Saumu 6 - Ritonõpo Omiry: A Bíblia Sagrada na língua Aparai do Brasil

Kurãkara atakorehmapotoh Ritonõpo a

Sero saumu tymerose Tawi a.

¹ Ritonõpo Jesemy, jupokara exiko yzehno awahtao! Juãnohpyra exiko zehno awahtao!

² Ypyno exiko tapotũkehse jexiryke. Kukurãkako ropa takuruhtase jexiryke.

³ Torẽtyke ase ipunaka ukurohtao. Ritonõpo, otara ahtao oehnõko ma jukurãkase? Ekurehpyra exiko.

⁴ Kypynanohko, Ritonõpo Jesemy! Yna pyno oexiryke kuanỹko orihpyra jehtohme.

⁵ Aorihtyã ekepyry esao tuenikehse mase, moroto oeahmasaromepyra mã toto.

⁶ Penekehnõko ase yxitary poko. Kokoro rokẽ jynyhtoh tahxikure exĩko nase yxitatoh ke; jupuhpyry apõ tahxikure exĩko yxity ke.

⁷ Jepetõkara pokoino jenuru tyaose nase xitakehpyra jexiryke. Pitiko osenuhmasaromepyra ase.

⁸ Ameke ehtoko ywinoino, popyra ehtoh poko exiketomo! Ritonõpo Jesemy, jotururu etãko yxitaryhtao;

⁹ jotururu etãko mana jakorehmapory ekaroporyhtao ya, otato mana jotururuhtao eya.

¹⁰ Jepetõkara ehxirõko mã toto; oserehnõko mã toto, epãko axiny tuaro pyra exiketõ sã ipunaka.