Saumu 66 - Ritonõpo Omiry: A Bíblia Sagrada na língua Aparai do Brasil

Ritonõpo eahmary, “Kure mase,” katoh ke

Saumu, eremiatoh tokarose eremiaketõ tuisary a.

¹ Ritonõpo eahmatoko, okohtatohkõ ke, ãtãkyemarykõme emero sero nono põkomo!

² Oeremiatoko eya, eahmaryme: “Kure mase, Ritonõpo Imehxo,” kahtoko eya.

³ Ynara kahtoko eya: “Onyrityã pokoino osenuruhkãko ynanase! Ajamitunuru imehnõ jamitunuru motye exiryke, emero ozehno exiketõ tosekumuru po porohnõko mã toto oẽpataka.

⁴ Sero nono põkõ emero oeahmãko mã toto, eremiãko mã toto, oeahmaryme, eremiãko mã toto imehxo oekaroryme.”

⁵ Osehtoko Ritonõpo nyrityã enese, orẽpyra nase tynyrityã poko ahno pynanopyry poko.

⁶ Nonome tuna konõto tyripose eya. Tupupurukõ po kytamuru tõ toytose tuna akuohse. Moroto tãkye sexiatose inyrihpyry poko.

⁷ Tyjamitunuru ke tuisame exikehpyra mana jũme, imeimehnõ nonory põkõ enẽko mana. Ah Ritonõpo zehno exiketõ typoremãkasẽme nexĩ toto!

⁸ Ah emero ahno tõ Ritonõpo Kuesẽkõ eahmã toto! Oeremiatoko opore eahmatohme.

⁹ Towomase kymarokõ eya, isene kuehtohkõme, takorehmase kymarokõ eya epukara kuehtohkõme.

¹⁰ Ritonõpo, tukuhse ynanase oya; parata kuhtoh samo apoto ke, moro sã tukuhse ynanase oya.

¹¹ Tynomose yna oya apoitoh pona yna epukatohme, yna motary pona omoxinety tõ tyrise roropa oya.

¹² Yna tytũtũmapose oya yna zehno exiketomo a. Apoto kuroko ynanytoase, tuna kuroko roropa, yrome seromaroro kuenepyatose ropa osa towomaneke exikety pona.

¹³ Atapyĩ taka ynekarory tõ arõko ase jahkatohme tytororo; jomihpyry ae ro ynekarory ekarõko ase oya.

¹⁴ Moro ekarõko ase, tykase ywy oya popyra ehtoh toehse ahtao ya.

¹⁵ Kaneru tõ ekarõko ase oya jahkatohme apoto apõ pona; pui orutua zahkãko ase, poti tõ maro, mame orexĩto onuhnõko mana kakoxi kapu aka.

¹⁶ Osehtoko, amarokõ emero Ritonõpo omipona exiketomo, jomiry etatoko, inyrihpyry ya ekarõko ase oya xine.

¹⁷ Tykohmase ynororo ya jakorehmatohme; mame eahmase roropa eremiatoh ke.

¹⁸ Aryhnaka yyrypyry onekaropyra jahtao jomiry onetara Kuesẽkõ exiry.

¹⁹ Yrome jomiry totase Ritonõpo a rahkene, jotururu eya totase.

²⁰ “Kure mase, Ritonõpo,” ãko ase eya typanary anapurupyra aexiryke, tõturuse jahtao eya, ypyno exikehpyra roropa aexiryke.