Saumu 77 - Ritonõpo Omiry: A Bíblia Sagrada na língua Aparai do Brasil

Emuhkehkatoh emynyhmaryhtao

Asape nymerohpyry, osekarotohme Ritonõpo a.

¹ Opore Ritonõpo kohmãko ase; opore ikohmãko ase, mame jomiry etãko mana.

² Popyra ehtoh toehse ya ahtao oturũko ase Kuesẽkomo a koko, jemary anỹnõko ase jotururume eya, yrome jemuhkehkara mana.

³ Osenetuputyryhtao Ritonõpo poko pusuh kapitõko ase; ipoko emynyhmaryhtao sekese pyra exĩko ase.

⁴ Jynyhmapopyra Ritonõpo mana; torẽtykehxo jexiryke oturusaromepyra ase.

⁵ Pake ehtopõpyry poko osenetupuhnõko ase, poetome jehtopõpyry poko roropa.

⁶ Wenikehpyra ase jeremiatopõpyry poko koko ahtao. Emynyhmãko ro ase ukurohtao, ya rokẽ ynara ekaropõko ase:

⁷ “Jũme yna rumekãko Kuesẽkõ nae? Jũme Ritonõpo zamaro ehsaromepyra ynanae?

⁸ Yna pyno pyra toehse nae? Aomihpyry yna a tymyakãmase hnae?

⁹ Tuenikehse Ritonõpo nae yna pyno toexiry poko? Yna pyno toexiry tymyakãmase hnae yna zehno toehtoh ke?”

¹⁰ Mame ynara tykase ywy: “Popyrahxo nase kuakorehmarykõ se pyra toehse Ritonõpo Imehxo Exikety mana, pake toehtopõpyry sã pyra.”

¹¹ Ritonõpo, wenikehpyra ase onyrityã kurã poko, ajamitunuru ke! Osenetupuhnõko ase onyrityã osenuruhkatoh poko pake ahtao.

¹² Osenetupuhnõko ase emero onyrityã poko, emynyhmãko ase onyrityã poko emero ajamitunuru ke.

¹³ Ritonõpo, onyrityã emero kure mana. Imepỹ ritõ asã pyra mã ipunaka, Imehxo Exiketyme mase.

¹⁴ Ritonõpome mase, ajamitunuru ke kure ehtoh rokẽ rĩko mase; imeimehnõ nonory põkomo a ajamitunuru tonepose oya.

¹⁵ Ajamitunuru ke opoetory tõ typynanohse oya, Jako pakomotyamo te, Joze pakomotyamo, enara.

¹⁶ Ritonõpo, oeneryhtao tuna tomo a tõserehse sã mã kehko, zueme exikety tykytyky tykase.

¹⁷ Akurũ tomo a konopo tukuãse, konomerume nexiase kapu ao, xiaxiake neneneh tykase kapu poko.

¹⁸ Konomeru konõto tururume toytose epozakuroko; nono saereh tykase nenenehkane ke, nono tykytyky tykase, kywyh kywyh tykase roropa.

¹⁹ Pohkane kuroko xikihxikihme mytoase, osema myriase zue kuroko, yrome oputahpyry onenepyra toh nexiase.

²⁰ Toky tõ kaneru tõ pyno exikety sã opoetory tõ tarose oya, Moeze maro, Arão maro.