Saumu 76 - Ritonõpo Omiry: A Bíblia Sagrada na língua Aparai do Brasil

Ritonõpo orẽpyra Exikety

Asape nymerohpyry. Eremiatopo. Inekarohpyry eremiaketõ tuisary a.

¹ Ritonõpo waro Juta põkõ mã toto; imehxo aexiry waro mã Izyraeu tomo.

² Tapyike mã ynororo pata Jerusarẽ po; tosao mana ypy Xião po.

³ Moroto tyzehno exiketõ pyre tytahtahkase eya; toto osewomatoh tonomo, tapema tõkehko, ipyrekõ emero tonahkase eya.

⁴ Xixi motye saereh ãko mase, Ritonõpo! Orẽpyrahxo mexiase toehse ropa awahtao ypy tõ poe ozehnotokõ poremãkaxĩpo!

⁵ Mokaro soutatu tõ, jamihme exiketõ pyre tarose kehko emero; seromaroro nyhnõko mã toto toorihse, osewomasaromepyra toexirykõke.

⁶ Ritonõpo, Jako Esemy, mokaro enaroximaryhtao oya, kawaru tõ maro epo ytoketõ roropa toepukase, toorihse toto.

⁷ Ahno emero ouno mã toto. Oẽpataka xikihme ehsaromepyra mã toto, zehno awahtao.

⁸ Kapu aeino “Awãnohtorỹko ase,” karyhtao mokaro a; zuno toehse sero nono põkomo, tymynyhpãse ropa toto,

⁹ towõse awahtao zae apiakatohme oya, mokaro emero tyrohmanohposã pynanohtohme oya sero nono po.

¹⁰ Oxiehno ahno ahtao ro toahmasẽme exĩko mase itamurumehxo; tõsetapakehse toto ahtao, orihpyra exiketõ oseahmãko mã toto oeahmaryme.

¹¹ Onekarorykõ enehtoko Ritonõpo Kuesẽkomo a õmihpyry ae ro; osehtoko imehnõ nonory põkomo, moe pyra exiketomo, onekarorykõ enehtohme Ritonõpo a. Tõmiry omipona imehnõ ripõko mana emero porehme;

¹² kowenu poetory tõ, epyrypaketõ, poremãkapõko Ritonõpo mana. Zuno imehnõ nonory põkõ tuisary tõ ripõko mana.