Saumu 67 - Ritonõpo Omiry: A Bíblia Sagrada na língua Aparai do Brasil

Kure mase, Ritonõpo

Saumu, eremiatoh tokarose eremiaketõ tuisary a.

¹ Ritonõpo, yna onuãnohpyra exiko, kure rokẽ yna tyriko! Yna pyno exiko,

² tyriry se oehtoh waro sero nono põkõ ehtohme, emero; typynanopyrykõ se oexiry waro imeimehnõ nono põkõ ehtohme porehme.

³ Ritonõpo, oeahmary se ase imehnõ nonory põkomo a! Emero nono põkomo a oeahmary se ase!

⁴ Imehnõ ahno tãkye exiry se ase, eremiatohme atãkyemaryme zae ahno apiakaryke oya, zae sero nono põkõ aroneme roropa oexiryke.

⁵ Ritonõpo, oeahmary se ase imehnõ nonory põkomo a! Emero nono põkomo a oeahmary se ase!

⁶ Tykyrysã zamaro nono exiryke tonahsã itamurume toehse. Ritonõpo, Kuesẽkomo a kure rokẽ tyrise sytatose.

⁷ Eya kure rokẽ tyrise sytatose; ahno tõ emero, sero nono põkomo Ritonõpo waro toto ehtohme aomipona ehtohme roropa!