Saumu 55 - Ritonõpo Omiry: A Bíblia Sagrada na língua Aparai do Brasil

Towokase ahtao tope a

Tawi nymerohpyry, inekarohpyry eremiaketõ tuisary a.

¹ Ritonõpo, jotururu etako! Ajohpãme sã ekaropotoh wino eramara exiko.

² Jomiry etako, kuezuhko; tapotũkehse ywy torẽtyke jehtoh ke.

³ Jerehnõko jepetõkara jenaroximaryhtao eya xine; yyryhmaryhtao popyra exiketomo a jakurihmõko mã toto. Popyra ehtoh enehpõko mã toto ypona; yzehno mã toto, yse pyra mã toto ipunaka.

⁴ Ukurohtao enaromỹke ase ipunaka, joorikyry zuno jehtoh jakurihmõko mana.

⁵ Enaromỹke ywy itamurume, tykytyky ãko ase; tonaroxitapãse ywy.

⁶ Aporiry tõ se sã hano utuku samo, mya jytotohme oserematoh taka!

⁷ Ywy epary myahxo ahno esaka pyra, moroto jehtohme rokẽ rahkene.

⁸ Axĩ sã osa jamihmã zupiry ywy otonẽtohme tyryrykane winoino, konopoimo winoino roropa.

⁹ Ritonõpo, jepetõkara omiry akorekehkako, toto otupitohme. Imehnõ etapary eya xine, osetapary roropa enease pata tõ po!

¹⁰ Saereme ahtao, koko roropa ytoytõko mã toto pata zomye, apuru tõ poro imehnõ ryhmãko; popyra ehtoh poko mã toto.

¹¹ Emero rokẽ po osema tao roropa imehnõ ryhmãko mã toto; ematonanohnõko mã toto, imehnõ enekunohnõko mã toto.

¹² Jepekarame ahtao jeunohnõko, ywy eanahtory; yzehno exikety ykerekeremaryhtao otonẽkety sã rokẽ jexiry roropa repe.

¹³ Yrome omoro mase, ymaro ytoytokety, ymaro atamorepakety jepemehxo repe!

¹⁴ Soturuase oximaro emero poko, sytoase oximaro oseahmase ahno maro Ritonõpo Tapyĩ tao.

¹⁵ Ah jepetõkara norihno toto aorihtoh exipyra ahtao ro; ah nyhtõ toto isene ro toto ahtao aorihtyã esaka. Popyra ehtoh itapyĩkõ tao mana, ikurohtao xine roropa!

¹⁶ Yrome Ritonõpo Jesẽ kohmãko ase jakorehmatohme, ypynanohnõko mana.

¹⁷ Pakeimo, tãxiahtao, koko roropa xitãko ase jotururume eya, mame jomiry etãko mana.

¹⁸ Jenehnõko ropa mana kure rokene etonatoh poe osetapary poko jahtao jepetõkara tuhkãkõ maro.

¹⁹ Ritonõpo, tuisamehxo Exikety moino apitorymã poe, jomiry etãko mana mokaro poremãkãko mana; toetyorõmarykõ se pyra toexirykõke, Ritonõpo imehxo enetuputyry se pyra roropa toexirykõke.

²⁰ Jepẽpo tõsetapase tope tõ maro, toto poremãkapotohme; tõmihpyry tamonohse eya.

²¹ Aomiry kure sã nexiase mãteka samo enekunohtohme, yrome ikurohtao imehnõ se pyra ipunaka exiketyme nexiase. Aomiry kure sã nexiase azeite samo, yrome tapema taere exikety sã nysahkatoh sã nexiase.

²² Torẽtyke oehtohkõ ekaroko Ritonõpo a, mame ãkorehmãko mana. Tõmihpyry omipona exiketõ onyporemãkapopyra mana.

²³ Yrome mokaro imehnõ etapananomo te, imehnõ ewokananomo, ajohpe exiketõ roropa emãko mase, Ritonõpo, aorihtyã esaka; isene toto ehtoh zokonaka exipyra ahtao ro. Yrome ywy, oenetupuhnõko ase.