Saumu 99 - Ritonõpo Omiry: A Bíblia Sagrada na língua Aparai do Brasil

Ritonõpo, Tuisa Imehxo Exikety

¹ Ritonõpo Kuesẽkõ tuisame mana: ahno tõ tykytyky ãko mã toto. Typorohse mã ynororo tapõ po tuisamehxo kerupĩ tõ epoe; sero nono tykytyky ãko mana.

² Kuesẽkõ jamihmehxo mana Jerusarẽ po; ahno tõ emero esẽme mana.

³ Eahmatoko emero porehme, imehxo aexiryke, tuisamehxo aexiryke aomiry etatoko. Kure rokẽ mana.

⁴ Tuisa orẽpyra Exikety, zae ehtoh sehxo mase; Izyraeu tomo a zae ehtoh tonehpose oya, ajohpe pyra ehtoh tyripose roropa oya, jamihme pyra exiketõ ewomatohme eya xine.

⁵ Ritonõpo Kuesẽkõ seahmatone kuosekumurukõ po syporohtone apõ konõto ẽpataka. Ritonõpo Kuesẽkõ kure rokẽ mana.

⁶ Moeze tõ Arão maro oturuketõme toh kynexine Ritonõpo poetoryme, Samueu roropa tõturuse eya; Ritonõpo Kuesẽkõ tykohmase eya xine, tozuhse roropa toto eya.

⁷ Akurũ xikihme exikety poe tõturuse ynororo Izyraeu tomo a; aomiry omipona toehse toh kynexine, inyripohpyry roropa, inekarohpyry eya xine.

⁸ Ritonõpo yna Esemy, opoetory tõ tozuhse oya; toto rypyry korokaneme mosenepoase eya xine, iirypyry tuãnohse oya ahtao ro.

⁹ Ritonõpo Kuesẽkõ eahmatoko. “Kure mase,” kahtoko eya esary po, ypy kurã po. Ynara exiryke, Ritonõpo Kuesẽkõ kure rokẽ mana.