Saumu 96 - Ritonõpo Omiry: A Bíblia Sagrada na língua Aparai do Brasil

Ritonõpo eahmary, tuisame aexiryke

¹ Oeremiatoko eremiatoh kasenato ke Ritonõpo eahmatohme. Oeremiatoko Ritonõpo netaryme, sero nono põkomo emero!

² Oeremiatoko Ritonõpo netaryme, eahmatoko. Kokoro rokẽ imehnõ zurutoko, typynanohse eya kuexirykõ poko.

³ “Ritonõpo kurã poko,” ekãtotoko imehnõ nonory põkomo a, emero ahno zurutoko inyrihpyry poko tyjamitunuru ke.

⁴ Tuisamehxo Ritonõpo ehtoh eahmatohme kyya xine mana; imehnõ ritõ tõ motye emero, tuisamehxo mana.

⁵ Imehnõ nonory põkõ ritõ kõ, ineponãmarykõme rokẽ mã toto, yrome kapu rihpõme Ritonõpo mana.

⁶ Ritonõpo zomye saereh ãko mana, xixi motye, tuisamehxo aehtoh osenẽko mana; ijamitunuru ikuranory roropa Itapyĩ pehkãko mana.

⁷ Ritonõpo eahmatoko sero nono põkõ emero! Saeremehxo aexiry poko eahmatoko, ijamitunuru poko roropa.

⁸ Kuesẽkõ kure exiketyme aexiryke eahmatoko; onekarorykõ enehtoko õmõtohkõme Itapyĩ zarã taka.

⁹ Sepuitone, kuesekumurukõ po syporohtone Ritonõpo kurã ẽpataka, aoseneporyhtao; tykytyky kahtoko ẽpataka, nono põkõ emero.

¹⁰ Imehnõ nonory põkõ emero zurutoko Ritonõpo tuisame ehtoh poko! Sero nono esaka tyrise, esyryhmasaromepyra mana; zae rokẽ sero nono põkõ apiakãko mana.

¹¹ Tãkye exiko, nono, kapu roropa! Panaikatome exiko, tuna konõto, onokyro tõ roropa emero tunakuaõkomo.

¹² Atãkyematoko, ona tõkehko moro põkõ roropa. Wewe tomo itu htaõ komo kohtãko mã toto tõseahmarykõme Ritonõpo ẽpataka,

¹³ aepyry ropa ahtao emero Esẽme ehtohme. Zae rokẽ sero nono põkõ rohmanohpõko mana.