Saumu 95 - Ritonõpo Omiry: A Bíblia Sagrada na língua Aparai do Brasil

Eremiatoh sero Ritonõpo eahmatohme

¹ Osehtoko, Ritonõpo Kuesẽkõ eahmase! Seremiatone kuatãkyemarykõme Ritonõpo netaryme, kypynanohnekomo!

² Ehmaropa ẽpataka, “Kure mase,” katohme eya, tãkye rokẽ seremiatone eahmaryme.

³ Kuesẽkõ Ritonõpo Jamihmehxo Exiketyme exiryke, tuisa imehxo imehnõ ritõ kõ motye emero porehme.

⁴ Sero nono tytororo esẽme mana, eutary tõ poe nono kurohtao ypy tõ kaehxo exiketõ pona.

⁵ Tuna konõto esẽme mana tyrise tyya exiryke, sero nono roropa inyrihpyry tomary ke.

⁶ Ehmaropa, Ritonõpo seahmatatose kuesekumurukõ po; kuesekumurukõ po syporohtone ẽpataka Kyrihpõkõme aexiryke.

⁷ Kuesẽkõme mana; ipoetoryme sytatose, eky tõme sã sytatose kaneru tomo onahpoty po, inyrihpyry po, kypynanohnekõme mana. Seroae etatoko ke Ritonõpo omiry kyya xine:

⁸ “Putuhtome exiketõ sã pyra ehtoko, atamurukõ ehtopõpyry sã pyra Meripa po, Masa po ona tonorẽ po.

⁹ Moroto atamurukõ jukuhne toto, tyehno xine jehtohme. Yjamitunuru tonese tyya xine ahtao ro jukuhne toto. Onymoipyra toh kynexine.

¹⁰ Morara exiryke 40me jeimamyry mokaro zehno toehse exine. Ynara akene: ‘Azahkuru rokẽ mokaro osenetupuhnõko mana. Jomipona pyra ekurehnõko mã toto,’ akene.

¹¹ Toto zehno exine, naeroro ynara akene: ‘Jesaka jũme omõpyra ekurehnõko matose ynonory pona, oserematoh taka.’ ”