Saumu 64 - Ritonõpo Omiry: A Bíblia Sagrada na língua Aparai do Brasil

Ekaropotoh osewomapotohme

Tawi nymerohpyry ekarotohme eremiaketõ tuisary a.

¹ Ritonõpo, jotururu etako. Popyra ehtoh toehse ya ahtao! Kypynanohko yzehno exiketõ zuno jexiryke.

² Kuewomako popyra exiketõ osenetupuhtoh winoino; kypynanohko mokaro ajoajohpãkõ winoino.

³ Tunurukõ aehtõko sã mã toto rato pohsuimã aehtory samo, aomirykõ pyrou sã mana typohke urari ke ahpahpyry samo.

⁴ Axĩ mã toto ajohpe ehtoh ekarory poko, imehnõ hxirory poko, kurãkõ ryhmãko mã toto omi xihpyry ke.

⁵ Atakorehmãko mã toto popyra ehtoh ritohme; oturũko mã toto imehnõ apoitoh riry poko tyya xine, zonẽnõko mã toto osenepyra toto ehtohme.

⁶ Atamorepãko mã toto popyra ehtoh ritoh poko, mame ynara ãko: “Tuaro toehse yna imehnõ ryhmatoh poko, yna onenepyra tuisa tõ ehtohme,” ãko mã toh repe. Tupime enetuputyry mana ahno osenetuputyry ikurohtao xine.

⁷ Yrome typyre ekomãko Ritonõpo mana toto pona, mõtoino rokẽ tapurosẽme exĩko mã toto.

⁸ Toto enahkãko Ritonõpo mana aomirykõ pokoino; mokaro eneryhtao imehnomo a, osenuruhkãko mã toto.

⁹ Ahno emero enaromỹke exĩko; Ritonõpo nyrityã poko oturũko mã toto, osenetupuhnõko mã toto inyriry tõ poko tyjamitunuru ke.

¹⁰ Zae ehtoh poko exiketõ atãkyemãko mã toto Ritonõpo nyrityã poko; imaro osewomãko mã toto. Emero aomiry omipona exiketõ Ritonõpo eahmãko mã toto.