Saumu 97 - Ritonõpo Omiry: A Bíblia Sagrada na língua Aparai do Brasil

Ritonõpo sero nono Esẽme mana

¹ Ritonõpo Kuesẽkõ tuisa konõtome mana. Atãkyematoko, sero nono põkomo! Atãkyematoko, ahmõta po exiketomo, tuna konõto ehpiõkomo!

² Mokyro zomye akurũ tõ mana, ikohmamyry xinukutume roropa. Tuisamehxo mana ajohpe pyra exiketyme ipunaka, zae rokẽ exiketyme roropa mana.

³ Esemazupurume apoto ytõko epetõkara zahkatohme zomye.

⁴ Neneneh katoh sero nono zeipõko mana. Moro eneryke sero nono põkõ tykytyky ãko mã toto.

⁵ Ypy tõ tunatãko mã kehko moronapu samo Kuesẽkõ ẽpataka, sero nono emero esẽ ẽpataka.

⁶ Kapu poko exiketõ kuurutorỹko mã kehko zae Ritonõpo ehtoh poko. Saeremehxo aehtoh enẽko sero nono põkõ emero.

⁷ Imehnõ neponãmary eahmananõ ehxirõko mã toto; epyrypaketõ tyneponãmarykõ poko ehxirõko mã toto. Ritonõpo Kuesẽkõ ẽpataka emero ritõ tõ tosekumurukõ po porohnõko mã toto.

⁸ Zae rokẽ imehnõ apiakary poko oya, Ritonõpo, pata Jerusarẽ põkõ tãkye mã toto, Juta patary põkõ roropa atãkyemãko mã toto.

⁹ Ritonõpo Imehxo Exikety, erohnõko mase sero nono esẽme ehtoh poko porehme, emero ritõ tõ motye tuisamehxo mase.

¹⁰ Opyno xine Ritonõpo Kuesẽkõ mana popyra ehtoh se pyra awahtao xine; oewomãko mana orihpyra oehtohme, opynanohnõko mana popyra exiketõ winoino.

¹¹ Saerehkatoh saereh ãko mana zae ehtoh poko exiketõ pona, tãkye ehtoh saereh ãko sã mana Ritonõpo omiry omipona exiketõ pona.

¹² Tãkye ehtoko Ritonõpo poko, amarokõ emero aomiry omipona exiketomo! “Kure mase,” kahtoko Ritonõpo kurano a, eahmatohme inyrihpyry poko.