Saumu 82 - Ritonõpo Omiry: A Bíblia Sagrada na língua Aparai do Brasil

Imehxo Ritonõpo mana Apiakaneme

Asape nymerohpyry.

¹ Ritonõpo tosao mana kapu po, oximõmãkõ rãnao; ritõ tõ rãnao apiakãko mana:

² “Epo hnae zae pyra imehnõ apiakary poko oya xine, popyra exiketõ anakorehmara ehtoko.

³ Zae ehtoko tymõkomokãkara a, poetõpo tomo a roropa, ewomatoko toto; zae rokẽ ehtoko tyrohmanohposamo a, etuarimaketomo a roropa.

⁴ Imehnõ motye kure osekaropyra exiketõ akorehmatoko, tytinerukãkara roropa; ipynanohtoko toto popyra exiketõ winoino.

⁵ “Tuaro pyra matose, onenetupuhpyra; xinukutumao rokẽ ytoytõko matose. Zae ehtoh tonahkase sero nono po.

⁶ Ynara ase: ‘Ritõme matose; Ritonõpo Imehxo Exikety poenõme matose emero porehme.’

⁷ Yrome orihnõko matose, emero rokẽ orihketõ samo. Isene oehtohkõ enahnõko mana imehnõ tuisa tõ poenõ samo.”

⁸ Osehko, Ritonõpo, tuisame exiko sero nono Esẽme. Imeimehnõ nonory põkõ emero okyryryme mã toto, opoetoryme roropa.