: —¿Casaa cua miirii sesanij, naa Acab quia motenu paniniuria janiyatej?

¹⁰ Seetanujuanaa quia Pueyaso niquiara quia sequeyanijia. Majaari quenaaja tamonu jiya cureenu quiajaniyajiniji cua camarunu nequesotasoo. Nojuacuajaari na pueya jiyaramiquiquianu puetunu jiyaca camarucuaacuajanaa nequesotanura majatee nojori jiyacajinia quia quiniu seetanujuanaa. Puetunu jiyacajinijinio camarucuajanaari saaja shaacatuquiaa quiajaniya.

¹¹ Quiaari quiarijia naa cua shiniujiyacujua, “Quia camarnuucua quia riujiuuriohua. Quiocua naa sequesuhuanotej, ‘Eliias nooj, jati quiyatej.’”

¹² Janiya jaara quiocuara numootenuucua riujiuuriohuani, janiyari puereyani Pueyaso Sohuanuuri niiquiji quia shiriquionutaniya cua niishiyaquishaqui. Acab jaara tiuquishii niya, jaara quia riuriataaquiri, nojuajaari cua moriquiano. Eliiasnaa, janiya quia seruniqui. Janiyari cua naatujuajiniji Pueyaso panishano miijiani.

¹³ ¿Majateeri cua miishanojiniji quia niishiniuni? Jezabel puecoosacari Pueyaso sequesano caminiujiuniaa, janiyari cien pueya jamojono nocuajini. Janiyari querajaa maanura cuno cien pueya raquiriojotanoni raaco cua jamojosocoriquiano. Janiyari nojori jamaatiujia raacojua nojori miatejani.

¹⁴ Quiaari quiarijia cua shiniujiyacujua quiocuara cua camarnu numootenuucua cua quianura. Maja naa cua miiniuujiatej, cua morucua.

¹⁵ Eliiasri jiyacari naa Abdiias riucuaree: —Seetanujuanaa cua tojishano cumaacaraca Pueyaso niquiara quia sequeyanijia. Janiyari seetanujuanaa quiarijia naacuneetoonutaniya Acabtani.

¹⁶ Naacuatej, Eliiascua Acab niniuria, Abdiiasri Acab na numootenuucua jaaquee. Acabri jiyacari Eliiascua niquiaari nata na naacuneetoonura.

¹⁷ Acab niquishacari Eliias, jiyacari naa Eliias sequereeri: —¿Quiaateeri cuno pueyanocuaja naa Israel pueya miitiaaniquitij?

¹⁸ Eliiasri Acab riucuaree: —¿Janiyatucua casaara naa miitiare Israel pueyanij? Tama quiajaniyajaajacuajaruhuate, quia jiitiasano pueyajaajanio, naa naquiya pa pueya miiniurianiquitij. Cunoori puerano Pueyaso naajiotasano tojitiaashijiaca nia quiniuucua. Naacuatej, niaari Pueyaso soosano juhua Baal niquishano jeecojotucanu tama nia pueyasorajaaja. Niaari cuno casaa secojonuuquiaa juhua pa jiitiana Pueyasojua.

¹⁹ Quiarijianij Acabnaa, puetunu Israel pueyajanaa quia numootere, nojori cuaara Carmelo tuhuananuucua rerejoora. Cuaara quiojoorajuhuaj cuno cuatro ciento cincuenta Baal shimiacuri, cuno cuatro ciento Aseraa shimiacurijuhuaj teyano pojori Jezabel miatequiaacuajanij.

Eliias shocotasacari Baal shimiacuri

²⁰ Acabri jiyacari puetunu Israel pueyajanaa numootejoree nojori rerejonura Carmelo tuhuananuucua. Puetunu cuno Baal, Aseraa shimiacurijanaa rerejotequiaarijaariuhuaj.

²¹ Jiyacaritij, Eliiasri tariucua rerejono pueyacua cateconuquiaari. Naa nojori sequereeri: —Pueyanaa, ¿taacari naa nia taacanuunu nia tarinitianutaniyani teyonuteja seetanujuanaa Pueyasoni, pa supuetana Israel Pueyasotee, cuno jeecojosano casami soj? Pueyaso jaara seetanujuanaa nia Pueyaso quiri, na tojitiajaca nia quiricuarajaj. Saniniuujia niaa jaara jiyaniri Baalri Pueyaso niaara, na tojitiajaca nia quiriqui. Puetunu pueyajanaari sanaa na tojitiariquiaa.

²² Eliiasri jiyacari socua naa sequeree puetunu tii quiniaa narta Israel pueyatej: —Pueyaso sequesano caminiujiuniaa pueyajinijinionij, niquiriyatu saa janiyajaari saminio quitiashuyani. Pueyaso soosano Baal shimiacuriiri saniniuujia cuatro ciento cincuenta pueyari taquiya quiyacujua.

²³ Quiarijianij, canaa nia niquitiojore querajaa juunu macujuashi. Baal shimiacuri cuaara niquiriyatu rapitiatuura. Cuaara na nuhuaji mojoco caco na niaretatuuranoj. Naajuhuaj, cuaara mani niatuyaquiiria nocua. Janiyari juunu tarajanu rapitianutaniyajaniuhuaj. Janiyari mojoco caco na niaretanutaniyani. Naajuhuaj, majaari mani cua nianu quiniutianiya nocuani.

²⁴ Naa juunu nia rapitianu nuhuajitij, niocua Baal maserohua nocuara. Janiyari cua casaacuara cua Pueyasojuanaa masenutaniyajaniuhuaj. Naacuatej, teyanoteja mani tininiutianiya jiya cajiniocuaji pa rapitiasano juunu catejianurani, cuno cuaara quiiria seetanujuanaa Pueyaso cutara. Puetunu pueyajanaari jiyacari naa riucuaree Eliiastej: —Seetanujuanaa naacamaatej. Nia miiricuarajaj taa quia sequereecuajanij.

²⁵ Eliiasri jiyacari cuno Baal shimiacuri sequeree naatej: —Shimiacuriniaa, nia coteere nia juunu rapitianu. Niaari taquiya queraraqui cutara. Niocua na nuhuaji Baal maserohua nocuara. Maja cutaraari mani nianu nocua.

²⁶ Cuno shimiacuriiri nojoririano niquitiosano juunu rapitiaree. Nojoriiri Baal coteeturee secojonu. Na panacariitiamaajaari. Shimiacuriiri naa Baal sequeturiquiaaquij: —¡Baalnaa! ¡Canaara quia miiri canaa masesano! Shimiacuriiri na juhuacu shocua jiateyotanuuriquiaa. Jiyacaritij, majaari quenaaja rupaa tojishaanu quirii nojori masesano na riucuanura.

²⁷ Tari pananu tiuushacari pa nacasuhuojuajinia, Eliiasri jiyacari coteeree nojori rerequetenu. Naa nojori sequereeri: —Socua jiyanohua nia rupaa nia paaretare. Nojuacuajaari pueyaso. Cojeya jiyoteeri, casaate pa toyani. ¿Jitiaa soj? Quiaarucuaa jiyoteeri. ¡Shitimia maquequee jiyoteeri! ¡Nia niucuajarenoj!

²⁸ Cuno shimiacuriiri na martenuta Baal maseturiquiaa, Baal miiniuria nojoriria nojori masesano. Jiyacari tama na cuaqueyajaaja jiyatajoturiquiaa cushiishitiaari. Naacua tama na nanacajaaja nanooriquiaari. Cuno pojoriiri naa sacuaraatia na cuaqueya jiyatajonuujuacajuhuanajatej.

²⁹ Pananuuri socua nojori piriuutiamaaquij naa pueyaracaanu nojori jiateyotanuunuucua juhua paateca, nojori paaretasacari na rupaajuhuaj. Pananuuri tariucua taqueya joojuajinia tiuuriquiaa. Seyari jiyacari Pueyasora catijiasano quijia. Jiyacaritij majaari quenaaja rupaa tojishaanu quirii cuno pojori na riucuanura. Naacuatej cuno pojori masesanoori tojetaarucuajanaa nojoriria miyaquishaaree.

³⁰ Eliiasri jiyacari puetunu tii quiniaa pueyajanaa sequeree naatej: —Miji cucua nia cateconure puetunu niajaniyajanaa, pueyanaa. Puetunu tii quiniaa pueyajanaari nocua cateconuree. Eliiasri jiyacari coteeree Pueyasora catijiaja jiyajeetasano juhuacu jeecanu.

³¹ Eliiasri tii matiuyano doce sai rerateree. Naa miiriiri supuetana Jacob muetusano niquiohua quiniuucua doce canuu. (Pueyasojuanaacuajaari Jacob sesa jataniquiaari Israel na quiniuria.)

³² Eliiasri cuno doce saitia juhuacuree Pueyasora. Juhuacu shocua jiuutiarohua surocohuaraari juhua veinte litro mohuaca matajara tii.

³³ Mojoco na niaretanu nuhuaji, juunu rapitiareeri. Na rapitiasano juunu shucua niojoree mojoco cacoori.

³⁴ Eliiasri jiyacari naa pueya sequereequij: —Cuatro patacocuajinia nia mishinijiore mohuaca. Niocua Pueyasorano cateriquiano shu, mojoco cacoji taroorenoj. Eliiasri pueya sequerohuacuhuaj, nojori pacutenura mohuaca taroonu cuno casaa cacoji. Pueya sequerohuariuhuaj, socua nojori caminiuria mohuaca taroonu Pueyasorano cateriquiano paatishano casaa cacoji. Naacuatej, pueyari jiuujianaraca pacutejoree mohuaca taroonu cuno casaa cacoji.

³⁵ Naacuatej mohuacaari sai caco paatishano mojoco shu shocua jaateriquiaa. Surocohuara na shocua jiuutiasanoori netaamiaajuhuaj.

³⁶ Tariucua pananu caruhuocosacari, Eliiasri cateconoree Pueyasora cateriquiano casaacua. Jiyacari naa na rupaa paaretareeri: —Cua Camarnu Pueyasonaa. Quiaari cua supuetanaa Abraham, neyanu Isaac, na jinianu Israel Pueyasocuaja. Naacuatej, nio pojori cuaara quiarijia niishiiria quiaari nojori Pueyasocuaja. Nojori cuaara niishiiriajuhuaj janiyari quia jiyaraajiani. Naajuhuaj, janiyari quiarijia naa nio miyaquij, quiaacuajaari cua sequeree naa cua miiniuriatej.

³⁷ Quiria quia miiri cua sequesano quiajaniya, Camarnunaa. Cua riucuare nio pueya niishiniuria quiaari seetanujuanaa Pueyaso cutara. Quiaari nojori panitiaajuhuaj nojori cuaara noojia tacatohuara quiocua.

³⁸ Naa Eliias secojosacaritij, Pueyaso maniiri jiya cajiniocuaji tiquii. Rapitiasano shuuri mojocotaja puetunujuanaa cateree. Sairi tojetaarucuajanaa cateree na juacajuhuaj; shaaqui tii. Cuno maniiri shu shocua cajitiaja mohuaca joojuaquijiareejuhuaj.

³⁹ Naa pueya niquishacari mani miishanotej, puetunu pueyajanaari jiyocua jacamaturee Pueyaso na timitianura. Naa sequetureeri: —¡Pueyasoqui seetanujuanaa Camarnujuanaa cutara! ¡Pueyasoqui seetanujuanaa cutara!

⁴⁰ Eliiasri jiyacari tii quiniaa pueya sequeree: —¡Cuno Baal shimiacuri nia quioore puetunujuanaa! Majaari tamonu jaatenu quenaaja. Pueyari jiyacari puetunu cuno Baal shimiacurijanaa quiooree. Eliiasri Quisoon samojinia jiyataqueequinioj. Tii nacareesaaquiaariiri.

Eliias masesacari Pueyaso maru niniuria

⁴¹ Naa na miiniu nuhuajitij, Eliiasri naa Acab sequeree: —Jiyacarijia miaquenuucua ratunuucua quia quiaarohua. Maru tari pocuaaree.

⁴² Acabri jiyacari miaquenuucua ratunuucua quiaquee. Eliiasri saniniuujia Carmelo tuhuananuucua tacaqueecujua. Pueyaso na secojonura, mojoquetareeri. Jiyocuara nanirii jiyanohuari. Na jiquiocoori na mojocuaca tajiniacoma jateeriquiaa.

⁴³ Na secojonu nuhuaji, na jiyaraajia sequereeri: —Shoniniacu caminia caco quia niquinijiore. Na jiyaraajiaari canujiyaree. Shoniniacu caminia caco niquinijioseeri. Jiyacari naa Eliias sequerohuari: —Shaaqui tojetaarucuajanaa. Eliiasri jiyacari naa na jiyaraajia sequeree: —Quiocua naa siete caminiujiuri sanenuucojonu shoniniacu caminia caco niquinijionutej.

⁴⁴ Tari siete na pacutejosacari sanenuucojonu, jiyacari Eliias sequereeri: —Mij, tucuacaanu shoniniacu caminiajiniji tacaano niquiya shiitianiyojua juhuaquishiyanijia, juhua pa juaashiquiaja. Eliiasri jiyacari na jiyaraajia sequeree: —Acab quia sequeseequi, cuaara jiyacarijia tacaara na rucuanejotarujinia, maru mariqui niyaja na ritiareeri.

⁴⁵ Acabri naacua ritia tacaree na rucuanejotarujinia. Jezreel jiyanishano tiacajinia quiaarohuari. Jiyacaritij, paratuuri piyarojonu coteeree. Ninitiaqueeri. Maruuri jiyanohua niyaree.

⁴⁶ Eliias saniniuujia, Pueyaso cumaquiniuucua nojuaja, jiyacari maninia na toque saatirii na cajiniocuaari. Ritia netequee Jezreel tiacajiniaraari. Coteenu tiuquishii Acabcuajiiri.