Saumu 52 - Ritonõpo Omiry: A Bíblia Sagrada na língua Aparai do Brasil

Zae Ritonõpo mana, kypyno xine roropa

Tawi nymerohpyry toytose Toeke etomita ahtao tuisa Sauu a ekarose Tawi ytotopõpyry poko Apimereke a.

¹ Oty katoh epyrypãko mah popyra oehtoh poko, orẽpyra exikety? Kypyno xine Ritonõpo ehtoh anamonohpyra mana jũme.

² Atamorepãko mase imehnõ ryhmary poko; taerẽ exikety sã onuru mana. Ike imehnõ enekunohnõko mase, ajohpe õmiry exiryke.

³ Popyra ehtoh sehxo mase kurãkõ se hkopyra, ajohpe ehtoh sehxo roropa mase, zae omi se hkopyra mase.

⁴ Ajohpe exikety, imehnõ ryhmary sehxo mase õmiry ke!

⁵ Morara exiryke jũme oenahkãko Ritonõpo mana; ãpoĩko mana, jarãnaka oemãko mana atapyĩ tae; sero nono isene exiketõ esary po oenahkãko Ritonõpo mana.

⁶ Moro enẽko zae Ritonõpo omipona exiketõ mana, enaromỹke exĩko mã toto; opoihtõko mã toto, ynara ãko:

⁷ “Enetoko ke mokyro mã Ritonõpo onyripyra towomaneme; yrome orẽpyra tõsekarose ynororo itamurume tymõkomoke toexiryke, tõsewomary tukuhse ynororo zae pyra toehtoh poko.”

⁸ Yrome oriwera zoko sã ase ahtãko Ritonõpo tapyĩ myhto; ypyno aexiry enetupuhnõko ase, jũme ypyno exikehpyra mana.

⁹ Ritonõpo, oeahmakehpyra ase onyrityã pokoino; opoetory tõ ẽpataka kure oehtoh ekarõko ase.