Saumu 75 - Ritonõpo Omiry: A Bíblia Sagrada na língua Aparai do Brasil

Ritonõpo, zae apiakaneme

Asape nymerohpyry, inekarohpyry eremiaketõ tuisary a.

¹ “Kure mase,” ãko ynanase oya, Ritonõpo. “Kure mase,” ãko ynanase ameke pyra oexiryke. Imehxo oexiry poko oturũko ynanase, onyrityã osenuruhkatoh kurã ekarõko ynanase.

² Ritonõpo ynara ãko: “Apiakatoh tymenekase ya, zae apiakãko ase.

³ Sero nono põkõ emero tykytyky karyhtao ro, nono roropa tykytyky karyhtao, apõ tõ kurãkãko ase tũpore aehtohme.

⁴ Popyra exiketomo a ynara ãko ase: Imehnõ motye kure osekaropyra ehtoko;

⁵ orẽpyra oehtohkõ poko epyrypara ehtoko, ãko ase.”

⁶ Ahno wãnohtoh oehpyra mana xixi tũtatoh wino te, xixi omõtoh wino roropa, inikahpoino te, ikurenaeino roropa.

⁷ Ritonõpo kuapiakatorỹko mana; ynoro rokẽ zae pyra exiketõ apiakãko mana, imehnõ iirypyryme pyra ekarõko mana.

⁸ Kasana nae Ritonõpo Kuesẽkõ emahpo eukuru jehnahpyry ke pehme, zehno ehtoh ke. Moro ekamõko mana, popyra exiketõ okurume, ẽnõko mã toto emero porehme eukuru enahtoh pona.

⁹ Yrome ywy oturukehpyra ase Ritonõpo, Jako Esẽ poko, eremiãko ase eahmaryme.

¹⁰ Popyra exiketõ jamitunuru enahkãko mana; yrome Ritonõpo omipona exiketõ jamihmehxo exĩko mã toto.