Saumu 58 - Ritonõpo Omiry: A Bíblia Sagrada na língua Aparai do Brasil

Popyra exiketõ wãnohnõko Ritonõpo mana

Tawi nymerohpyry, inekarohpyry eremiaketõ tuisary a.

¹ Tuisa tomo, kowenu poko erohketomo, zae imehnõ apiakãko matou inyrihpyry emetakame? Zae nymyry ahno apiakãko matou?

² Arypyra. Popyra ehtoh riry poko rokẽ osenetupuhnõko matose, imehnõ ryhmãko roropa matose sero nono po.

³ Tonurutopõpyry poe ro popyra exiketõ zae pyra ehtoh poko mã toto; ajohpe omiãko mã toto tonurutopõpyry poe ro.

⁴ Opi orihmato ke pehme mã toto, okoi orihmatõ samo. Typanarykõ apurũko mã toto, okoi saaro, otato pyra toehtohme,

⁵ mokyro okoi emepane omiry etary se pyra toexiryke, emese kure etoryhtao ro.

⁶ Ritonõpo, popyra exiketõ zery itahkako! Ritonõpo yna Esemy, mokaro zery touko, reão tõ mokaro, imehnõ esekananomo!

⁷ Ah mokaro popyra exiketõ tonahkasẽme nexĩ toto, tuna samo tukuãse ahtao nono pona! Ah takurihmose nexĩ toto otyro sã, ahtaryhtao osema tao!

⁸ Mokaro kue sã tyripoko toto, tuname samo ikurepato htao. Poeto sã tyripoko toto tonuruse ahtao toorihse, saereme ehtoh onenepitopyra aexihpyry!

⁹ Tuaro pyra ro toto ahtao, mokaro popyra exiketõ ãtarykahmã sã tysahkasẽme exĩko mã toto; isene ro toto ahtao, mokaro zehno toexiryke, toto aropõko Ritonõpo mana tyryrykane ke.

¹⁰ Tãkye exĩko zae ehtoh poko exiketõ mana popyra exiketõ wãnopyry eneryhtao tyya xine; tupupurukõ kurikãko zae exiketõ mana imunurukõ ke.

¹¹ Imehnõ ynara ãko: “Ajohpe pyra, zae ehtoh poko exiketõ kurã ke topehmase mã toto. Ritonõpo nae rahkene sero nono põkõ apiakane.”