Saumu 80 - Ritonõpo Omiry: A Bíblia Sagrada na língua Aparai do Brasil

Ritonõpo, yna pynanohko ropa

Asape nymerohpyry, inekarohpyry eremiaketõ tuisary a.

¹ Yna omiry etako, kaneru esẽ sã Izyraeu tõ Esemy! Yna otururu etako, oeky tõ aroneme sã mase yna Aroneme! Omoro mase typorohse Tuisa Imehxo Exikety apõ po, moroto kae kerupĩ tõ epoe,

² osenepoko Eparaĩ tomo a te, Pẽjamĩ tomo a, Manase tomo a roropa! Ajamitunuru enepoko yna a; osehko, yna ipynanohkose.

³ Yna enehko ropa, Ritonõpo! Yna onuãnohpyra exiko, mame typynanohsẽme exĩko ropa ynanase.

⁴ Ritonõpo yna Esemy, Jamihmehxo Exikety, otoko ahtao opoetory tõ otururu zehno exikehnõko mah?

⁵ Yna emynyhmatoh mekaroase yna a, yna napyryme, kasana pehme xity ke mekaroase yna okurume.

⁶ Imeimehnõ nonory põkõ yna zomye exiketõ osetapãko mã toto yna nonory poko. Yna epetõkara yna eunohnõko mã toto.

⁷ Yna enehko ropa, Ritonõpo Jamihmehxo Exikety! Yna onuãnohpyra exiko, mame typynanohsẽme exĩko ropa ynanase.

⁸ Ejitu nonory poe uwa zoko menehpone; imehnõ ahno taropose oya moro uwa zoko arykatohme mokaro esahpyry po.

⁹ Nono takorokase oya moro uwa zoko esaryme; imity tõ tomõse mya nono aka, tomãse roropa kehko, moro nono typehkase eya.

¹⁰ Somohmã tõ toxiõtose amoriry tõ jerutumã ke; apupari konõto motye amoriry tõ tahtase.

¹¹ Amoriry tõ myahxo tahtase tuna konõto Metiteraneu pona, tuna Eupyrati pona roropa. Moro uwa zoko opoetory tõ Izyraeume mana.

¹² Oty katoh apuru tõ tytahkase oya mokyro zomye? Seromaroro osema ae ytoytoketõ epery ematonanohnõko mã toto.

¹³ Pakira tõ poinoko roropa itũtũmãko mã toto, iiryhmãko mã toto, imehnõ onokyro tõ roropa morohne enahnõko mã toto.

¹⁴ Osehko ropa yna a, Ritonõpo Jamihmehxo Exikety! Kapu poe yna eneko; osehko anarykahpyry pynanohse.

¹⁵ Osehko uwa zoko pynanohse, anarykahpyry, sero amoriry ahtasenano, tyjamihtanohpose oya.

¹⁶ Takohse mana yna epetõkara a, tyahkase roropa eya xine. Zehno mokaro eneko toto enahkatohme oya.

¹⁷ Opoetory tõ, onymenekatyã ewomako, ikurãkako ropa toto, oxiekyry tõme tomãkapose toto oya jamihme toto ehtohme.

¹⁸ Orumekara ropa ynanase jũme; yna ewomako isene yna ehtohme. Morararo oeahmãko ynanase kure oehtoh poko.

¹⁹ Yna enehko ropa, Ritonõpo, Jamihmehxo Exikety! Yna onuãnohpyra exiko, yna pyno exiko. Mame ipynanopyhpyryme ropa exĩko ynanase.