Saumu 7 - Ritonõpo Omiry: A Bíblia Sagrada na língua Aparai do Brasil

Zae ehtoh ekaropõko Ritonõpo a

Sero saumu tymerose Tawi a.

¹ Ritonõpo Jesemy, oya oehnõko ase jewomatohme; kuanỹko, kypynanohko jekahmananõ winoino emero porehme.

² Reão sã jarory se mã toto ypynanohsaromepyra imehnõ ehtoh pona, moroto yxihxihkatohme.

³ Ritonõpo, Jesemy, zae pyra ehtoh poko toehse jahtao, imepỹ popyra tyrise ya ahtao,

⁴ jepeme exikety towokase ahtao ya te, imepỹ jepekara popyra tyrise ya ahtao

⁵ moro sã toehse jahtao ah jepetõkara jekahmã toto, ah japoĩ toto. Ah jemã toto nono pona totapase, tynomose ekepyryme nono po.

⁶ Ritonõpo, owõko ty zehno oehtoh ke, jepetõkara yzehno ipunaka, iporemãkapoko toto! Xikihme exiko, kuakorehmako, zae ehtoh se oexiryke.

⁷ Oximõme imeimehnõ nonory põkõ enehpoko õmye toto ehtohme, toto tuisaryme exiko kaino kapu poe.

⁸ Ritonõpo yna Esemy, yna apiakaneme mase, ahno apiakane emero. Kuapiakako zae exiketyme, Ritonõpo, zae ehtoh poko rokẽ jexiryke, ajohpe pyra jexiryke.

⁹ Ajohpãme sã popyra exiketõ nyrihpyry xihpyry enahkapoko, kurã ke zae ehtoh poko exiketõ epehmako. Zae Ritonõpome oexiryke ipunaka, yna osenetupuhtoh apiakãko mase, yna penetatoh roropa.

¹⁰ Ritonõpo, kuewomako osewomatoh samo; ajohpe pyra nymyry exiketõ ipynanohko.

¹¹ Zae rokẽ apiakaneme Ritonõpo mana; kokoro rokẽ popyra exiketõ wãnohpõko mana.

¹² Tyyrypyrykõ rumekary se pyra toto ahtao, tytapemã aehtõko Ritonõpo mana. Tytakỹ toaryhtose eya pyrou tõ ekomatohme.

¹³ Typyre tõ apoĩko mana toto wotohme, pyrou ke tuõko mana apoto zukatoh tonõ samo.

¹⁴ Enetoko ke popyra exiketõ popyra ehtoh poko osenetupuhnõko mã toto. Atamorepãko mã toto popyra ehtoh riry poko, ajohpe exikehpyra mã toto.

¹⁵ Ahno apoitoh rĩko mã toto, yrome ynaroro omõnõko mã toto moro aka.

¹⁶ Moro sã tuãnohsẽme exĩko mã toto popyra toehtohkomo a. Tyyryhmasẽme exĩko mã toto, imehnõ ryhmary se toexirykõke.

¹⁷ Yrome ywy: “Kure mase, Ritonõpo,” ãko ase zae rokẽ oexiryke imehnõ apiakary poko. Eremiãko ase oeahmaryme, Jesemy Ritonõpo Imehxo Exikety.